2010 جىلى قازاقستان مەن ءباا اراسىنداعى ۇكىمەتارالىق كەلىسىم نەگىزىندە قۇرىلعان «ADCB» يسلام بانكى – تمد كەڭىستىگىندەگى العاشقى يسلام بانكى. 15 جىل ىشىندە قارجى ينستيتۋتى ەلىمىزدەگى ءتۇرلى جوبالارعا 3 ملرد دوللاردان استام قاراجات سالعان. سولاردىڭ قاتارىندا اتىراۋداعى پوليەتيلەن وندىرەتىن زاۋىت (Silleno), ءاتموز بەن پمحز-دا سۋتەگى مەن ازوت ءوندىرۋ قوندىرعىلارى, تەمىرجول ينفراقۇرىلىمىن جاڭعىرتۋ سياقتى ءىرى جوبالار بار.
بانك سونداي-اق «دامۋ» قورىمەن بىرلەسىپ, ەكونوميكانىڭ باسىم سەكتورلارىنداعى كاسىپكەرلەرگە 25 ملرد تەڭگە باعىتتاعان. قور باسشىسى فارحات سارسەكوۆتىڭ ايتۋىنشا, بيزنەس تاراپىنان يسلامدىق قارجىلاندىرۋ قۇرالدارىنا قىزىعۋشىلىق جوعارى.
كەزدەسۋ بارىسىندا تاراپتار يسلام بانكينگىن قازاقستاننىڭ سالىق زاڭناماسىمەن ۇيلەستىرۋ جولدارىن جانە ىنتىماقتاستىقتى كەڭەيتۋ پەرسپەكتيۆالارىن تالقىلادى. ADCB وكىلدەرى بولاشاقتا قازاقستاندىق جوبالارعا قارجىلاندىرۋدى ۇلعايتۋدى جوسپارلاپ وتىرعاندارىن جەتكىزدى.
سەرىك جۇمانعارين بانككە اگروونەركاسىپ كەشەنى, اسىرەسە مال شارۋاشىلىعى باعىتىنا ينۆەستيتسيا قۇيۋدى ۇسىندى. سەبەبى قازاقستان تاياۋ شىعىس ەلدەرىنە جوعارى ساپالى ەت ونىمدەرىن تۇراقتى ەكسپورتتاپ كەلەدى ءارى بۇل نارىق پەرسپەكتيۆالى باعىت رەتىندە باعالانىپ وتىر.
