ەڭبەك دەمالىسىن العان سايىن ادام ىشكى تىنىشتىقتى ىزدەيدى ەمەس پە؟ بىرەۋ شەتەلگە, بىرەۋ تەڭىزگە قاراي جول تارتادى. ال ءبىز بۇل جولى باياناۋىلعا بەت بۇردىق. جاي عانا تابيعاتقا تامسانىپ, قىدىراتىن ەمەس, رۋحاني وي تۇيەتىن تۋر ىزدەدىك. ءسويتىپ جولىمىز «Oyorda» اتتى كىتاپقۇمار جاستارمەن ءتۇيىستى.
ساپار كەزىندە جاي عانا ۋاقىت وتكىزبەي, «Oyorda» قاۋىمداستىعىنىڭ پرەزيدەنتى ەرداۋلەت قۇرالمەن اڭگىمە وربىتتىك. ءبىلىم مەن رۋحانياتقا ەرەكشە كوڭىل بولەتىن جاس ماماندىعى بويىنشا ينجەنەر-جوبالاۋشى بولىپ شىقتى. ونىڭ كىتاپقا دەگەن ىنتا-ىقىلاسى جاستاردى ىزدەنىسكە جەتەلەيتىن ورتا قالىپتاستىرۋعا يتەرمەلەگەن. ناتيجەسىندە, ءوزى سەكىلدى جاناشىر قاتارلاستارىمەن بىرلەسە بىلتىر جىل باسىندا «Oyorda» قاۋىمداستىعىن قۇرعان.
– بۇل ءىستى قانداي دا ءبىر ۋاقىتشا اۋەستىك جەتەگىندەگى ۇستانىممەن ەمەس, ماقسات-مىندەتى ايقىن, ومىرشەڭ جوبا بولادى دەگەن نيەتپەن باستادىق. ءبىر توپ جاس بەلسەندىنى تارتىپ, رەسمي تۇساۋكەسەرىن جاساپ, اياقتاپ الدىق. بۇگىندە, مىنە ءبىر جارىم جىل ىشىندە تەك كىتاپ وقۋدى ناسيحاتتايتىن ورتادان جاس بۋىننىڭ تۇلعالىق دامۋىنا سەپ بولاتىن, تاربيەلەيتىن تۇعىرلى ورداعا اينالدىق. باستاپقىدا بەكىتىلگەن ەرەجەگە سايكەس «Oyorda» ءۇش ايلىق ماۋسىمدى قامتيدى. وسى ارالىقتا وقىرماندار تۇلعالىق دامۋ, ىسكەرلىك ادەبيەت, كوركەم شىعارما سىندى ءار جانرعا ساي, بىرنەشە توپقا ءبولىنىپ, باعىتىنا قاراي كىتاپ وقيدى. كەيىن سول تۇيگەندەرىن توپپەن جۇزدەسىپ, بىرلەسە تالقىلايدى. ارقايسىسى جەكە-جەكە ويىن ورتاعا سالىپ, كوپ الدىندا ءسوز سويلەيدى. وسىلايشا, ازاماتتاردا كەيىپكەرلەردى سارالاۋ, وقيعانى تالداۋ, سىني ويلاۋ, ءسوز ساپتاۋ دەگەن سەكىلدى داعدىلار قالىپتاسادى, – دەيدى ە.قۇرال.
ءبىر ەرەكشەلىگى – جاس وقىرماندار كلۋبىنا مۇشە بولۋ اقىلى. ماۋسىمدىق باعاسى – شامامەن 12 مىڭ تەڭگە. بىراق بۇدان تارتىنىپ جاتقان ستۋدەنتتەر جوق. قازىردىڭ وزىندە ويلى جاستار ورداسىندا 300-گە تارتا كىتاپقۇمار وقىرمان بار. قاۋىمداستىق پرەزيدەنتى ءتىپتى ماۋسىمعا تىركەۋگە ۇلگەرمەي قالعاندار قانشا اقشا ۇسىنسا دا توپقا قوسىلمايتىنىن ايتتى. ويتكەنى «Oyorda»-نىڭ باستى كرەدوسى – جاۋاپكەرشىلىك.
– بىزدە بەكىگەن ناقتى جۇيە بار. تەك ونى ۋاقىتقا ساي, جاڭالاپ وتىرامىز. قاۋىمداستىققا مۇشە وقىرمانداردى قاداعالاپ وتىراتىن ۇيىمداستىرۋشىلار بولادى. ولار ەڭبەكاقى المايدى, ەرىكتىلىك نەگىزدە جۇمىس ىستەيدى. الايدا كلۋبتاعى ءار ۇيلەستىرۋشىدەن جۇيەنىڭ جۇيەلى جۇمىس ىستەۋى ءۇشىن نيەت پەن ەرەكشە جاۋاپكەرشىلىك تالاپ ەتىلەدى. بۇل دا ءبىر جاقسى ادەت قالىپتاستىرۋدىڭ كىلتى, – دەيدى ول.
