اشىلۋ سالتاناتىندا وبلىس اكىمىنىڭ ورىنباسارى دوسۇلان ايتباەۆ ءوڭىر باسشىسى مارات احمەتجانوۆتىڭ قۇتتىقتاۋىن جەتكىزىپ, بالالاردىڭ تاماشا تابيعات اياسىندا تىنىعۋىنا ساتتىلىك تىلەدى.
ءتول تاريحىمىز تۇنىپ تۇرعان تاماشا ولكەدە جاڭادان دوس تاۋىپ, تازا اۋا جۇتىپ, ءمولدىر سۋعا شومىلىپ, جادىراعان جاز قىزىعىن كورۋ ءبىر عاجاپ. مۇنى بولاشاققا جاسالىپ جاتقان قامقورلىق دەپ ەسەپتەۋگە ابدەن بولادى, – دەدى وبلىس اكىمىنىڭ ورىنباسارى.
كوكشەتاۋ قالاسىنان كەلگەن بالالار توپتارىنىڭ جەتەكشىلەرى وقۋشىلارمەن بىردەن ءتىل تابىسىپ كەتىپتى. ورتاق تاقىرىپ تا از ەمەس. ماڭگى جاسىل قاراعايلار مەن اق قايىڭدار كومكەرگەن, توستاعانعا قۇيعان سۋداي تولىقسىپ جاتقان كول جاعاسىندا كوكىرەكتەرىنە قۇيىپ الار سان الۋان ادەمى دە اسەرلى سىر بار. بالا كوڭىلى بايقاعىش. ءار نارسەنى بىلگىسى كەلەدى. مايدا تولقىندارى ءبىرىن-ءبىرى قۋالاپ, جاعالاۋعا اسىققان كول جاعاسىندا تۇرىپ شۇيىركەلەسكەن بالالار كوز تويدىرار كوركەم تابيعاتتىڭ كەلىستى كەلبەتىن جاس جاندارىنا كوشىرىپ العىسى كەلەتىندەي. جەتەكشىلەر «دۋمان» پەداگوگيكالىق وتريادىنان ەكەن. العىر, ءبىلىمدى, ەڭ باستىسى بويلارىندا ءوز ىستەرىنە دەگەن سۇيىسپەنشىلىك بار. جوسپارلارىمەن دە ءبولىسىپ جاتىر. الداعى ۋاقىتتا بالالاردىڭ رۋحاني كەڭىستىگىن كوركەيتەتىن مازمۇندى بايقاۋلار وتكىزبەك, سپورت جارىستارى ۇيىمداستىرىلماق. كەشكىلىك تابيعات اياسىندا جينالىپ, قىزىقتى اڭگىمەلەر وربىتپەك. ول اڭگىمەلەردىڭ نەگىزگى باعىتى تۋعان جەر تۋرالى. ءار پەرزەنتتىڭ تۋعان جەرگە قىزمەت ەتۋى كەرەكتىگى حاقىندا. سونداي-اق سۇلۋ تابيعاتتى ساقتاۋ ءۇشىن قىزمەت ەتۋ جايىندا. بالالاردىڭ باسىم بولىگى استانادان كەلىپتى. ەكىباستۇزدان جەتكەندەر دە بار.
– «سوكول» بۇل ەڭ جاقسى لاگەر. مەن بىرنەشە كۇن بولدىم, ەندى كەتكىم دە كەلمەي قالدى. قازىردىڭ وزىندە جاڭا دوستارىممەن قالاي قوشتاسامىن دەپ ۋايىمداپ ءجۇرمىن, – دەيدى استانا قالاسىنان كەلگەن 8-سىنىپ وقۋشىسى نۇرايىم بەردەن.
«سوكول» بالالار لاگەرى «كوكشەتاۋ» مەملەكەتتىك ۇلتتىق تابيعي پاركىنىڭ اۋماعىندا ورنالاسقان. 6,3 گەكتار جەردى الىپ جاتىر. 320 ورىندىق ەلىمىزدەگى ەڭ ءىرى لاگەرلەردىڭ ءبىرى 1963 جىلى پايدالانۋعا بەرىلگەن. ۋاقىت وتە كەلە, ءبىر مەكەمەدەن ءبىر مەكەمەگە اۋىسىپ, تەك 2002 جىلى عانا ءبىلىم سالاسىنا بەرىلدى. 2020 جىلى قىزمەتى ءبىرشاما توزۋىنا بايلانىستى توقتاتىلدى. 2024 جىلعى 50 بالالاردى ساۋىقتىرۋ لاگەرىن جاڭعىرتۋ باعدارلاماسىنا سايكەس «نۇرمۇقانوۆ» جەكە كاسىپكەرلىگىنىڭ سەنىمدى باسقارۋىنا 15 جىلعا بەرىلدى.
بىرەر ايدىڭ ىشىندە نىسان جاڭارىپ سالا بەردى. لاگەر ديرەكتورى ارعىن ازباەۆتىڭ ايتۋىنا قاراعاندا, تولىق جاڭارتىلعان. جاتىن كورپۋسى, اسحانا, كلۋب, بارلىعى مۇقيات جوندەلگەن. ءتىپتى بۇرىنعى نىساننىڭ قابىرعاسى عانا قالعان, وزگەسى تۇگەل جاڭارتىلىپتى. جاڭا قازاندىق ورناتىلعان, الداعى ۋاقىتتا لاگەر جىل بويى جۇمىس ىستەمەك.
سانيتارلىق-ەپيدەميالىق جاعدايى تالاپقا ساي. ۇزاق جىلعى ۇزىلىستەن كەيىن ەسىگىن ايقارا اشقان ساۋىقتىرۋ ورنى العاشقى كەزەكتە 275 بالانى قابىلداپتى. جىل سوڭىنا دەيىن 8-15 جاس ارالىعىنداعى ەكى مىڭ بالاعا قىزمەت ەتپەك. لاگەردىڭ جاڭارۋى – مەملەكەت پەن جەكە بيزنەستىڭ بىرلەسە جۇمىس ىستەۋىنىڭ ناتيجەسى.
اقمولا وبلىسى
