سۋرەت: zdrav.expert
مامانداردىڭ ايتۋىنشا, 62 جاستاعى ناۋقاس بىرنەشە اي بويى باسىنىڭ سول جاق بولىگىندەگى ىسىكتەن زارداپ شەككەن. وڭ قولى مەن اياعى سىزداتىپ, جانىنا تىنىشتىق بەرمەگەن. توقتاۋسىز مازالاعان باس اۋرۋى اقىرى دارىگەرلەردىڭ الدىنا اپارىپتى.
جۇمىسىنا جاۋاپكەرشىلىكپەن قارايتىن دارىگەرلەر ناۋقاستى جەدەل ماگنيتتىك-رەزونانستىق توموگرافيادان وتكىزىپ, ونوسكرينينگ جاساعان. ناتيجەسىندە, كولەمى 6ح6 قۇرايتىن, مي قۇرىلىمدارىنا قىسىم كەلتىرگەن ءارى ساماي سۇيەگىن زاقىمداعان قاۋىپتى ىسىكتى انىقتاعان. ءىرى ىسىك باس سۇيەككە قىسىم كەلتىرىپ قانا قويماي, مي تىندەرىنە دەيىن ءوتىپ, قان تامىرلارىمەن تىعىز بايلانىسىپ كەتكەن. وپەراتسيا جاساۋ ايتارلىقتاي قيىن, قان كەتۋ قاۋپى جوعارى بولسا دا, گيپپوكرات انتىنا بەرىك ماماندار تاۋەكەلگە بەل بۋىپتى.
نەيروحيرۋرگ ماماندار ەركەبۇلان مەركىبەكوۆ پەن بولات كەڭشىلىكتىڭ ايتۋىنشا, كۇردەلى وپەراتسيانى جاساۋ جۇمىسى ەكى كەزەڭدى قامتىعان. باستاپقى كەزەڭدە دارىگەرلەر ينۆازيۆ ءتاسىلىن قولداندى. ۇتىمدى ءادىستى قولدانۋدىڭ ناتيجەسىندە, سان ارتەرياسى ارقىلى ميعا جەتىپ, ىسىكتى قورەكتەندىرىپ تۇرعان قان تامىرلارىن بىتەپ, وپەراتسيا كەزىندەگى قان كەتۋ قاۋپى بارىنشا ازايتىلدى.
كۇردەلى وپەراتسيانىڭ نەگىزگى بولىگىن تاجىريبەلى ماماندار نۇرجان ايتىمبەتوۆ پەن الماز قۇرالباەۆ اتقاردى. سىرقاتتىڭ ساماي سۇيەگىن اشىپ, ىسىكتى تولىق الىپ تاستادى. سونداي-اق قاتتى مي قاباتىنا پلاستيكالىق تۇزەتۋ ەنگىزدى. ءۇش ساعاتقا سوزىلعان وپەراتسيا ءساتتى اياقتالىپ, ناۋقاستىڭ ماڭىزدى مي قۇرىلىمدارىنا زاقىم كەلگەن جوق.
«دەر كەزىندە جاسالعان كۇردەلى وپەراتسيا ءساتتى ءوتتى. وپەراتسيادان كەيىن ناۋقاستىڭ جاعدايى جەدەل وڭالدى. باس اۋرۋى باسىلىپ, وڭ جاق قول-اياعىنداعى السىزدىك توقتادى. ناۋقاس ءوز بەتىنشە ءجۇرىپ-تۇراتىن بولدى. قازىرگى كەزدە جاعدايى تۇراقتى. امبۋلاتوريالىق باقىلاۋمەن ۇيىنە شىقتى. مۇنداي كۇردەلى وپەراتسيانى ويداعىداي جاساۋ – كوماندالىق جۇمىستىڭ ناتيجەسى», دەيدى ماماندار.
وپەراتسيا الەۋمەتتىك مەديتسينالىق ساقتاندىرۋ اياسىندا تەگىن جاسالدى. جالپى, مۇنداي ساناتتاعى وپەراتسيا شۇعىل جاعدايدا مەملەكەت كەپىلدىگىمەن دە اقىسىز جاسالادى. ميعا جاسالاتىن كۇردەلى وپەراتسيا ءۇشىن ەندى ەلورداعا بارۋدىڭ قاجەتى جوق. ويتكەنى وڭىردە جوعارى تەحنولوگيامەن قامتىلعان نەيروحيرۋرگيالىق كومەك قولجەتىمدى. بىلىكتى دارىگەرلەر مەن زاماناۋي مەديتسينالىق قۇرالداردىڭ ارقاسىندا بۇرىن ورتالىقتا عانا جاسالاتىن وپەراتسيالار ەندى وڭىردە دە قولعا الىنىپ جاتىر.
تاراز
