«دارىن» رەسپۋبليكالىق عىلىمي-پراكتيكالىق ورتالىعى ۇيىمداستىرعان بۇل سايىس وسىمەن قاتارىنان 22 جىل ءوتىپ وتىر. قازاقتىڭ دارىندى بالالارىن انىقتاۋ جانە الەۋمەتتىك-قۇقىقتىق قورعاۋ, ءتىلدى, ادەبيەتتى, تاريحتى ۇيرەنۋگە ىنتالاندىرۋ, قازاق حالقىنىڭ مادەنيەتىنە قىزىعۋشىلىقتى ارتتىرۋ ماقساتىن كوزدەيتىن ءىس-شاراعا قىتاي, موڭعوليا, تۇرىكمەنستان, قىرعىزستان, وزبەكستان جانە رەسەيدەن كەلگەن 40-تان استام وقۋشى جينالدى.
زياتكەرلىك سايىستىڭ نەگىزىن قالاۋشىلاردىڭ ءبىرى – ارداگەر جۋرناليست سۇلەيمەن مامەت 1996 جىلى مەملەكەت باسشىسىنىڭ تاپسىرماسى بويىنشا شەتەلدىك قازاقتاردى قولداۋ ماقساتىندا ارنايى شەشىم قابىلدانعانىن ەسكە سالدى. ول كەزدە كوپتەگەن قانداسىمىز تاريحي وتانىنا ورالۋعا مۇمكىندىك الا باستاعان.
– بۇل وليمپيادا – شەتەلدە تۇراتىن وتانداستارىمىزعا رۋحاني كوپىر بولا بىلگەن مادەني-اعارتۋشىلىق باستاما. 22 جىل ىشىندە عىلىم دوكتورلارى, مۇعالىمدەر, ديپلوماتتاردىڭ بىرنەشە ۇرپاعى ءوسىپ-جەتىلدى. ولار حالىقتار دوستىعىنا قىزمەت ەتىپ ءجۇر. جىل سايىن بالالاردىڭ ءبىلىم دەڭگەيى مەن انا تىلىنە دەگەن شىنايى سۇيىسپەنشىلىگى مەنى ءتانتى ەتەدى. بيىل قاتىسۋشىلاردىڭ ءبىرى اجەسىنىڭ سالەمىن جەتكىزىپ, ءشامشى قالداياقوۆتىڭ اندەرىن ورىندادى. ەسسە جازۋ كەزىندە جاستار ەڭ الدىمەن اتا جۇرتى – قازاقستانعا دەگەن ماحابباتىن ءبىلدىردى, – دەيدى سۇلەيمەن مامەت.
جاس شامالارى 14 پەن 18 جاس ارالىعىن قامتىعان ورەندەر وليمپيادانىڭ بىرنەشە كەزەڭىن وتكەردى. ونىڭ العاشقىسىندا ەسسە جازسا, ودان كەيىن «تاريحي تانىم» تاقىرىبىنداعى زەرتتەۋ جوبالارىن قورعاپ, «ۇلتىمدى سۇيەمىن» تاقىرىبىندا كوركەم تانىستىرىلىم ازىرلەدى. سوڭعىسى مۋزىكالىق, پوەتيكالىق نەمەسە تەاترلاندىرىلعان قويىلىم تۇرىندە ۇسىنىلدى
قىرعىز ەلىنەن كەلگەن ارۋجان ءابۋلازيز قازاق جانە قىرعىز تىلدەرىنىڭ ۇقساستىعىنا قاراماستان, انا تىلىنە دەگەن قىزىعۋشىلىعى باسەڭدەمەيتىنىن ايتتى.
– ەسسە كەزەڭىندە ماعان «سۇيىكتى قالام» تاقىرىبى ءتۇستى. مەن بىشكەك پەن الماتى تۋرالى جازدىم. بۇل شاھارلار جانىما جاقىن. قازاق ءتىلىن ۇيدە عانا ۇيرەنەمىن, وتباسىمىز تۇگەلدەي انا تىلىمىزدە سويلەيدى. انام, اكەم جانە اجەم كوپ كومەكتەسەدى. پاۆلودارعا العاش كەلدىم. ەرتىس وزەنىندە قايىقپەن سەرۋەندەپ, جاعالاۋدى ارالاپ, دوستىق ۇيىنە باردىق, – دەيدى ول.
جەڭىمپازدار مەن جۇلدەگەرلەر وقۋ-اعارتۋ مينيسترلىگىنىڭ I, II, III دارەجەلى ديپلومدارىمەن جانە «دارىن» رەسپۋبليكالىق عىلىمي-پراكتيكالىق ورتالىعىنىڭ گراموتالارىمەن ماراپاتتالدى. ەڭ ۇزدىك قاتىسۋشىلار ءا.مارعۇلان اتىنداعى پەداگوگيكالىق ۋنيۆەرسيتەتتىڭ ءبىلىم بەرۋ گرانتتارىنا يە بولدى. سونىمەن قاتار وبلىس اكىمى اتىنان بارلىق قاتىسۋشىعا دومبىرالار تابىستالدى.
«ەرتىس دارىنى» وڭىرلىك قوسىمشا ءبىلىم بەرۋ وقۋ-ادىستەمەلىك ورتالىعىنىڭ ديرەكتورى ازامات شايمۇرات وليمپيادا ماقساتى – جەر بەتىندە تارىداي شاشىراپ كەتكەن قازاق بالالارىنىڭ باسىن قوسىپ, انا تىلدەرىن مەڭگەرتۋ ەكەنىن ايتادى.
– «دارىن» رەسپۋبليكالىق ورتالىعى وكىلدەرىنىڭ ايتۋىنشا, بۇل وليمپيادا تاريحىندا بالالاردىڭ ەستەرىندە قالاتىنداي ەرەكشە سىيلىق جاساعان پاۆلودار ءوڭىرى. وبلىس اكىمىنىڭ اتىنان بارلىق قاتىسۋشىعا دومبىرا سىيعا بەرىلدى. بالالارعا ەرتىس ۇستىندە تەپلوحودپەن ساياحات ۇيىمداستىرىلدى. سونداي-اق «الماس قىلىش» ءفيلمىن كورسەتتىك. وسىمەن اتالعان وليمپيادا ەرتىس-بايان وڭىرىندە ەكىنشى رەت تابىستى ءوتتى, – دەيدى ول.
پاۆلودار وبلىسى
