سۋرەت: qazdauiri.kz
سونداي-اق بۇل اقپارات تاراتۋمەن عانا شەكتەلمەيدى, سونىمەن قاتار قوعامدا اكادەميالىق ويلاۋ مادەنيەتىن قالىپتاستىرىپ, فەيك اقپاراتپەن كۇرەسۋگە باعىتتالعان. الايدا, وكىنىشكە قاراي, جۋرناليستيكا عىلىم رەتىندە ءالى كۇنگە دەيىن تولىق مويىندالماي كەلەدى. بۇل – قازىرگى مەديا كەڭىستىكتەگى ۇلكەن ولقىلىقتىڭ ءبىرى.
وسى ماسەلەگە بەيجاي قاراماعان جاستار ەلىمىزدە جاڭا باستاما كوتەرىپ, عىلىمي باعىتتا بەلسەندى جۇمىستى باستادى. سولاردىڭ ءبىرى – ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى. مۇندا جاس زەرتتەۋشىلەر مەن بولاشاق جۋرناليستەرگە ارنالعان عىلىمي ۇيىرمە قۇرىلدى. قازىردىڭ وزىندە جوبا جۋرناليستيكا جانە الەۋمەتتىك عىلىمدار فاكۋلتەتىنىڭ بەلسەندى بىرلەستىگىنە اينالىپ وتىر. اتالعان ۇيىم – مەديا سالاسىنىڭ وزەكتى ماسەلەلەرىن تەرەڭ زەرتتەپ, بولاشاق جۋرناليستەردىڭ عىلىمي الەۋەتىن ارتتىرادى.
«ينتەرنەتتىڭ قارقىندى دامۋىمەن قاتار مەديا سالاسى دا ءتۇرلى ترانسفورماتسياعا ءتۇستى. ءالى كۇنگە دەيىن جۋرناليستيكا عىلىمى لايىقتى باعاسىن الماي كەلەدى. ونى عىلىمعا اينالدىرۋ دا ءوز قولىمىزدا. بۇل ءۇشىن مەديا سالاسىن جان-جاقتى زەرتتەۋگە دەن قويۋىمىز كەرەك. سوندىقتان وسى ورتالىقتى اشۋدى شەشتىك. ۇيىمنىڭ ماقساتى – وتاندىق عىلىمي جۋرناليستيكانى دامىتىپ, مەديانى زەرتتەۋ ادىستەرىن مەڭگەرتۋ جانە ۇيىمدى تۇعىرلى زەرتتەۋ ينستيتۋتىنا اينالدىرۋ», دەيدى عالىم, ۇيىرمە جەتەكشىسى گۇلميرا اشىربەكوۆا.
عىلىمي ۇيىرمەنى اشۋ يدەياسى اتالعان فاكۋلتەت ستۋدەنتتەرىنەن باستالدى. ولار ۇستازدارى گۇلميرا شايتماعانبەتقىزىنا جۋرناليستيكانىڭ دامۋىنا ۇلەس قوسقىسى كەلەتىنىن ايتىپ, وزدەرىنىڭ ۇسىنىستارىن جەتكىزگەن. بۇگىندە ۇيىمنىڭ «Telegram» ارناسى مەن الەۋمەتتىك جەلىلەردە بەلسەندى پاراقشالارى بار. وندا 100-گە جۋىق ستۋدەنت, ماگيسترانت جانە دوكتورانت تىركەلگەن.
گۇلميرا اشىربەكوۆانىڭ ايتۋىنشا, عىلىمنىڭ تولىق اتى – «Media research». «Research» – اعىلشىننىڭ زەرتتەۋ دەگەن ءسوزى. ۇيىم مەديانىڭ وزەكتى ماسەلەلەرىن زەرتتەۋگە قىزمەت ەتەتىندىكتەن اتىن وسىلاي قويۋدى ءجون كورگەن.
بۇگىنگە دەيىن بىرلەستىك بىرنەشە فورسايت-سەسسيا مەن جيىندار وتكىزدى. وعان شەتەلدەن جانە ەلىمىزدەن بەلگىلى ماماندار شاقىرىلدى.
قازىرگى تاڭدا اقش, ۇلىبريتانيا, گەرمانيا, فرانتسيا, جاپونيا وسى سالانىڭ كوشباسشىلارى بولىپ وتىر. بۇل مەملەكەتتەردە عىلىمي جۋرناليستيكا – ارنايى ءبىلىم بەرىلەتىن, زەرتتەۋ جۇرگىزىلەتىن, قوعام سۇرانىسىنا يە سالا. ەلىمىزدە بۇل باعىت ءالى جاڭا, دەگەنمەن وسىنداي باستامالار ارقىلى ول دا ءوز جولىن تابارى انىق.
فاريزا ءىزباساروۆا,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
