2025 جىلدىڭ العاشقى بەس ايىندا قورعا بارلىعى 10 363 شاعىم ءتۇستى, ولاردىڭ 5 073-ءى قايتارىلىپ الىندى. كورسەتكىش 2024 جىلدىڭ وسى كەزەڭىمەن سالىستىرعاندا 11,7%-عا تومەن. بىلتىر 11 745 شاعىم تىركەلگەن ەدى (5 167-ءسى قايتارىلعان).
«ازاماتتاردىڭ شاعىمدارىن ازايتۋ, مەديتسينالىق قىزمەت ساپاسىن جاقسارتۋ باعىتىنداعى جۇمىستار ارقىلى وڭ ناتيجەگە قول جەتكىزىلدى. وسى ماقساتتا قور مەديتسينالىق ۇيىمدار بازاسىنداعى پاتسيەنتتەردى قولداۋ قىزمەتتەرىمەن بىرلەسىپ جۇمىس ىستەيدى. بۇل قىزمەتتەردىڭ ماماندارىنىڭ كاسىبي دەڭگەيىن ارتتىرۋعا اي سايىن وقىتۋ سەسسيالارىن ۇيىمداستىرادى», – دەدى الەۋمەتتىك مەديتسينالىق ساقتاندىرۋ قورى باسقارما توراعاسىنىڭ ورىنباسارى ينديرا ساركەنوۆا.
وقىتۋلار بەدەلدى باسقارۋ (رەپۋتاتسيالىق مەنەدجمەنت), ەتيكا جانە دەونتولوگيا, مەديتسينا قىزمەتكەرلەرىنىڭ ار-نامىس كودەكسى سىندى نەگىزگى باعىتتاردى قامتيدى. سەسسيا بارىسىندا ناقتى كەلىپ تۇسكەن شاعىمدار تالدانىپ, قارالادى. بۇل تەوريالىق ءبىلىمدى تاجىريبەدە قولدانۋعا, سونداي-اق حالىق تاراپىنان سەنىمدى ارتتىرۋعا مۇمكىندىك بەرەدى. حالىقپەن كەرى بايلانىستى كۇشەيتۋ, مەديتسينالىق كومەكتىڭ ساپا ستاندارتتارىن ارتتىرۋ جۇمىستارى جالعاسا بەرەدى.
