بالالار تەمىر جولى تۇيەمويناق (بەيبىتشىلىك) ارالىندا. سونىمەن قاتار ارالدا جاڭا قوعامدىق كەڭىستىك اشىلىپ, بالالارعا ارنالعان ءتۇرلى ويىن الاڭدارى مەن سپورتتىق ورىندار جاساقتالعان. ماسەلەن, فۋتبول, ۆولەيبول, ستريتبول, ۆوركاۋت الاڭدارى بار. بۇل الاڭدار جاستاردىڭ بوس ۋاقىتىن, جازعى دەمالىستى ءتيىمدى وتكىزۋىنە مۇمكىندىك بەرەدى.
بالالار تەمىرجولى سەمەيدە 1979 جىلى اشىلعان, بىراق 1990 جىلداردىڭ ورتاسىندا جابىلىپ قالعان ەدى. جەرگىلىكتى اكىمشىلىكتىڭ باستاۋىمەن, KاZ Minerals توبى 620 ملن قارجى ءبولىپ, تەپلوۆوز بەن ۆاگونداردى ساتىپ الۋعا دەمەۋشىلىك جاساعان. ناتيجەسىندە تەمىرجول قايتا جاڭارتىلدى. العاشقى كەزەڭدە ۇزىندىعى 2 شاقىرىم اۋماققا سەرۋەن جاسالادى. پويىز كىشكەنتاي جولاۋشىلارعا ەرتىس وزەنىنىڭ ادەمى كورىنىستەرىن تاماشالاۋعا مۇمكىندىك بەرەدى.
«تەپلوۆوز بەن ۆاگوندار ەلىمىزدىڭ تەمىرجول تەحنيكاسىنا ماماندانعان قامبار ماشينا جاساۋ زاۋىتىندا دايىندالعان. ءار ۆاگوننىڭ ۇزىندىعى 12 مەتر بولىپ, 32 ورىندى قامتيدى», دەيدى تەمىرجول قىزمەتكەرلەرى.
اباي وبلىسى
