سۋرەتتى تۇسىرگەن – يۋري بەككەر
بەلارۋس ەلىنىڭ كورەرمەندەرى مەن قازىلار القاسىن ونەرىمەن ءتانتى ەتىپ, قازاقستاننىڭ ابىرويىن اسقاقتاتىپ كەلگەن تالانتتى ءانشىنى كەشە الماتى اۋەجايىنان فيلارمونيا ۇجىمى مەن وبلىس ارتىستەرى كوك تۋدى جەلبىرەتە, ءان-جىردان شاشۋ شاشىپ, سالتاناتپەن قارسى الدى. الماگۇل باتتاليەۆا – ت.جۇرگەنوۆ اتىنداعى ۇلتتىق ونەر اكادەمياسىنىڭ تۇلەگى, جەتىسۋ وبلىستىق فيلارمونياسىنىڭ بەتكەۇستار ءانشىسى. ايماقتىڭ مادەني شارالارىنا بەلسەندى اتسالىسىپ, ۆوكالدىق تۇرعىدان كۇردەلى حالىق اندەرىمەن بىرگە, الەمدىك جانە رەسەيلىك حيت اندەردى دە ورىنداپ, قۋاتتى داۋىسىمەن جانە حاريزماسىمەن كورەرمەن ىقىلاسىنا بولەنگەن جاس تالانت.
«بايقاۋ بارىسىندا قاتتى قوبالجىدىم. ەل نامىسىن قورعاۋ – ۇلكەن جاۋاپكەرشىلىك ءارى ۇلكەن مارتەبە. سەنىمدى اقتادىم دەپ ويلايمىن. سەبەبى ەلىمىزدە تالانتتى انشىلەر كوپ بولعاندىقتان, ۇلتتىق ىرىكتەۋدەن ءوتۋ وڭاي بولعان جوق. بۇل – قاتاڭ باسەكە, ال باسەكە بار جەردە, دامۋ بار. «سلاۆيان بازارىندا» Stevie Wonder-ءدىڭ الەمدىك حيت ءانى مەن اقتىق سىندا «ۆەچنوست» ءانىن ورىنداپ, جەڭىس تۇعىرىنان كورىندىم. مەن بۇل جەڭىسكە ۇزاق ءجۇرىپ جەتكەندەيمىن. سەبەبى ءاندى بالا كۇنىمنەن ايتامىن. مەنىڭ الدىمدا «كىم بولامىن؟ قانداي ماماندىققا قول ارتامىن؟» دەگەن سۇراق تۇرعان ەمەس. ويتكەنى كىشكەنتاي كەزىمنەن ءانشى بولاتىنىمدى ءبىلدىم. بيىلعى «سلاۆيان بازارى-2025-تە» تۋىمىزدى جەلبىرەتكەنىمە قۋانامىن», دەيدى الماگۇل باتتاليەۆا.
ءۇش كۇنگە سوزىلعان حالىقارالىق ءان دوداسىنىڭ جەڭىمپازدارى: 1-ورىن بەلارۋس ەلىنىڭ ءانشىسى ۆالەريا بەرناتوۆيچكە تابىستالىپ, 2-ورىندى ارمەنيا ءانشىسى داۆيد كيراكوسيان مەن يتاليادان دومەنيكو باربەار ءبولىستى. 3-ورىندى رەسەيلىك ەريك احمەتوۆ پەن قىرعىزستاننان كەلگەن رىسكەلدى ستاربەكوۆ يەلەندى.
الەمنىڭ كوپتەگەن تالانتىنىڭ باعى مەن جولىن اشقان مارتەبەلى بايقاۋدا ونەر كەرسكەتكەن الماگۇل باتتاليەۆا كاسىبي دارالىعى مەن تاباندىلىعىنىڭ ارقاسىندا ءالى تالاي الەم ساحنالارى تورىنەن ءان شىرقاپ, ۇلت ابىرويىن اسقاقتاتاتىنىنا سەنىمدى.
الماتى
