اباي ەلىنە ينۆەستورلار اعىلدى: 1 مەگافورۋم, 15 مەموراندۋم

فورۋمنىڭ پلەنارلىق سەس­سياسىندا پارلامەنت سەناتىنىڭ دەپۋتاتتارى اينۇر ارعىنبەكوۆا, قايرات تاستەكەەۆ, ءماجىلىس دەپۋتاتتارى نۇرتاي سابيليانوۆ, ماقسات تولىقباي, رينات زايىتوۆ, «Agro Land Co» جشس باس ديرەكتورى, «EurasiaRed» حولدينگتىك كومپانياسىنىڭ پرەزيدەنتى ەرلان مۇقاشەۆ, «KAZ Minerals» توبى باسقارماسىنىڭ توراعاسى ەلدار مامەدوۆ, «سان باو» ساۋدا-ونەركاسىپ كورپوراتسياسى باسقارماسىنىڭ توراعاسى كان حەپين, «ەيكوس» جشس باس ديرەكتورى الەكساندر سولوۆيوۆ, قازاقستانداعى «Yokohama», «Triangle» كومپانيالارىنىڭ رەسمي ديستريبيۋتورى سىرىمبەك تاۋ, «ASR» ەكوجۇيەسىنىڭ نەگىزىن قالاۋشى داۋرەن بيموۆ, «Q4 تۇلپار» كومپانياسىنىڭ باسشىسى تالعات ساقان, سونىمەن بىرگە اقتوبە, تۇركىستان وبلىسى اكىمدىكتەرىنىڭ وكىلدەرى ءسوز سويلەدى. ينۆەستورلار اباي وبلىسىندا جۇزەگە اسىراتىن جوبالارى تۋرالى ايتتى.

– ابايدىڭ 180 جىلدىعىنا وراي بەيجىڭدە اباي ءۇيىن اشامىز. بۇعان قوسا, اباي ەلىندە ءوزىمىزدىڭ «پانا» قوناق ءۇي جەلىسىن اشۋدى جوسپارلاپ وتىرمىز. 500 ورىندىق ءماجىلىس زالى بولادى. بەس زاماناۋي, ستاندارتقا سايكەس مەيرامحانالار اشىلادى. ەكىنشى جوبامىز – «SEMEY MALL» اتالىپ كەتكەن قۇرىلىس. كوپ جىلدان بەرى كەزەك كۇتىپ تۇرعانى بەلگىلى. ەكى-ءۇش كۇننەن كەيىن قۇرىلىس جوباسىن باس­تايمىز, – دەدى بەلگىلى كاسىپكەر سىرىمبەك تاۋ.

قىتايلىق «سان باو» ساۋ­دا-ونەركاسىپ كورپوراتسياسى باسقارماسىنىڭ توراعاسى كان حەپين 33 جىلدان بەرى اباي وبلىسىمەن قالىپتاسقان ىنتى­ماقتاستىق بايلانىستاردى قار­قىندى جالعاستىرا بەرەتىنىن جەتكىزدى.

