ايتا كەتەيىك, 2019 جىلى نەگىزى قالانعان Comic Con Astana از ۋاقىتتا ورتالىق ازياداعى ەڭ ءىرى گيك جانە پوپ-مادەنيەت فەستيۆالىنە اينالىپ, الەمنىڭ تۇكپىر-تۇكپىرىنەن كەلگەن جانكۇيەرلەر مەن كرەاتورلاردى ءبىر الاڭدا توعىستىردى.
− Comic Con Astana فەستيۆالىنە 75 مىڭنان استام بىرەگەي كەلۋشى تىركەلىپ, جالپى قاتىسۋلار سانى 120 مىڭنان استى. بەس كۇنگە سوزىلعان شارادا كورەرمەندەر سانى كۇن سايىن ارتىپ وتىردى: ءبىرىنشى كۇنى – 13,5 مىڭ, ەكىنشى كۇنى – 15,5 مىڭ, ءۇشىنشى كۇنى – 14,5 مىڭ, ءتورتىنشى كۇنى – 19,5 مىڭ جانە سوڭعى كۇنى – 12,2 مىڭ ادام كەلدى. بيىلعى فەستيۆالدىڭ ەرەكشەلىگى – ءىس-شارا العاش رەت بىردەن ەكى اۋقىمدى الاڭدا: «استانا ارەنا» مەن «بارىس ارەنادا» قاتار ۇيىمداستىرىلدى. بۇل شەشىم شارا اۋقىمىن ايتارلىقتاي كەڭەيتىپ, كەلۋشىلەرگە ەرەكشە اسەر مەن جايلى جاعداي ۇسىنۋعا مۇمكىندىك بەردى, − دەيدى ۇيىمداستىرۋشىلار.
Comic Con Astana جىل سايىن قوناقتار سانى, حالىقارالىق جۇلدىزدار جانە ەكونوميكالىق اسەرى بويىنشا ءوسىپ كەلەدى. ءتۋريستىڭ قالاداعى ءبىر كۇندىك ورتاشا شىعىنى 118 مىڭ تەڭگەنى قۇرايدى, ال ولاردىڭ ورتاشا ساپار ۇزاقتىعى – 3 كۇن. وسىلايشا, شەتەلدىك قوناقتاردىڭ كەلۋى ارقىلى ەلوردا مەن جالپى ەل ەكونوميكاسىنا 3,5 ميلليارد تەڭگەدەن استام ءتۇسىم تۇسەدى دەپ بولجانعان. بۇل مۇنداي اۋقىمدى شارالاردىڭ قازاقستاننىڭ مادەني جانە ەكونوميكالىق دامۋىنا ۇلكەن ۇلەس قوساتىنىن كورسەتەدى.
Comic Con Astana-2025 فەستيۆالىنىڭ باستى حەدلاينەرلەرى قاتارىندا ەندي سەركيس («ساقينالار ءامىرشىسى», «مايمىلدار پلانەتاسى», «بەتمەن»), ەساي مورالەس («وزارك», «ميسسيا نەۆىپولنيما»), سكوتت ەدكينس («نەوسپوريمىي» فيلمدەرىنىڭ جالعاسى, «دوكتور سترەندج») بولدى.
ارنايى شاقىرىلعان قوناقتار قاتارىندا «بۋماجنىي دوم» سەريالىن تۇسىرگەن رەجيسسيور ميگەل انحەل ۆيۆاس, «گويا» ماراپاتىنىڭ بەس بىردەي سالتاناتتى ءراسىمىن ۇيىمداستىرعان پروديۋسەر ەميليو ا. پينا, تانىمال ۆيدەوبلوگەرلەر Marmok, Qewbite, ناستيا دجەكسون, انتون ميلس جانە الەمگە ايگىلى كوسپلەي شەبەرلەرى يايا حان مەن Cinderys جانە باسقا دا كوپتەگەن جۇلدىزدار بار.
