ء«بىر اۋىل – ءبىر ءونىم» جوباسىنا بيىل وبلىس بويىنشا 42 ءوتىنىم قابىلداندى. قاتىسۋشىلاردىڭ باسىم بولىگى سەمەي قالاسىنان (34 ادام), قالعان 9-ى – اۋدانداردان. قاتىسۋشىلار تاماق ونەركاسىبى, ۇلتتىق ناقىشتاعى كيىم, قولونەر بۇيىمدارى, ساز جانە بىلعارى زاتتار, تابيعي سابىن, اعاشتان جاسالعان بۇيىمدار, بودەنە ەتى مەن جۇمىرتقاسى, شوپتەن دايىندالاتىن تۇنبالار باعىتىندا ءونىم ۇسىندى.
وبلىس اكىمى بەرىك ءۋالي ءىس-شارانىڭ اشىلۋىنا قاتىسىپ, بايقاۋ قاتىسۋشىلارىنا ساتتىلىك تىلەپ, كاسىپكەرلىكتى ءاردايىم قولداۋعا دايىن ەكەنىن جەتكىزدى.
– اباي وبلىسىنىڭ كاسىپكەرلەرى وسى بايقاۋعا جىل سايىن زور قىزىعۋشىلىقپەن قاتىسىپ كەلەدى. بيىل وڭىرىمىزدەن 13 كاسىپكەرلىك سۋبەكتىسى رەسمي تۇردە قاتىسۋشىلار تىزىمىنە ەندى. بۇل – وڭىرىمىزدە ساپالى ءونىم شىعارىپ وتىرعان كاسىپكەرلەر قاۋىمىنىڭ بەلسەندىلىگىن, جاۋاپكەرشىلىگىن ايقىن كورسەتەدى, – دەيدى ايماق باسشىسى.
قالا تۇرعىندارى مەن قوناقتارى كورمەنى ارالاپ, ءتۇرلى ازىق-ت ۇلىكتىڭ ءدامىن تاتىپ, ۇناعان تاۋارىن ساتىپ الدى. ال جوبا اياسىندا قاتىسۋشىلارعا كەڭەس بەرۋ, وقىتۋ, لوگوتيپ جاساۋ, ماركەتينگتىك قولداۋ كورسەتۋ جانە 5 ملن تەڭگەگە دەيىنگى گرانتقا قاتىسۋ مۇمكىندىگى ۇسىنىلعان.
– ءبىز ۇلتتىق تاعام ونىمدەرىن, سونىڭ ىشىندە ديەتالىق تاعامداردى شىعارامىز. باۋىرساق وندىرەمىز, ولار «كيريەشكيدىڭ» ورنىن باسا الادى. كورمەلەر مەن بايقاۋلارعا ءجيى قاتىسامىز, كومپانيامىز بۇكىل ەل كولەمىندە كەڭىنەن تانىمال. نارىققا شىققانىنا 15 جىلدان استام ۋاقىت بولدى. وسىنداي كورمەلەردىڭ ۇيىمداستىرىلعانى قۋانتادى. بۇل – قالا كاسىپكەرلەرىنە تاۋارىمىزدى كورسەتۋگە ۇلكەن مۇمكىندىك, – دەيدى «Adal as» Trade ساۋدا كومپانياسىنىڭ وكىلى كيريلل فلوروۆ.
«قازاقستاننىڭ ۇزدىك تاۋارى» وڭىرلىك بايقاۋ-كورمەسىندە 10-نان استام كاسىپكەرلىك سۋبەكتىسى باق سىنادى. كاسىپكەرلەر ونىمدەرىن «وندىرىستىك ماقساتتاعى ۇزدىك تاۋارلار», «حالىققا ارنالعان ۇزدىك تاۋارلار» جانە «ۇزدىك ازىق-ت ۇلىك تاۋارلارى» سىندى 3 نوميناتسيادا ۇسىندى. ساراپتامالىق توپ بارلىق قاتىسۋشىنىڭ ءونىمىن باعالاپ, ۇزدىكتەرىن ىرىكتەدى. ەكى جوبا بويىنشا ۇزدىك اتانعاندار استانا قالاسىندا وتەتىن رەسپۋبليكالىق كورمەگە جولداما الادى.
ايتا كەتەرلىگى, 2023 جىلى ايماقتىڭ «Uk Unis» جشس ش ۇلىق-توقىما فابريكاسى رەسپۋبليكالىق بايقاۋدا جەڭىمپاز اتانعان. 1 387 قاتىسۋشىنىڭ ىشىندە ۇزدىك توعىزدىققا ەنگەن اتالعان كاسىپورىن ءتورت جىل بويى «قازاقستاننىڭ ۇزدىك تاۋارى» بەلگىسىن قولدانۋ قۇقىعىنا يە بولدى.
اباي وبلىسى
