مۋزەيگە كىرگەن ساتتەن-اق كوزدىڭ جاۋىن الاتىن مينەرالدار الەمى قارسى الادى. ەكسپوزيتسيادا كريستالدار, مينەرالدار, باعالى مينەرالداردىڭ, تاۋ جىنىستارى مەن پالەونتولوگيالىق قالدىقتاردىڭ بىرەگەي ۇلگىلەرى بار. بۇل جادىگەرلەر تابيعاتتىڭ شەكسىز قۇدىرەتىن كورسەتىپ, عىلىم مەن ونەردىڭ ۇندەستىگىن تانىتادى.
مۋزەيدە سيرەك كەزدەسەتىن مينەرالداردى, ءتۇرلى گەولوگيالىق داۋىرلەرگە تيەسىلى تاۋ جىنىستارىن, باعالى جانە جارتىلاي باعالى تاستاردى, جارقىراعان اسىل بۇيىمداردى تاماشالاۋعا بولادى. ەڭ ەرەكشە جادىگەرلەردىڭ ءبىرى – مەندەلەەۆ كەستەسىندەگى بارلىق ەلەمەنتى بار مينەرالدار توپتاماسى. سونداي-اق مۇراجاي سورەلەرىنەن پالەونتولوگيالىق قالدىقتاردى, ءحىح عاسىردان بەرى ساقتالعان سيرەك گەولوگيالىق كىتاپتاردى, وتكەن عاسىرلاردا قولدانىلعان دالا گەولوگتەرىنىڭ قۇرال-سايماندارىن كورۋگە بولادى. بۇل جادىگەرلەر ءبىر كەزدەرى جەر قويناۋىن زەرتتەگەن عالىمداردىڭ ىزدەنىستەرىنەن سىر شەرتەدى.
ولجاباي جۇماعالي ۇلىنىڭ ايتۋىنشا, مۋزەيگە جىل سايىن مىڭداعان ادام كەلەدى. ولاردىڭ قاتارىندا شەتەلدىك تۋريستەر, عىلىمي زەرتتەۋ ورتالىقتارىنىڭ ماماندارى, دەپۋتاتتار, سونداي-اق مادەنيەت جانە اقپارات, عىلىم جانە جوعارى ءبىلىم مينيسترلەرى دە بار. دەگەنمەن مۋزەيدىڭ باستى قوناقتارى – مەكتەپ وقۋشىلارى, كوللەدج ستۋدەنتتەرى جانە جوعارى وقۋ ورىندارىنىڭ جاستارى. مۋزەيدى سالعانداعى باستى وي – بالالار كەلىپ كورسىن, وقىسىن, ەرتەڭ گەولوگ ماماندىعىنا قىزىعىپ, ەلدىڭ بايلىعىن قالاي ىزدەۋ كەرەگىن ءبىلسىن دەگەن نيەت. بۇل جاس ۇرپاقتىڭ تابيعاتقا, عىلىمعا دەگەن سۇيىسپەنشىلىگىن وياتىپ, تۋعان جەردىڭ بايلىعىن باعالاۋعا ۇيرەتەدى. مۇنداعى ءاربىر مينەرال مەن تاۋ جىنىسى – وتانىمىزدىڭ سان عاسىرلىق گەولوگيالىق تاريحىنىڭ ءبىر بولشەگى جانە بايلىعىمىزدىڭ كورىنىسى.
بۇگىنگى تاڭدا مينەرالوگيالىق مۋزەيدە ءۇش مىڭنان استام ەكسپونات بار. بۇل سان جىل سايىن ارتىپ كەلەدى. عالىمدار جەر قويناۋىنداعى پايدالى قازبالاردىڭ ءبىر كۇنى سارقىلاتىنىن ايتادى. سوندىقتان مۇنداي مۇراجايلار مينەرالداردىڭ سيرەك ۇلگىلەرىن ساقتاپ قالۋعا, ولاردى بولاشاق ۇرپاققا مۇرا ەتىپ جەتكىزۋگە مۇمكىندىك بەرەدى. مۋزەي – عىلىمي ورىن عانا ەمەس, سونداي-اق ەلىمىزدىڭ بايلىعىن كورسەتەتىن رۋحاني جانە مادەني ورتالىق. ونىڭ ءاربىر تاسى – جەر قويناۋىنداعى سان الۋان بايلىقتىڭ ايعاعى. مۇراجاي كەلۋشىلەرگە تابيعاتتىڭ عاجايىپ سىرىن اشىپ قانا قويماي, تۋعان جەرگە دەگەن سۇيىسپەنشىلىكتى ارتتىراتىن ەرەكشە ورىن بولىپ قالا بەرمەك.
الايدا مۋزەيدىڭ قازىرگى عيماراتى تار جانە ەكسپوزيتسيالاردى تولىق كورسەتۋگە مۇمكىندىك بەرمەيدى. ولجاباي جۇماعالي ۇلى بىرنەشە رەت مەملەكەت تاراپىنان قولداۋ كورسەتۋ تۋرالى ءوتىنىش بىلدىرگەنىمەن, ءالى كۇنگە دەيىن ناقتى جاۋاپ الماعان. مۋزەيگە كەڭ عيمارات قاجەت, بۇل ماسەلە بويىنشا مەملەكەت باسشىسى تاپسىرما بەرگەنىمەن, ءالى ورىندالماعان. بۇل مۋزەيدىڭ دامۋىنا جانە كەلۋشىلەرگە قولايلى جاعداي جاساۋعا كەدەرگى كەلتىرىپ وتىر.
مينەرالوگيالىق مۋزەي – ەلىمىزدىڭ مادەني جانە عىلىمي مۇراسىنىڭ ماڭىزدى بولىگى. ونىڭ ساقتالۋى مەن دامۋى ءۇشىن مەملەكەت تاراپىنان قولداۋ كورسەتۋ قاجەت. بۇل بولاشاق ۇرپاققا تابيعات عاجايىپتارىن تانىپ-بىلۋگە مۇمكىندىك بەرەتىنىنە سەنىمدىمىن.
ەرلان كيىكباي,
جۋرناليست
