قالادا وتباسىنىڭ شىرقىن بۇزاتىندارمەن 4 داعدارىس ورتالىعى جۇمىس ىستەيدى. جىل باسىنان بەرى 712 ايەل ورتالىققا جۇگىنگەن. قازىر 135 انا, 278 بالا سول ورتالىقتى ۋاقىتشا پانالاپ وتىر. پوليتسيا 31 ايەل مەن 56 بالانى وسى ورتالىققا جەتكىزگەن. مەكەمە ماماندارى كۇيەۋلەرىنەن, اكەلەرىنەن ءزابىر كورگەن ايەلدەر مەن بالالارعا الەۋمەتتىك, پسيحولوگيالىق, قۇقىقتىق كومەك كورسەتەدى. مەگاپوليستەگى «باقىتتى جانۇيا» ورتالىعى دا ەكى جۇزدەن استام وتباسىعا قۇقىقتىق كەڭەس بەرگەن.
جاۋاپتى سالا ماماندارى وتباسىلىق زورلىق-زومبىلىقپەن كۇرەس شاراسىن كۇشەيتىپ جاتقاندارىن ايتادى. وسى ماقساتقا وراي شاھاردا تۇرمىستىق زورلىق-زومبىلىقتىڭ الدىن الۋ جۇمىستارى جىل باسىنان بەرى جالعاسىن تاۋىپ كەلەدى. ماسەلەن بۇگىنگە دەيىن مەكتەپتەردە وسى تاقىرىپقا قاتىستى كوپتەگەن سەمينارلار ۇيىمداستىرىلسا, جاستار رەسۋرستىق ورتالىعىنىڭ مۇشەلەرى «دوڭگەلەك ۇستەل» جيىندارىن وتكىزگەن. سونىمەن بىرگە بيىل ءساۋىر-ماۋسىم ايلارىندا «وتباسىندا زورلىق-زومبىلىقسىز قازاقستان» اكتسياسى اياسىندا جۇزگە جۋىق ءىس-شارا قولعا الىندى. ونىڭ ىشىندە ءتۇرلى دارىستەر, «دوڭگەلەك ۇستەل» جيىندارى, سەمينار, ترەنينگ پەن كونفەرەنتسيالار بار. سونداي-اق تۇرمىستىق زورلىق-زومبىلىق بويىنشا قاراعاندىدان باستالعان چەلەندج-فلەشموب شىمكەنتتە جالعاسىن تاۋىپ, رەسپۋبليكالىق دەڭگەيدە جوعارى باعاسىن الدى.
بۇدان بولەك, شىمكەنتتە وتباسىلىق كيكىلجىڭنەن تۋعان قىلمىستاردىڭ الدىن الۋ بويىنشا ۆەدومستۆوارالىق جۇمىس توبى قۇرىلعان. سونىڭ اياسىندا قالالىق پروكۋراتۋرا, دەنساۋلىق ساقتاۋ, جۇمىسپەن قامتۋ, سپورت جانە ءبىلىم باسقارمالارىنىڭ وكىلدەرى مەن ۇكىمەتتىك ەمەس ۇيىمدارى بىرلەسىپ, توقسان سايىن وسى تاقىرىپقا قاتىستى وزەكتى ماسەلەلەردى تالقىلايتىن جيىن وتكىزىپ تۇرادى.
شىمكەنت