اڭگىمە بارىسىندا بايقاعانىمىزداي, قاۋىمداستىقتىڭ اياسى – كەڭ. كىتاپ تالقىلاۋدان بولەك جاستار نەشە ءتۇرلى كۋيزدەر, مادەني كەشتەر, ساياحات پەن تۋرنيرلەر ءجيى ۇيىمداستىرادى. مەن وسى «Oyorda Sapar» جوباسىنا ىلىگىپپىن. باستاما ەلىمىزدىڭ ءتۇرلى ايماقتارىنداعى تاريحي-مادەني جەرلەرىمەن تانىسۋ ارقىلى جاس بۋىننىڭ تانىم كوكجيەگىن كەڭەيتۋدى كوزدەيدى. بۇعان دەيىن ويوردالىقتار قاراعاندى, الماتى قالاسى مەن كوكشەگە ساپارلاپ كەلگەن.
ال «Oyorda Talks» اياسىندا قازاق ءتىلدى ۇزدىك ماماندار مەن جوبا اۆتورلارى, زيالى قاۋىم وكىلدەرى سپيكەر رەتىندە شاقىرىلىپ, يدەيا الماسادى. «Cash Flow» بولسا, جاستاردىڭ قارجىلىق ساۋاتىن ارتتىرىپ, ينۆەستيتسيا, كاسىپكەرلىك شەشىمدەر مەن اقشا باسقارۋ داعدىلارىن قالىپتاستىرۋعا ارنالعان. بۇدان بولەك جايلى اتموسفەرادا كوفە ءىشىپ, كىتاپ وقۋعا ارنالعان «Oyorda Kitap & Kofe» بار.
– بۇل استانانىڭ وڭ جاعالاۋىندا ورنالاسقان كوفەتەري. مۇندا دا اپتاسىنا بىرنەشە رەت كىتاپ تالقىلارى, ءتىل كلۋبتارى, مادەني-تانىمدىق كەزدەسۋلەر, ادەبي كەشتەر ءوتىپ تۇرادى. ءىس-شارالارعا كەز كەلگەن ادام كەلە الادى, ياعني ءبىزدىڭ قاۋىمداستىق مۇشەسى بولۋى مىندەتتى ەمەس. ايتا كەتەرلىگى, قازىر ءبىز ەل بويىنشا تاعى ەكى جوبانى باستاپ جاتىرمىز. بىرەۋى – كىتاپ وقۋ, ەكىنشىسى – ءجۇرۋ جانە جۇگىرۋ مارافونى. باستامالارداعى ەرەكشەلىك, بىرىندە قاتىسۋشىلار ارنايى اۋديو كىتاپتى سىيلىققا الادى, ەندى بىرىندە اقىن-جازۋشىلارمەن ونلاين كەزدەسۋ ۇيىمداستىرىلادى. ازىرگە ءجۇرۋ جانە جۇگىرۋگە ارنالعان جوبا باستالىپ, العاشقى ايدا استانا, الماتى, قاراعاندى, اقتاۋ قالاسىنان 40-تان استام ازامات تىركەلدى, – دەپ ويىن تۇيىندەدى ە.قۇرال.
وسىلايشا, التى جارىم ساعاتتى ارتقا تاستاپ, استانا-پاۆلودار تاس جولىمەن باياناۋىلعا جۇيتكىپ جەتتىك. جولدىڭ كەيبىر تۇسى جوندەلىپ جاتقانى بولماسا, ساپاسىندا ءمىن بولمادى. تۋر باعدارلاماسىنا سايكەس الدىمەن جاسىباي كولىنەن ءۇش شاقىرىم جەردە باياناۋىلدىڭ بيىك شوقىلارىنىڭ بىرىندە ورنالاسقان قوڭىر اۋليە ۇڭگىرىنە باردىق. كەيىن ء«ا» دەگەننەن باياناۋىل ۇلتتىق پاركىنە كىرىپ, تابيعاتىنا تامسانىپ, كەمپىرتاسقا تاڭداي قاقتىق. ءارى قاراي سۇلتانماحمۇت تورايعىروۆ اۋىلىنداعى بۇلاق باسىنان سۋ ءىشىپ, كينورەجيسسەر شاكەن ايمانوۆ ەسكەرتكىشىنە, اكادەميك قانىش ساتباەۆ مۋزەيىنە, ءماشھۇر ءجۇسىپ كەسەنەسىنە اياق باستىق. جول بويى سوزبەن سيپاتتاي المايتىن سۇلۋ سۋرەت تۇرعاندا شەتەلگە نە ءۇشىن شابىلىپ ءجۇرمىز دەپ ءبىر ويلاندىق.
مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ «ادال ادام – ادال ەڭبەك – ادال تابىس» اتتى ءۇشىنشى وتىرىسىندا الەۋمەتتىك, شارۋاشىلىق, يدەولوگيالىق جانە باسقا دا سالالارداعى باعدارىمىزدى ايقىنداپ, ناقتى شارالاردى قولعا الۋىمىز كەرەكتىگىن باسا ايتقان ەدى. پرەزيدەنت ءسوز اراسىندا جاستاردى كىتاپ وقۋعا باۋلىپ, جاپپاي كىتاپ وقيتىن ۇلتقا اينالۋ ماڭىزدى فاكتورلاردىڭ ءبىرى ەكەندىگىن تىلگە تيەك ەتتى. وسى ورايدا كىتاپ وقۋ مادەنيەتىن قوعامدا ورنىقتىرۋعا اتسالىسىپ جۇرگەن «Oyorda» وقىرمان قاۋىمداستىعى تاپسىرمانى ءىلىپ اكەتكەندەي.