– بۇگىن اباي ەلىنىڭ دامۋى­نا ارنالعان ماڭىزدى قادام – «تۋعان جەرگە تۋىڭدى تىك» ينۆەستيتسيالىق فورۋمىنا جينالىپ وتىرمىز. بۇل فورۋم – ءوزارا وي بولىسەتىن, پىكىر الماساتىن, ەڭ باستىسى, بولاشاققا بىرگە قادام باسۋعا مۇمكىندىك بەرەتىن الاڭ. مەملەكەت باسشىسى قاسىم-جومارت كەمەل ۇلى توقاەۆ «اباي تۋعان توپىراققا كەلگەن ادام بۇل جەردىڭ كيەسىن سەزىنەدى, قاسيەتىن ۇعادى. سەمەي – ۇلى دالانىڭ ۇلاعاتتى ولكەسى. بۇل – الاش ارىستارىنىڭ ءىزى قالعان, زيالىلارىمىز ەلدىڭ بولاشاعى ءۇشىن كۇرەسكەن قاستەرلى ءوڭىر. سەمەي – ۇلتتىق عىلىم مەن ءبىلىمنىڭ, ونەر مەن مادەنيەتتىڭ تاريحي ورتالىعى» دەپ اتاپ وتكەن قاسيەتتى سەمەي تورىنە كەلىپ وتىرسىزدار. اباي وبلىسى – جاڭادان قۇرىلعانىمەن, الەۋەتى جوعارى ايماق. تابيعي رەسۋرستارىمىز, ەڭبەكقور حالقى, وندىرىستىك ينفراقۇرىلىمى مەن گەوگرافيالىق ورنالاسۋى – تۇراقتى دامۋعا نەگىز بولا الادى. الايدا وسى مۇمكىندىكتەر­دى ىسكە اسىرۋ ءۇشىن جەرگىلىكتى كاسىپكەرلەر مەن ينۆەستورلاردىڭ بەلسەندىلىگى اۋاداي قاجەت, – دەدى ءوڭىر باسشىسى بەرىك ءۋالي.

سونىمەن قاتار وبلىس اكىمى بۇگىنگە دەيىن 50-دەن استام شە­تەلدىك ينۆەستورمەن كەزدەسۋ وتكىزگەنىن, «سەمەيدىڭ ساۋلەت كەل­بەتى» اتتى اشىق بايقاۋ جا­ريا­لانعانىن مالىمدەدى. قو­لاي­لى گەوگرافيالىق ورنالا­­سۋى­نا وراي, اباي وبلىسى – قىتاي, رەسەي, ورتالىق ازيانى بايلانىستىرىپ جاتقان ءوڭىر. بۇل تۇرعىدا ءىرى حالىقارالىق ساۋدا دالىزىنە شىعاتىن كولىك-لو­گيس­تيكالىق حابتى دامىتۋعا مۇم­كىندىك مول. وسى رەتتە وڭىردە بىرقاتار ءىرى ينۆەستيتسيالىق جوبالار جۇزەگە اسىرىلماق. سولاردىڭ ءبىرى – اياگوز – باقتى تەمىرجولى مەن قۇرعاق پورتتىڭ قۇرىلىسى.

اكىمدىكتىڭ مالىمەتىنشە, قازىر وبلىستا 8000-نان استام تۇراقتى جۇمىس ورنىن قۇرۋ­عا باعىتتالعان, جالپى قۇنى 2,7 ترلن تەڭگە بولاتىن 38 پەرس­پەكتيۆالى ينۆەستيتسيالىق جوبادان تۇراتىن بىرىڭعاي پۋل قالىپتاستى. 2024 جىلدىڭ قو­رىتىندىسىنا ساي, ناقتى سەك­تورداعى نەگىزگى كاپيتالعا سالىن­عان ينۆەستيتسيالار كولەمى 575,3 ملرد تەڭگە بولدى. تىكەلەي شە­تەلدىك ينۆەس­تيتسيا كورسەت­­كىشى – 775,3 ملن دوللار. بىلتىر ­14,4 ملرد تەڭگەگە 8 جوبا ىسكە اسىرىلىپ, 330 جۇمىس ورنى قۇرىلدى. 2025 جىلى 31,1 ملرد تەڭگەگە 10 ينۆەستيتسيالىق جوبانى ىسكە اسىرىپ, 767 جۇمىس ورنى اشىلماق. بۇگىندە 1 ملرد تەڭ­گەگە 1 جوبا ىسكە قوسىلدى. بۇعان قوسا بيىل 10 ملرد تەڭگەگە «سەماز» جشس ونەركاسىپتىك الاڭدارىن كەڭەيتىپ, جىلىنا 6000 ارنايى تەحنيكا شىعاراتىن جەلى جاڭارتىلادى. سونداي-اق «كازپوليگراف» جشس جىلىنا قۋاتتىلىعى 40 ميلليون قاعاز بەن كارتون بۇيىمدارى ءوندىرىسىن ىسكە قوسادى دەپ جوسپارلانىپ وتىر.

