باسقار ۋنيۆەرسيتەتتە جۇرگەندە ءوزىن بولاشاعى ۇلكەن سىقاقشى-ساتيريك رەتىندە تانىتىپ, شىعارماشىلىق بيىكتەن كورىندى. ءسوز ونەرىندە العا سۋىرىلىپ شىعىپ, «قۇنى جوق ادام» اتتى تۋىندىسى ءۇشىن باۋبەك بۇلقىشەۆ اتىنداعى جاستار سىيلىعىنىڭ لاۋرەاتى اتاندى. 1980–1990 جىلدارى اتاعى دۇركىرەپ تۇرعان «تاماشا» ءازىل-سىقاق تەاترىنىڭ بەلسەندى اۆتورىنا اينالدى.
ونىڭ قايراتكەرلىگى تۋرالى ارىپتەستەرى ءاردايىم تەبىرەنە اڭگىمە قوزعايدى. ۇلتجاندى جۋرناليست 1986 جىلعى جەلتوقسان كوتەرىلىسى كەزىندە جازىقسىز جاپا شەككەن قازاق جاستارىنا قورعان بولدى. ادىلدىك پەن اقيقات ءۇشىن كۇرەستى.
جازعانىنان جازارى كوپ تالانتتى قالامگەر جامبىل وبلىسى تۇرار رىسقۇلوۆ اۋدانىنداعى كوكدونەن اۋىلىنىڭ تۋماسى. اۋدان ورتالىعى – لۋگوۆوي سەلوسىنىڭ ەجەلگى اتاۋى – قۇلانتاۋدىڭ قايتارىلۋىنا باسقار بيتانوۆتىڭ سىڭىرگەن ەڭبەگى وراسان.
كوزدەن كەتسە دە, كوڭىلدەن كەتپەيتىن اسىل ازاماتتىڭ ەسىمى – ەل ەسىندە, حالىق جادىندا. باسقاربەك بيتانوۆ دۇنيەدەن وزعان سوڭ, تۋعان اۋىلى – كوكدونەن اۋىلىنداعى كوشەنىڭ بىرىنە قالامگەردىڭ اتى بەرىلدى. اۋدان ورتالىعى – قۇلانتاۋ اۋىلىنداعى مادەنيەت ۇيىندە باسقاربەك بيتانوۆ اتىنداعى ءازىل-سىقاق تەاترى جۇمىس ىستەيدى.
جۋىردا بۇقارالىق اقپارات قۇرالدارى قىزمەتكەرلەرىنىڭ مەرەكەسى قارساڭىندا كوكدونەن اۋىلىندا باسقاربەكتىڭ بالالىق, جاستىق شاعى وتكەن ۇيگە مەموريالدىق ەسكەرتكىش تاقتا ورناتىلدى. يگى ءىس-شاراعا استانا, الماتى, تارازدان كەلگەن جازۋشى-جۋرناليستەر, تۇرار رىسقۇلوۆ اۋدانىنىڭ زيالى قاۋىمى, اۋىل تۇرعىندارى قاتىستى. وسى كۇنى ومىردەن ەرتە وزعان, بىراق ۇلكەن ىستەر تىندىرىپ كەتكەن باسقاربەك بيتانوۆتىڭ رۋحىنا ارنالىپ, قۇران باعىشتالدى.
ءيا, «جاقسىنىڭ اتى ولمەيدى» دەگەن وسى بولسا كەرەك.
دوقتىرحان تۇرلىبەك,
جازۋشى, قازاقستاننىڭ ەڭبەك سىڭىرگەن قايراتكەرى
