فوتو: ۇكىمەتتىڭ ءباسپاسوز قىزمەتى
Polpharma Group قۇرامىنداعى Santo كومپانياسى شىمكەنت قالاسىنداعى «حيمفارم» اق ءوندىرىسىن كەڭەيتىپ, جىلىنا 2 ميلليارد بىرلىككە دەيىن دارىلىك زاتتار شىعارۋدى جوسپارلاپ وتىر. جوبا اياسىندا 62,6 ميلليون اقش دوللارى كولەمىندە ينۆەستيتسيا سالىنىپ, 300 جاڭا جۇمىس ورنىن اشۋ كوزدەلگەن.
دامۋ باسىمدىقتارى رەتىندە تۋبەركۋلەز, سوزىلمالى ۆيرۋستى س گەپاتيتى, باۋىر تسيرروزى, ونكولوگيالىق اۋرۋلار, ديابەت, پسيحيكالىق جانە جۇيكە جۇيەسى اۋرۋلارى, جۇرەك-قان تامىرلارى اۋرۋلارى سياقتى الەۋمەتتىك ماڭىزدى دەرتتەر تاڭدالعان.
«مەملەكەت باسشىسى قاسىم-جومارت توقاەۆ وتاندىق ءدارى-دارمەك ءوندىرىسى مەن مەديتسينالىق ماقساتتاعى بۇيىمدار ءوندىرىسىن دامىتۋدىڭ ماڭىزدىلىعىن ەرەكشە اتاپ ءوتتى. بۇل باعىتتا ءبىز دارىلىك زاتتار مەن مەديتسينالىق ماقساتتاعى بۇيىمداردىڭ وتاندىق ءوندىرىسى ۇلەسىن ارتتىرۋعا ۇمتىلىپ كەلەمىز. فارماتسەۆتيكالىق ءونىم ءوندىرىسىن لوكاليزاتسيالاۋدى ىنتالاندىرۋ شارالارىن جۇزەگە اسىرىپ جاتىرمىز. مەديتسينالىق تەحنولوگيالار ترانسفەرتى جانە يمپورتتى الماستىرۋ, عىلىمي جانە ەكسپورتتىق الەۋەتتى دامىتۋ باسىم باعىت سانالادى. قازاقستان ۇكىمەتى الەۋمەتتىك ماڭىزدى وندىرىستەردىڭ وسىنداي اۋقىمىن جۇزەگە اسىرۋعا مۇددەلى جانە ينۆەستيتسيالىق جوبانى ۋاقتىلى ىسكە قوسۋ ءۇشىن قاجەتتى قولداۋ شارالارىن قامتاماسىز ەتەدى», دەدى ولجاس بەكتەنوۆ.
ايتا كەتەيىك, جاڭا وندىرىستىك كەشەن زاماناۋي قۇرال-جابدىقتارمەن جابدىقتالادى. كومپانيا وكىلى ەجي ستاراك قازاقستانداعى ينۆەستيتسيالىق كليماتقا جوعارى باعا بەرىپ, وندىرىلەتىن ءونىم حالىقارالىق ستاندارتتارعا تولىق ساي بولاتىنىن اتاپ ءوتتى.
كەزدەسۋ قورىتىندىسى بويىنشا, تاراپتار ءوزارا ءتيىمدى ارىپتەستىكتى ودان ءارى نىعايتۋعا دايىن ەكەندەرىن ءبىلدىردى. سونىمەن قاتار, ۇكىمەت باسشىسى دەنساۋلىق ساقتاۋ مينيسترلىگىنە جانە شىمكەنت قالاسىنىڭ اكىمدىگىنە ينۆەستيتسيالىق كەلىسىم جوباسىن قىسقا مەرزىمدە ازىرلەۋدى تاپسىردى.