وتكەن ايدا اباي وبلىسى دەلەگاتسياسى قىتايدىڭ شىڭجاڭ ولكەسىنە جۇمىس ساپارىمەن بارىپ, «ۇلكەن التاي» سۋبوڭىر­لىك ىنتىماقتاستىق جونىندەگى حالىقارالىق كونفەرەنتسياسىنا قاتىستى. ساپار اياسىندا ءوڭىر باسشىسى 20 كەزدەسۋ وتكىزىپ, جالپى مولشەرى – 1,5 ملرد دوللاردان اساتىن 15 ىنتىماقتاستىق تۋرالى مەموراندۋمعا قول قويدى.

– بۇل فورۋمعا بىرنەشە وب­لىستىڭ وكىلدەرى كەلدى. مەم­لەكەت باسشىسىنىڭ قول­داۋى­مەن حاكىم ابايدىڭ 180 جىل­دىق مەرەيتويىنا وراي باس­تال­عان «ابايعا قۇرمەت» اكتسيا­سى اياسىندا ەلىمىزدىڭ ءاربىر ءوڭىرى وبلىسىمىزعا ءبىر-ءبىر نىساننان سالىپ بەرمەك. قازىر ماڭعىستاۋ, تۇركىستان, اقتوبە, اتىراۋ, پاۆلودار, قوستاناي, جامبىل, اقمولا, سولتۇستىك قازاقستان, شىعىس قازاقستان, قىزىلوردا, الماتى وبلىستارى, شىمكەنت پەن استانا قالالارى ءتيىستى جۇ­­مىستاردى باستاپ تا كەتتى. قال­عان وڭىرلەر دە بۇل باستامانى قولدايتىندارىن ءبىلدىرىپ وتىر. جيىندا وبلىس اكىم­دە­رىنە ءوڭىر تۇرعىندارى اتىنان العى­سىمدى ايتتىم. بۇگىنگى كەزدەسۋ – تۋعان جەردىڭ بولاشاعىن جار­قىن ەتۋگە باعىتتالعان ورتاق قادا­مىمىزدىڭ باستاماسى. «تۋعان جەر­گە تۋىڭدى تىك» – قاسيەتتى حال­­قىمىزدىڭ ۇرپاقتان-ۇرپاققا جال­عاسقان ۇلى ۇستانىمى. بابا­دان قالعان وسى وسيەت – قازىر وزەكتى, ەرتەڭىمىز ءۇشىن باعدارشام بولماق, – دەدى بەرىك ءۋالي.

– «KAZ Minerals» جشس باس­قارما توراعاسى ەلدار مامەدوۆتىڭ ايتۋىنشا اباي ەلىندە كومپانيا قولداۋىمەن كوپتەگەن يگى ءىس اتقارىلدى. ەندى مىنا, سەمەيدە ستاديون سالۋ جوباسى سپورتتىق ينفراقۇرىلىم سالاسىنداعى ەڭ اۋقىمدى ىستەردىڭ ءبىرى بولماق. بۇل – سپورتتىڭ دامۋىنا ۇلەس قانا ەمەس, قالانىڭ ساۋلەتىنە سەرپىن بەرەتىن جوبا. ءبىز وسىنداي تاريحي ءساتتىڭ ءبىر بولىگى بولعانىمىزعا قۋانىشتىمىز», – دەدى.

