وسى كەلىسىمنىڭ ناتيجەسىندە تالشىقتى-وپتيكالىق بايلانىس جەلىسىن سالۋ جوباسى جوسپاردان ءبىر جىل ەرتە ىسكە اسادى. ياعني كەلەسى جىلدىڭ سوڭىنا دەيىن اياقتالادى. ال شالعاي اۋداندارداعى بايلانىس 2027 جىلدىڭ سوڭىنا دەيىن جەرسەرىكتىك بايلانىس ارنالارىمەن قامتىلادى.
وسىلايشا, اتالعان جوبا 2027 جىلدىڭ سوڭىنا قاراي ەلىمىزدەگى اۋىلداردىڭ 99 پايىزىن جىلدامدىعى جوعارى ينتەرنەتپەن قامتاماسىز ەتۋگە مۇمكىندىك بەرەدى. قىسقاسى, تاياۋ ارادا مەكتەپ, اۋرۋحانا, اكىمشىلىك عيمارات, بيۋدجەتتىك ۇيىمدار, سونداي-اق قوعامدىق كىرۋ نۇكتەلەرى مەن مەملەكەتتىك شەكارالارداعى 40-تان استام وتكىزۋ بەكەتى جەلىگە قول جەتكىزبەك. اۋىلدىق ەلدى مەكەندەردى تالشىقتى-وپتيكالىق (88%) جانە جەرسەرىكتىك ارنالار (12%) ارقىلى جەلىگە قوسادى.
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ءوز سوزىندە جوبا اياسىندا وڭىرلەردى دامىتۋعا تەڭ جاعداي جاسايتىن تسيفرلىق ىرگەتاس قالانعانىن جەتكىزدى.
«باستى مىندەتىمىز – اۋىلداردى ينتەرنەتكە قوسۋمەن قاتار, ەلدى مەكەندەردى ەلىمىزدىڭ تسيفرلىق ەكوجۇيەسىنە ەنگىزۋ. بۇل – ءبىلىم الۋ, مەديتسينا, مەملەكەتتىك قىزمەتتەرگە تەڭ دارەجەدە قولجەتكىزۋدىڭ نەگىزى. ينفراقۇرىلىم تۇراقتى جانە اشىق تۇردە جۇمىس ىستەگەندە, شاعىن بيزنەس, اۋىل مەكتەپتەرى مەن جاستارعا ارنالعان جاڭا كاسىپتىك باعىتتاردى دامىتۋعا جول اشادى», دەدى ول.
جوباعا قۇيىلعان ينۆەستيتسيانىڭ جالپى كولەمى 239 ملرد تەڭگەدەن اسادى. بۇل – بيۋدجەتتەن تىس قاراجات. ونى «قازاقتەلەكوم» اق ءىرى تەلەكوممۋنيكاتسيالىق ينفراقۇرىلىمىن پايدالانۋدىڭ ارقاسىندا جۇزەگە اسىرعان.
ال «قازاقتەلەكوم» اق باسقارما توراعاسى باعدات مۋسين اۋىل مەن قالا بالاسىنىڭ مۇمكىندىگى ءبىلىم الۋ, ءوزىن-ءوزى دامىتۋ مەن زاماناۋي تەحنولوگيانى پايدالانۋدا تەڭ دارەجەدە بولۋعا ءتيىس ەكەنىن ايتتى.
ء«بىز تسيفرلىق تەڭسىزدىكتى جويۋدى شالعايداعى اۋىلداردان باستادىق. ينتەرنەتكە قول جەتكىزۋ – قاجەتتىلىك. ونى ەل پرەزيدەنتى ناقتى ايتقان بولاتىن», دەدى ب.مۋسين.
سونداي-اق جوبا شەڭبەرىندە اۋىلداعى ۇيالى بايلانىس بازالىق ستانسالارىنىڭ ينفراقۇرىلىمى كۇشەيتىلەدى. بۇل نىساندارعا دەيىن جەتكىزىپ تالشىقتى-وپتيكالىق جەلىنى توسەۋ ءموبيلدى ينتەرنەت پەن بايلانىستىڭ ساپاسىن ەداۋىر ارتتىرادى.
ازات ەسەن
