«Soile AI» مۇمكىندىكتەرى جەدەلحات بوتى, ۆەب-ينتەرفەيس, ءموبيلدى قوسىمشا جانە سمارت ساعات ينتەگراتسياسىنان تۇرادى. سونداي-اق تاۋلىك بويى جۇمىس ىستەيتىن AI كومەكشىسى بار.
س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى ەنداۋمەنت قورىنىڭ ۇيىمداستىرۋىمەن وتكەن «ANaMed» فورۋمىندا «Soile AI» پلاتفورماسىنىڭ ەرەكشەلىگىمەن تانىستىرىپ, كوماندا مۇشەلەرى ارنايى باعدارمالاردى ءتۇزۋ لوگوپەد, دارىگەرلەردىڭ كومەگىمەن ىسكە اسقانىن ايتادى.
فورۋمدا قازىلار القاسىنىڭ نازارىنا ۇسىنىلعان 40-تان استام جوبانىڭ ىشىندە وقۋشىلار ۇسىنعان بىردەن-ءبىر جوبا – «Soile AI». ۋنيۆەرسيتەت رەكتورى مارات شورانوۆتىڭ ايتۋىنشا, فورۋمعا كەلىپ تۇسكەن جوبالاردىڭ قاي-قايسىسى دا الەۋەتى زور ءارى قوعامعا اسا قاجەت. ولاردىڭ قاتارىندا ستۋدەنتتەرگە ارنالعان ۆەب-ترەناجەر-زەرتحانا, ناشار كورەتىن جاندارعا ارنالعان ارنايى قۇرىلعى, ديابەتتى انىقتاۋعا كومەكتەسەتىن ۇلتاراق, ورتودونتتار مەن پلاستيكالىق حيرۋرگتارعا ارنالعان بەت-الپەت, تاعى دا باسقا ازىرلەمەلەر بار. وقۋشىلار عىلىمي زەرتتەۋلەردىڭ ءتۇرلى كەزەڭدەرىنەن ءوتىپ, ۋنيۆەرسيتەتتىڭ تەحنوپاركىندە ناعىز عالىم رەتىندە جۇمىس ىستەيتىن بولادى.
«Soile AI» جوباسىنىڭ اۆتورى ءارى جەتەكشىسى, الماتى وبلىسى قارابۇلاق اۋىلىنداعى №22 مەكتەپتىڭ وقۋشىسى ۇكىلى وماروۆانىڭ ايتۋىنشا, پلاتفورما داۋىستى دۇرىس تانىپ, سويلەمدى تۇسىنۋگە مۇمكىندىك بەرەدى. ول جاي عانا تەحنولوگيا ەمەس, قولجەتىمدى, ينكليۋزيۆتى قۇرال. تسەرەبرالدى سال اۋرۋىنا, پاركينسونعا شالدىققان, قۇلاعى ناشار ەستيتىن, ينسۋلتتان كەيىن كەكەشتەنىپ سويلەيتىن ناۋقاستار ءۇشىن قولايلى.
كوماندادا بەس وقۋشى بار. جاساندى ينتەللەكتىنى شەبەر مەڭگەرگەن وقۋشىلار وزدەرىنىڭ باعدارلامالاۋ, مەديتسيناعا يكەمدىلىگىنە, الەۋمەتتىك جەلىدە جۇمىس ىستەۋ مۇمكىندىگىنە قاراي جوبا جوعارى دەڭگەيدە جەتىلدىرۋگە تىرىستى. «بۇگىندە الەمدە 800 ملن-نان استام ادام سويلەۋ كەمىستىگىنەن زارداپ شەگەدى. تمد ەلدەرىندە بۇل كورسەتكىش 50 ملن-نان اسادى. مۇنىڭ سەبەبى تسەرەبرالدى سال اۋرۋى, ينسۋلت, پاركينسون جانە باسقا نەۆرولوگيالىق جاعدايلارمەن بايلانىستى بولۋى مۇمكىن. ءبىز تسەرەبرالدى سال اۋرۋىنا شالدىققان بالانىڭ جاعدايىندا جۇمىس ىستەدىك. قازىرگى كەزدە مامانداردى قولداۋ, پيلوتتىق تەستىلەۋ جانە مەديتسينالىق ورتالىقتار, اكادەميالارمەن ارىپتەستىك ورناتتىق», دەيدى ۇكىلى وماروۆا.