«تۋعان جەرگە تۋىڭدى تىك» ينۆەستيتسيالىق فورۋمىنىڭ قورىتىندىسىندا:

1. اباي وبلىسى ءبىلىم باسقارماسى مەن ­استانا قالاسىنىڭ قۇرىلىس باسقارماسى بىرلەسىپ, «كەلە­شەك مەكتەپتەرى» جوباسى اياسىندا ءبىلىم بەرۋ نىسانىن سالۋ;
2. اباي وبلىسىنىڭ اۋىل شارۋاشىلىعى باس­قارماسى مەن «Qazaq-Astyq Group» جشس-مەن بىرلەسىپ, تازارتىلعان ماي وندىرەتىن زاۋىت سالۋ;
3. اباي وبلىسىنىڭ قۇرىلىس باسقارماسى مەن شىعىس قازاقستان وبلىسىنىڭ ساۋلەت, قالا قۇرىلىسى جانە جەر قاتىناستارى باسقارماسى بىرلەسىپ, سەمەي قالاسىنىڭ وڭ جاق جاعالاۋىندا قۇرىلىس جوبالارىن ىسكە اسىرۋ;
4. اباي وبلىسىنىڭ دەنە شىنىقتىرۋ جانە سپورت باسقارماسى مەن اقتوبە وبلىسىنىڭ اكىمدىگى بىرلەسىپ, جەكپە-جەك سارايىنىڭ قۇرى­لىسىن سالۋ;
5. اباي وبلىسىنىڭ كاسىپكەرلىك جانە ين­دۋستريالىق-يننوۆاتسيالىق دامۋ باسقارماسى مەن تۇركىستان وبلىسىنىڭ اكىمدىگى بىرلەسىپ, كورمە ورتالىعىنىڭ قۇرىلىسىن سالۋ;
6. سەمەي قالاسىنىڭ اكىمدىگى مەن «KAZ Minerals» جشس بىرلەسىپ, جاڭا ستاديون قۇرىلىسىن سالۋ;
7. «سەمەي» الەۋمەتتىك-كاسىپكەرلىك كورپوراتسياسى» اق مەن «Qazaq-Astyq Group» جشس بىرلەسىپ, بۇرشاق جانە باسقا دا اۋىل شارۋاشىلىعى داقىلدارىن قايتا وڭدەۋ زاۋىتىن سالۋ;
8. سەمەي قالاسىنىڭ اكىمدىگى مەن «ەيكوس» جشس بىرلەسىپ, قالانىڭ اۋلا كەڭىستىكتەرىن اباتتاندىرۋ;
9. اباي وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى «DKPROEKT» قۇرىلىس كومپانياسىمەن بىر­لەسىپ, «Semey Smart City» اۋدانى بويىنشا جاڭا جوبالىق-سمەتالىق قۇجاتتاما ازىرلەۋ;
10. اباي وبلىسىنىڭ تۋريزم باسقارماسى مەن «بىرلىك-پاۆلودار» جشس بىرلەسىپ, جول بويىنداعى سەرۆيستىك نىسانداردىڭ قۇرىلىسىن سالۋ;
11. جاڭاسەمەي اۋدانىنىڭ اكىمدىگى مەن «Miryildiz Kz Ltd» – جاڭاسەمەي اۋدانىندا مەكتەپ قۇرىلىسىن سالۋ;
12. ءۇرجار اۋدانىنىڭ اكىمدىگى مەن «Q4 تۇلپار» كومپانياسى بىرلەسىپ, بالاباقشا سالۋ;
13. اباي وبلىسىنىڭ ساۋلەت, قالا قۇرىلىسى جانە جەر قاتىناستارى باسقارماسى «Vira Group» جشس-مەن بىرلەسىپ, ساۋدا ءۇيى جوباسىن جۇزەگە اسىرۋ;
14. كۋرچاتوۆ قالاسىنىڭ اكىمدىگى مەن «Samal Commodities» جشس بىرلەسىپ, كومىر وڭدەۋ ار­قىلى اممياك پەن كارباميد وندىرەتىن زاۋىت سالۋ;
15. سەمەي قالاسىنىڭ اكىمدىگى مەن «بەلەس» كومپانياسى – بوكس ورتالىعىنىڭ قۇرىلىسىن سالۋ سىندى 15 ءوزارا ىنتىماقتاستىق مەموراندۋمىنا قول قويىلدى.

اباي وبلىسى