قازىردىڭ وزىندە ونىڭ قانجىعاسىندا شەتەلدىك 4 گرانت تۇر. تاعى 4 ۋنيۆەرسيتەت 70–80 پايىز جەڭىلدىكپەن وقۋدى ۇسىنعان.
ايزەرە قوسانوۆا وبلىس ورتالىعىنداعى №8 ليتسەيدى اياقتادى. ايتۋىنشا, وقۋ ۇياسىندا ءبىرىنشى سىنىپتان باستاپ ءبىلىم العان. اۋەل باستان-اق گۋمانيتارلىق جانە شىعارماشىلىق پاندەر كوڭىلىنە ۇناپ, ادەبيەت, تاريح, شەت تىلدەرىن قىزىعا وقىعان. مەكتەپتە بەلسەندىلىگىمەن كوزگە ءتۇسىپ, ءتۇرلى جوباعا, الەۋمەتتىك باستامالارعا ۇدايى ءۇن قوسقان.
«9-سىنىپتا وقىپ جۇرگەندە الەۋمەتتىك عىلىم مەن كاسىپكەرلىك نەگىزدەرىنە دەن قويا باستادىم. ول ۋاقىتتا بولاشاق ماماندىعىم تۋرالى كوپ ويلاماپپىن, ماعان تالداۋ جاساۋ, كرەاتيۆتىلىكتى قاجەت ەتەتىن, الەۋمەتكە پايداسى زور سالالار جاقىنداۋ كورىنەتىن. سوندىقتان تۇراقتى دامۋ, بيزنەس جانە حالىقارالىق قارىم-قاتىناس تاقىرىپتارىنا تەرەڭىرەك ۇڭىلە باستادىم», دەيدى دارىندى تۇلەك.
ول مەكتەپتە وقىپ جۇرگەندە قازاق, ورىس جانە اعىلشىن تىلدەرى بويىنشا وليمپيادالارعا قاتىسىپ, قالالىق جانە وبلىستىق دەڭگەيدە تالاي مارتە جەڭىمپاز اتاندى. ءوزى جاساعان ەكولوگيا جانە بيزنەسكە بايلانىستى عىلىمي جوبالارىنا ەرەكشە ءمان بەرەتىنى بايقالادى. سول ۋاقىتتا پاۆلودار وبلىسىنداعى قورشاعان ورتانىڭ جاعدايىن تالداۋ ءۇشىن سپۋتنيكتىك مالىمەتتەرگە دەن قويعان. ونىسى ناتيجەسىز قالعان جوق.
وسىنداي بىرنەشە جىلعى ىزدەنىستەرى ايزەرەنى ۇلگىلى ءارى وزات وقۋعا جەتەلەدى. مەكتەپ بىتىرگەن شاقتا ۇبت تاپسىرىپ, ناتيجەسىندە, 122 ۇپاي جينادى. قازىرگى ۋاقىتتا وعان شەتەلدىك 8 ۋنيۆەرسيتەتتەن ۇسىنىس جاسالىپ وتىر. ولاردىڭ اراسىندا حالىقارالىق بەدەلگە يە «New York University Shanghai», «Penn state university», «The university of British Columbia», «The American university of Paris», «Carnegie mellon university», «Drexel university», «HULT university», «Simmons university» سياقتى وقۋ ورىندارى بار.
«مەن شەتەلدىك وقۋ ورىندارىنىڭ ءاربىرىنىڭ باعدارلاماسىن زەرتتەپ شىقتىم. ولارداعى وقۋ قۇنى ۋنيۆەرسيتەت پەن مەملەكەتتىڭ وزىنە بايلانىستى ەكەن. بارلىق اقپاراتتى وقۋ ورىندارىنىڭ سايتتارىنان تابۋعا بولادى. وقۋ قۇنىنىڭ نەگىزگى بولىگى گرانت ەسەبىنەن جابىلعانىمەن دە, ءبارىبىر تاماقتانۋ, جول ءجۇرۋ جانە تاعى دا باسقا قوسىمشا شىعىندار بار. بىراق ءبارىبىر وقۋ گرانتى ءاربىر وتباسى ءۇشىن ۇلكەن قولداۋ. اتا-انام مەنى ءوز مۇمكىندىكتەرىنىڭ شەگىندە قولداۋعا دايىن. سوندىقتان الداعى ۋاقىتتا گرانتتىق جانە ستيپەنديالىق باعدارلامالار ارقىلى وقىسام دەگەن ويدامىن», دەيدى ول.
ايزەرە – وتباسىنىنىڭ ورتانشىسى. اعاسى شەتەلدىك ۋنيۆەرسيتەتتە گرانتپەن ءبىلىم الىپ جاتىر. ال ءىنىسى مەكتەپتە وقيدى.
پاۆلودار وبلىسى
