وڭتۇستىك قازاقستان وبلىسىندا 1918 جىلى دۇنيەگە كەلگەن حامىتبەك يساەۆ – مەنىڭ اتام اينابەكتىڭ تۋعان ءىنىسى بوتابەكتىڭ بالاسى. جاستايىنان اكە-شەشەدەن جەتىم قالىپ, اينابەك اتامنىڭ قولىندا وسكەن. بىلىمگە قۇشتار بولىپ, الماتى قالاسىندا دەنە شىنىقتىرۋ تەحنيكۋمىندا وقىعان. وقۋ ورنىن بىتىرىسىمەن اسكەرگە الىنىپ, فين سوعىسىنا قاتىسقان. ول سوعىس اياقتالىسىمەن, ەلگە ورالدى. وتباسىن قۇرام دەپ جۇرگەندە, ەكىنشى دۇنيەجۇزىلىك سوعىس باستالىپ, اسكەرگە شىمكەنت قالاسىنان شاقىرىلعان. بىزگە ءمالىم دەرەككوزدەرىنە قاراعاندا, ۋكراين مايدانىنىڭ 50-اتقىشتار پولكىندە جاۋعا قارسى سوعىسىپ, 1943 جىلدىڭ 15 جەلتوقسان كۇنى ۋكراينا جەرىنىڭ كريۆوي روگ قالاسىنا جاقىن جەردەگى «چەرۆوننىي بالكا» دەگەن ەلدى مەكەندە اۋىر شايقاستا كوز جۇمعان. بۇل – كەيىنىرەك ءمالىم بولعان دەرەكتەر.
الماتى قالاسىندا سپورت مەكتەبىندە 9-سىنىپتا وقىپ جۇرگەنىمدە اتام حامىتبەك بوتابەك ۇلى تۋرالى دەرەكتەردى ىزدەي باستادىم. بۇل 1985 جىلى جەڭىستىڭ 40 جىلدىعىن اتاپ ءوتىپ جاتقان كەز ەدى. قان مايداننان ورالماعان اتام تۋرالى كوپ بىلە بەرمەيتىنبىز. سول كەزدەگى ىزدەۋ ارەكەتتەرىم دە ناتيجەسىز بولدى. دەگەنمەن ىزدەۋدى ۇزبەي, جالعاستىرا بەردىم. سەبەبى ءىنىسى تۋرالى ناقتى حابار الا الماعان, كوپ ۋايىمداعان اتام اينابەكتىڭ شاراسىز كوڭىل كۇيىن كوردىم, كومەكتەسكىم كەلدى. كوپ جايتتان بەيحابار اينابەك اتام 1980 جىلى كوز جۇمدى. اتامنىڭ اماناتىن ورىنداۋدى پارىز سانادىم. اسكەري بورىشىمدى 1987–1989 جىلدار ارالىعىندا ۋكراينا جەرىندە وتەپ ءجۇرىپ تە ىزدەۋدى جالعاستىرا بەردىم. وكىنىشكە قاراي, ەشقانداي دەرەك تابا الماي, ستۋدەنت كەزىمدە دە ىزدەندىم. پودولسك قالاسىنداعى اسكەري ارحيۆتەن دە ماردىمدى حابار الا المادىم.
دەگەنمەن جىلدار بويعى ىزدەۋ ناتيجەسىز بولمادى. 2019 جىلى كەزدەيسوق جاعدايدا ىزدەۋ جۇمىستارىمىزعا جاڭا مۇمكىندىك تۋدى. اتاپ ايتقاندا, سول جىلدىڭ كوكتەمىندە اعام بەكجان اينابەكوۆتىڭ جۇمىس ورنىنا رەسەي اسكەرىندە قىزمەت ەتىپ, پولكوۆنيك شەنىندە زەينەتكەرلىككە شىققان ازامات كەلىپ, ءجون سۇراسقان. اتامىزعا قاتىستى جاعدايعا قانىققان سول كىسىنىڭ كومەگىنىڭ ناتيجەسىندە اتام حامىتبەك يساەۆتىڭ ۋكراينادا جەرلەنگەنىن بىلدىك. ءسويتىپ, جازدا ەڭبەك دەمالىسىندا ءجۇرىپ, اكەم توقتاسىن, مەن جانە ءىنىم دوسجان كيەۆ قالاسىنا ۇشىپ كەلدىك. سول قالادا جاتتىقتىرۋشى بولىپ جۇمىس ىستەيتىن, ىلگەرىدە قازاقستانداعى پرەمەر-ليگا كوماندالارى قۇرامىندا فۋتبول ويناعان ۋكراينا ازاماتى رومان پاحاليۋك ءبىزدى كۇتىپ الىپ, جول كورسەتتى. كريۆوي روگ قالاسىنا ءوز كولىگىمەن جەتكىزدى. ول كىسىگە ايتار العىسىمىز شەكسىز. سول جەردە «چەرۆوننىي بالكا» شاعىن ەلدى مەكەن ورتالىعىندا قارۋلاستار زيراتىنا جەرلەنگەن اتامىزعا ارناپ قۇران باعىشتادىق. قارۋلاستار زيراتىندا 20-دان اسا جاۋىنگەر جەرلەنگەن ەكەن. ەلدەن اپارعان ءبىر ۋىس توپىراقتى اتامنىڭ زيراتىنا سالدىق. ەلگە كەلگەن سوڭ, حامىتبەك اتامنىڭ ارۋاعىنا اس بەرىپ, اتام اينابەكتىڭ اماناتىن ورىندادىق.
ەندى سوعىستان قايتپاعان اتامنىڭ جاۋىنگەرلىك جولدارىن انىقتاپ, قاعازعا ءتۇسىرۋ جانە ۇرپاقتارىنا جەتكىزۋدى ماقسات ەتىپ وتىرمىن.
سەرجان اينابەكوۆ,
شىمكەنت قالاسىنىڭ مامانداندىرىلعان تەرگەۋ سوتىنىڭ توراعاسى