فەستيۆال اياسىندا قازاقستان مەن يسپانيانىڭ العاشقى بىرلەسكەن حالىقارالىق جوباسى – ء«بىتىم» (La Tregua) ءفيلمىنىڭ تانىستىرىلىمى ءوتتى. بۇل جوبا Netflix سەكىلدى جاھاندىق ستريمينگ پلاتفورماسىنا جانە حالىقارالىق پروكاتقا ارنالعان.
اۆتورلار اللەياسىندا جانە جارمەڭكە ايماعىندا 150-دەن استام قازاقستاندىق سۋرەتشى مەن قولونەرشى ءوز جۇمىستارىن ۇسىندى. ولار – ءتۇرلى جانرلاردا ەڭبەك ەتەتىن جاس تالانتتار. Comic Con Astana جاس سۋرەتشىلەر, كوميكس اۆتورلارى, انيماتورلار, ديزاينەرلەر مەن ويىن ازىرلەۋشىلەر ءۇشىن ۇلكەن مۇمكىندىكتەرگە جول اشاتىن پلاتفورما رەتىندە ءوزىن كورسەتتى, سەبەبى ولار وسى جەردە ءوز اۋديتورياسىن, سەرىكتەستەرىن جانە ينۆەستورلارىن تابا الادى.
فەستيۆال باعدارلاماسى دا مازمۇندى بولدى. قوناقتار جۇلدىزدارمەن اۆتوگراف-سەسسيالارعا جانە Q&A كەزدەسۋلەرىنە, گيك-جارمەڭكەلەر مەن مەرچ-زونالارعا, شەبەرلىك ساعاتتارىنا, ازيالىق پوپ-مادەنيەت ايماعىنا, گەيم-ايماققا, سونداي-اق جۇزدەگەن فان-اكتيۆتى شارالارعا قاتىسا الدى. باستى ساحنادا شامامەن 200 دارىندى كوسپلەەر قاتىسقان حالىقارالىق بايقاۋ ءوتتى. جۇلدە قورى – 15 ميلليون تەڭگە. بۇل Comic Con Astana فەستيۆالىنىڭ تمد كەڭىستىگىندەگى ەڭ ءىرى كوسپلەي الاڭدارىنىڭ ءبىرى ەكەنىن تاعى دا دالەلدەدى.
Comic Con Astana – ايماقتاعى ەڭ ءىرى گيك-فەستيۆال عانا ەمەس, تۋريزم مەن قالالىق بيزنەستى دامىتۋ قۇرالى, قازىرگى جاستار مادەنيەتىن كەڭ اۋديتورياعا تانىتۋدىڭ ءتاسىلى, ءارى ءارتۇرلى ۇرپاقتاردى بىرىكتىرەتىن كوپىر.
− Comic Con-عا كەلۋشىلەر كوبىنەسە وتباسىمەن كەلەدى. بۇل – اتا-انالارعا بالالارىنىڭ قىزىعۋشىلىقتارىن ءتۇسىنىپ, سول مادەنيەتتى بىرگە سەزىنۋگە مۇمكىندىك بەرەدى. ءبىزدىڭ فەستيۆال – جاستار مادەنيەتىن كوپشىلىككە تانىستىرۋدىڭ جولى. سونىمەن قاتار, جاس اۆتورلار مەن كرەاتورلارعا ءوزىن كورسەتۋگە مۇمكىندىك الاڭى. اتا-انالار ءۇشىن بۇل – بالالاردىڭ نەنى ۇناتاتىنىن كورۋدىڭ, ولاردىڭ قىزىعۋشىلىقتارىمەن ورتاقتاسۋدىڭ جولى», – دەيدى فەستيۆالدىڭ باس پروديۋسەرى ناتاليا ابراشكينا.
الدىن الا باعالاۋ بويىنشا, Comic Con Astana-2025 فەستيۆالىنىڭ جالپى مەديالىق قامتۋى 200 ميلليون ادامنان استى. بۇل استانانىڭ ەۋرازياداعى كرەاتيۆتى استانا رەتىندەگى بەدەلىن تاعى ءبىر مارتە دالەلدەدى. قالا پوپ-مادەنيەت جانكۇيەرلەرى ءۇشىن الەمدىك تارتىلىس ورتالىعىنا اينالىپ كەلەدى.
