280 ورىندىق بالاباقشانىڭ قۇرىلىسى 2025 جىلدىڭ اقپان ايىندا باستالعان. بۇگىنگى تاڭدا قۇرىلىستىڭ شامامەن 40 پايىزى اياقتالدى. نىسان بيىل جەلتوقساندا اياقتالادى دەپ جوسپارلانعان. جالپى قارجىلاندىرۋ 1,9 ملرد تەڭگەنى قۇرايدى.
«مەملەكەتكە قايتارىلعان قاراجات قوعام يگىلىگىنە جۇمسالۋى كەرەك. بۇل – «اماNات» پارتياسىنىڭ ىرگەلى ۇستانىمى. ءبىز قاعاز جۇزىندەگى باقىلاۋمەن شەكتەلمەيمىز, ءار تەڭگە ماقساتتى جۇمسالىپ جاتقانىنا كوز جەتكىزۋ ءۇشىن قۇرىلىس الاڭدارىنا ءوزىمىز بارامىز. پەتروپاۆلدا جاز مەزگىلى قىسقا ەكەنىن ەسكەرگەنىمىز ءجون. ەگەر الداعى ەكى ايدا جۇمىستى جىلدامداتپاساق, مەردىگەرلەر ماۋسىمدىق شەكتەۋلەرگە تاپ بولۋى مۇمكىن. سوندىقتان كۇزگە دەيىن نەگىزگى قۇرىلىس تسيكلىن اياقتاۋ ماڭىزدى», دەدى د.كولودا.
ول بۇعان دەيىن وڭىردە وسىنداي نىسانداردىڭ قۇرىلىسى كەزىندە كەشىگۋ بولىپ, اۋا رايىنىڭ سالقىنداۋىنا بايلانىستى مەردىگەرلەر ماڭىزدى كەزەڭدەردى اياقتاي الماي قالعانىن ەسكە سالدى. دەپۋتاتتىڭ ايتۋىنشا, بيىل مۇنداي جاعدايعا جول بەرۋگە بولمايدى.
«الەۋمەتتىك نىسانداردى سالۋ كەزىندە ءبىز تەك مەرزىمى مەن ساپاسىنا عانا ەمەس, سمەتالىق قۇجاتتامانىڭ قۇرامىنا دا ءمان بەرۋىمىز قاجەت. سالىنعان ءار تەڭگە ۇلتتىق ەكونوميكاعا پايدا اكەلۋگە ءتيىس. وتاندىق قۇرىلىس ماتەريالدارىن, جەرگىلىكتى كاسىپورىنداردىڭ ونىمدەرىن پايدالانۋ – بۇل جاي عانا بيزنەستى قولداۋ ەمەس, ول – جاڭا جۇمىس ورىندارى, سالىق تۇسىمدەرى, وڭىرلەرىمىزدىڭ دامۋى. مۇنداي ءتاسىل «مەملەكەت – بيزنەس – قوعام» تۇراقتى تىزبەگىن قالىپتاستىرادى», دەدى ە.مامبەتوۆ.
دەپۋتاتتار قازىر سولتۇستىك قازاقستان وبلىسىندا ءبىلىم بەرۋ ينفراقۇرىلىمىنا ەرەكشە كوڭىل ءبولىنىپ جاتقانىن اتاپ ءوتتى. «اماNات» پارتياسىنىڭ سايلاۋالدى باعدارلاماسى اياسىندا وبلىستا بيۋدجەتكە قايتارىلعان قاراجات ەسەبىنەن 33 الەۋمەتتىك-كوممۋنالدىق ينفراقۇرىلىمدىق جوبا جۇزەگە اسىرىلۋدا, ونىڭ ىشىندە بالاباقشالار, مەكتەپتەر, سپورت جانە مەديتسينالىق نىساندار بار.
