«Grape» دەپ اتالاتىن بۇل مودەل كت-سۋرەتتەردى ءۇش ولشەمدە تالداي وتىرىپ, تاجىريبەلى دارىگەرلەردىڭ وزدەرى بايقاماي قالۋى مۇمكىن وتە ۇساق وزگەرىستەردى انىقتاي الادى. كلينيكالىق سىناقتاردا «Grape» 100 مىڭ ادامدى زەرتتەپ, 96,8% ناقتى ناتيجە كورسەتكەن. بۇل – مودەل اۋرۋدى ەرتە كەزەڭدە جوعارى دالدىكپەن انىقتاي الاتىنىن بىلدىرەدى. ءتىپتى كەيبىر جاعدايلاردا «Grape» رەنتگەنولوگتاردان التى اي بۇرىن قاتەرلى ىسىك بەلگىلەرىن تاپقان. بۇگىنگە دەيىن اسقازان سياقتى قۋىستى مۇشەلەردى كت ارقىلى زەرتتەۋ قيىن دەپ ەسەپتەلىپ كەلگەن. سەبەبى اسقازان ۇنەمى قوزعالىستا بولادى ءارى العاشقى زاقىمدانۋلار كوزگە بىردەن تۇسە بەرمەيدى. وسىعان بايلانىستى دارىگەرلەر ەندوسكوپيا ادىسىنە جۇگىنۋگە ءماجبۇر بولعان. ال «Grape» مودەلى بۇل ماسەلەنى شەشىپ وتىر.
زەرتتەۋشىلەر الەمدەگى ەڭ ۇلكەن اسقازان وبىرىنا قاتىستى كت-سۋرەتتەر بازاسىن جاساپ, جاساندى ينتەللەكتىنى سول دەرەكتەرمەن وقىتقان. ناتيجەسىندە «Grape» تاجىريبەلى مامانداردىڭ كوزىنە تۇسپەيتىن زاڭدىلىقتاردى اجىراتىپ ۇيرەنگەن. مودەل جالعان وڭ ناتيجەلەردى دە بارىنشا ازايتا وتىرىپ, وبىر جاعدايلارىن ەرتە كەزەڭدە سەنىمدى انىقتاي الادى. قازىر «Grape» مودەلىن قىتايدىڭ چجەتسزيان جانە انحوي پروۆينتسيالارىندا قولدانۋ جوسپارلانىپ وتىر.
«Grape مودەلى – وبىردى ءينۆازيۆتى ەمەس جولمەن, ەرتە انىقتاي الاتىن زاماناۋي شەشىم. بۇل – دياگنوستيكا سالاسىنداعى ۇلكەن سەرپىلىس, ءارى ادامدارعا قولجەتىمدى ءارى قاۋىپسىز مەديتسينالىق تەكسەرۋدەن وتۋگە جاڭا مۇمكىندىك بەرەدى.