بۇگىندە كوماندا ەلىمىزبەن قاتار شەتەلدەردەگى كونكۋرستاردىڭ جەڭىمپازى. وسىدان 6 اي شاماسىندا باستالعان جوبا «ITtest 2024 توپ-1» ستارتابىندا, تمد-دا حالىقارالىق الەۋمەتتىك جوبالار كونكۋرسىندا 1-ورىن, «Infomatrix Asia 2025» جەڭىمپازى اتاندى. حالىقارالىق جاساندى ينتەللەكت قاۋىمداستىعىنىڭ «AI-مەن دەنساۋلىق ساقتاۋدىڭ ۇزدىك باستاماسىنا» ۇمىتكەر, بيىل «Central Asia Startup Cup», «MedTech» ستارتاپتارىنىڭ حالىقارالىق اكسەلەراتسياسى, «Technovation Girls», حالىقارالىق «ANaMed AI Challenge» جەڭىمپازدارى قاتارىنا ەندى.
دەنساۋلىق ساقتاۋ سالاسىنداعى ستارتاپتاردىڭ رەسپۋبليكالىق كورمەسىنە, KIHE 2025 حالىقارالىق كورمەسىنە قاتىسقان كوماندا جاقىندا استانادا بولىپ, ءوز جوبالارىن «BI Group» كومپانياسىنا تانىستىردى. «BI Group» كومپانياسى «Binom», «Quantum», جايلى مەكتەپتەرگە ەنگىزۋ ءۇشىن ەلىمىزدىڭ تۇكپىر-تۇكپىرىنەن ءبىلىم بەرۋ سالاسىنداعى ۇزدىك جوبالاردى ىزدەستىرگەن بولاتىن. ناتيجەسىندە, ەڭ ۇزدىك 4 جوبانىڭ قاتارىندا اتالعان «Soile AI» مەكتەپتەرگە ەنگىزىلەتىن بولادى. جاز ايلارىندا مەكتەپتەردە, مەديتسينالىق ورتالىقتاردا قاناتقاقتى جوبا رەتىندە ىسكە اسپاقشى. قازىرگى تاڭدا جوباعا كورەيا, جاپونيا, قىتاي, اقش, وزبەكستان, رەسەي تاراپى قىزىعۋشىلىق تانىتىپ وتىر.
«عىلىمدى كوممەرتسيالاندىرۋ جونىندەگى وداق» رقب پرەزيدەنتى قۇرمانعازى وماروۆ اتاپ وتكەندەي, پرەزيدەنتتىڭ ەلىمىزدى تولىعىمەن تسيفرلى مەملەكەتكە اينالدىرۋ تاپسىرماسىن ىسكە اسىرۋدا وبلىستىق, رەسپۋبليكالىق كونكۋرستار مەن وليمپيادالاردا جەڭىسكە جەتكەن ساپالى تسيفرلىق جوبالاردى جاساپ جاتقان مەكتەپ وقۋشىلاردىڭ عىلىمي الەۋەتى جوعارى. بارلىق وڭىردەگى «اstana hub» وڭىرلىك بولىمشەلەرى ارقىلى وقۋشىلاردىڭ تسيفرلىق جوبالاردى قۇرۋىنا جۇيەلى قولداۋ كورسەتۋ قاجەت. بىراق ازىرگە ەلىمىزدە كامەلەتكە تولماعانداردى قولداۋ جۇيەسى جەتكىلىكسىز. مۇنداي قولداۋ بولمايىنشا, وقۋشىلاردىڭ ساپالى جوبالارى كاسىپكەرلەردىڭ زاڭدى, قارجىلىق جانە اكىمشىلىك مۇمكىندىكتەرىنەن تىس قالىپ قويادى. سوندىقتان وداق تاراپىنان وقۋشىلاردىڭ جوبالارىن ىسكە اسىرۋدى جۇيەلى قولداۋ باعىتى ويلاستىرىلىپ جاتىر.
الماتى
