اتالعان زاڭدا ەلىمىز ءۇشىن باسىم سپورت تۇرلەرىن ايقىنداۋدىڭ جاڭا, وبەكتيۆتى ادىستەمەسى بەلگىلەنگەن. بۇعان دەيىن مۇنداي سپورت تۇرلەرىنىڭ ءتىزىمى كوبىنە سۋبەكتيۆتى باعالاۋعا, جەكەلەگەن سپورت تۇرلەرىنىڭ تانىمالدىعىنا نەمەسە ءداستۇرلى تاجىريبەگە سۇيەنىپ جاسالاتىن. ەندىگى كەزەكتە ىرىكتەۋدىڭ نەگىزگى ولشەمى رەتىندە ۇلتتىق قۇرامالاردىڭ وليمپيادا, پاراليمپيادا, سۋردليمپيادا, ازيا جانە پارا ازيا ويىندارىنداعى ناقتى جەتىستىكتەرى ەسەپكە الىنادى.
تۋريزم جانە سپورت مينيسترلىگىنىڭ مالىمەتىنشە, قازىرگى ۋاقىتتا 60-تان استام باسىم سپورت ءتۇرى انىقتالعان. ولاردىڭ شامامەن 30-عا جۋىعى ەلىمىزدىڭ بارلىق وڭىرىندە دامىتىلىپ كەلەدى. سونىمەن قاتار زاڭدا وڭىرلىك دەڭگەيدە دە باسىم سپورت تۇرلەرىن بەكىتۋ مۇمكىندىگى قاراستىرىلعان. بۇل رەتتە جەرگىلىكتى جەردىڭ سپورتتىق داستۇرلەرى, ينفراقۇرىلىمدىق مۇمكىندىكتەرى مەن جاتتىقتىرۋشىلىق الەۋەتى ەسكەرىلەدى. مۇنداي يكەمدى ءتاسىل سپورت سالاسىنا بولىنەتىن رەسۋرستاردى ءتيىمدى پايدالانۋعا جانە ەل كولەمىندە سپورتتى تەڭگەرىمدى دامىتۋعا ىقپال ەتەدى.
قۇجاتتاعى تاعى ءبىر ماڭىزدى جاڭالىق – «مۇگەدەكتىگى بار سپورتشىنى سۇيەمەلدەۋشى» ۇعىمىنىڭ زاڭنامالىق نەگىزدە بەكىتىلۋى. جاڭا نورما ءبىرىنشى توپ مۇگەدەكتىگى بار سپورتشىلارعا سپورتتىق جارىستار مەن ءىس-شارالارعا قاتىسۋ بارىسىندا رەسمي سۇيەمەلدەۋ قىزمەتىن پايدالانۋعا قۇقىق بەرەدى.
قازىرگى تاڭدا ەلىمىزدە مۇگەدەكتىگى بار ازاماتتاردىڭ جالپى سانى 700 مىڭنان اسادى, ونىڭ ىشىندە 98 مىڭنان استامى – بالالار. سۇيەمەلدەۋشى تۇلعاعا رەسمي مارتەبە بەرۋ – سپورتشىلاردىڭ جاتتىعۋ مەن جارىس ورىندارىنا قولجەتىمدىلىگىن ارتتىرۋ, ولاردىڭ قۇقىقتارىن قورعاۋ جانە ينكليۋزيۆتى سپورتتى دامىتۋ باعىتىندا ماڭىزدى قادام سانالادى.
