ءىس-شارا ازاماتتىق باستامالاردى قولداۋ ورتالىعىنىڭ قولداۋىمەن ۇيىمداستىرىلدى.
شارا كامەلەتكە تولماعان سوتتالعان بالالاردىڭ قۇقىقتىق ساۋاتتىلىعىن ارتتىرۋعا, ولاردىڭ قايتا الەۋمەتتەنۋىنە جانە ومىرگە وڭ كوزقاراسىن قالىپتاستىرۋعا باعىتتالدى.
ترەنينگكە قازاقستان رەسپۋبليكاسى پرەزيدەنتىنىڭ جانىنداعى ۇلتتىق قۇرىلتاي مۇشەسى ايمان مۇراتقىزى ۋماروۆا, قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات بەكمۇحانبەتقىزى راقىشەۆا, «Human Rights Lawyers» قوعامدىق قورىنىڭ پرەزيدەنتى, زاڭگەر جەڭىسگۇل جاپارحانقىزى حاباەۆا, قوردىڭ پراكتيك-پسيحولوگى جولداسباەۆ عالىمجان سەيتجان ۇلى, الماتى قالالىق ادۆوكاتتار القاسىنىڭ ادۆوكاتى اقىلبەكوۆ قالدىحان ناسىر ۇلى جانە الماتى وبلىستىق ادۆوكاتتار القاسىنىڭ وكىلدەرى قاتىستى.
قوناقتار جاسوسپىرىمدەرگە قۇقىقتىق كەڭەس بەرىپ, راقىمشىلىق تۋرالى زاڭدى ءتۇسىندىردى, بالالاردىڭ جەكە سۇراقتارىنا جاۋاپ بەردى. پسيحولوگ جەڭىسگۇل حاباەۆا جەكە سۇحبات جۇرگىزىپ, ولاردىڭ ىشكى كۇيزەلىستەرى مەن الەۋمەتتەنۋ بارىسىنا نازار اۋداردى.
ايمان ۋماروۆا ءوز سوزىندە بالالارعا بوستاندىققا شىققاننان كەيىن زاڭسىز ىستەرمەن اينالىسپاۋعا, اسىرەسە ءتۇرلى Telegram ارنالارى ارقىلى تاراتىلاتىن زاڭسىز ارەكەتتەردەن بويىن اۋلاق ۇستاۋعا كەڭەس بەردى.
ءىس-شارانىڭ نەگىزگى ماقساتتارى:
- كامەلەتكە تولماعانداردىڭ قۇقىقتىق حاباردارلىعىن ارتتىرۋ;
- سىندارلى مىنەز-ق ۇلىق داعدىلارىن دامىتۋ;
- قايتا الەۋمەتتەنۋ پروتسەستەرىن قولداۋ;
- بالالاردىڭ قاۋىپسىزدىگىن قامتاماسىز ەتۋ جانە زورلىق-زومبىلىقتىڭ الدىن الۋ;
- قۇقىقتىق كومەك الۋ جولدارىن ءتۇسىندىرۋ.
مەكەمە باستىعىنىڭ مىندەتىن اتقارۋشى, ادىلەت پودپولكوۆنيگى مارات بەرىك ۇلى ماحامبەتوۆتىڭ ايتۋىنشا, رەسپۋبليكادا جالعىز بالالارعا ارنالعان تۇزەۋ مەكەمەسى رەتىندە بۇل كولونيا ۇنەمى قوعامدىق ۇيىمدار مەن بالا قۇقىقتارىن قورعاۋ سالاسىنداعى وكىلدەردىڭ نازارىندا. ولار بالالاردىڭ قۇقىقتارىنىڭ ساقتالۋىن باقىلاپ, جاعدايىمەن تانىسىپ وتىرادى.
