فوتو: gov.kz
رحبق اسكەرلەرىنىڭ باستى ماقساتى – توتەنشە جاعدايدا, سونىڭ ىشىندە راديواكتيۆتى, حيميالىق نەمەسە بيولوگيالىق لاستانۋ كەزىندە جاۋىنگەرلىك تاپسىرمالاردىڭ ءۇزىلىسسىز ورىندالۋىن قامتاماسىز ەتۋ, جوعالتۋلاردىڭ الدىن الۋ, سونداي-اق جوعارى دالدىكتەگى قارۋ تۇرلەرىنەن قورعانۋ. سونىمەن قاتار, قارۋلى كۇشتەر شەڭبەرىندە ەكولوگيالىق قاۋىپسىزدىك پەن تابيعاتتى قورعاۋ زاڭناماسىنىڭ ورىندالۋىن قاداعالاۋ – وسى سالا ماماندارىنىڭ تىكەلەي مىندەتى.
بۇل قۇرىلىمنىڭ قوعام الدىنداعى ناقتى ۇلەسىن پاندەميا كەزەڭى ايقىن كورسەتتى. COVID-19 ىندەتى تارالعان تۇستا رحبق اسكەرلەرى قوس ماقساتتاعى كۇش رەتىندە جەرگىلىكتى بيلىكتىڭ سۇرانىسىمەن قوعامدىق ورىندار مەن الەۋمەتتىك ماڭىزى بار نىسانداردا دەزينفەكتسيا جۇمىستارىن اتقاردى. قاۋىپتى ۆيرۋستان قورعانۋعا باعىتتالعان بۇل قىزمەت – مىڭداعان ادامنىڭ اماندىعىنا كەپىل بولدى. سول ەڭبەكتىڭ لايىقتى باعاسى رەتىندە كوپتەگەن اسكەري قىزمەتشى «حالىق العىسى» مەدالىمەن ماراپاتتالدى.
رحبق ماماندارىنىڭ ميسسياسى مۇنىمەن شەكتەلمەيدى. 2024 جىلعى كوكتەمدە ورىن العان جويقىن سۋ تاسقىنى كەزىندە دە ولاردىڭ ەڭبەگى ەلەۋلى بولدى. اقتوبە, اتىراۋ جانە باتىس قازاقستان وبلىستارىندا 80-نەن استام نىساندا دەزينفەكتسيا جۇمىستارى جۇرگىزىلىپ, وڭدەلگەن جالپى اۋماق كولەمى 750 گەكتاردان استى.
ۋاقىتپەن بىرگە قاۋىپ تە كۇردەلەنە ءتۇستى. سوندىقتان رحبق بولىمشەلەرىن جاڭا بۋىنداعى, وتاندىق ءارى زاماناۋي تەحنيكالارمەن جاراقتاندىرۋ – باسىم مىندەتتەردىڭ ءبىرى. قازىردىڭ وزىندە رحب بارلاۋ كەشەندەرى, اەروزولدى بۇركەمەلەۋ ماشينالارى, سانيتارلىق وڭدەۋ ستانتسيالارى, بيولوگيالىق بارلاۋ تەحنيكاسى مەن روبوتتاندىرىلعان كەشەندەر – بارلىعى دا رادياتسيالىق جانە بيولوگيالىق قاۋىپتىڭ الدىن الۋعا بەيىمدەلگەن. سونىمەن قاتار, بۇل سالادا «سولنتسەپەك» ءتارىزدى جوعارى قۋاتتى جۇيەلەر دە قولدانىلىپ كەلەدى.
بەيبىت زاماندا اسكەري قاۋىپ ازايعانىمەن, بيولوگيالىق جانە حيميالىق قاتەر ۇنەمى وزەكتى. سوندىقتان رحبق سالاسىنىڭ وفيتسەرلەرى مەن ماماندارى – ەلىمىز ءۇشىن وتە ماڭىزدى, ستراتەگيالىق كادرلار. ولاردىڭ كاسىبي دايىندىعى قۇرلىق اسكەرلەرىنىڭ اسكەري ينستيتۋتىندا قامتاماسىز ەتىلەدى. بۇل ءبىلىم ورداسىندا ولار تەوريامەن قاتار پراكتيكالىق داعدىلاردى مەڭگەرەدى. ال ءبىلىمىن جەتىلدىرۋ ءۇشىن بىلىكتىلىكتى ارتتىرۋ كۋرستارى, جاۋىنگەرلىك دايارلىق ساباقتارى جانە ءتۇرلى دەڭگەيدەگى وقۋ-جاتتىعۋلار ۇيىمداستىرىلادى.
رحبق قىزمەتى – تەك كاسىبيلىكتى عانا ەمەس, ەرلىك پەن ادالدىقتى تالاپ ەتەتىن سالا. قاۋىپتى جاعدايدا سابىر ساقتاپ, سالقىنقاندىلىقپەن شەشىم قابىلداي ءبىلۋ – بۇل جاۋىنگەرلەردىڭ بويىنداعى ەڭ باعالى قاسيەتتەردىڭ ءبىرى. ولار رادياتسيا مەن ۋدان قورعايدى, بيولوگيالىق قاتەردىڭ الدىن الادى, ەكولوگيانى ساقتايدى. ال بۇل – مەملەكەتتىڭ بولاشاعىن قورعاۋ دەگەن ءسوز.
سوندىقتان ولاردىڭ ەڭبەگى – ەل الدىنداعى ۇلى مىندەت. حالىقتىڭ اماندىعى مەن ساربازدىڭ سەرتى توعىسقان جەردە رادياتسيالىق, حيميالىق جانە بيولوگيالىق قورعانىس اسكەرلەرىنىڭ شىن كەلبەتى كورىنەدى. ولار ءاردايىم قاۋىپتىڭ الدىڭعى شەبىندە. ەندەشە, وسىنداي باتىر ماماندار ارقاشان قۇرمەتكە لايىق.
