2021–2022 جىلدارى ايالاعا وڭاي بولعان جوق. اياعىنداعى جاراقاتى ونىڭ كاسىبي مانسابىنا توقتاۋ سالىپ, تاتاميدەن ۋاقىتشا الىستاۋىنا تۋرا كەلدى. بالا كۇنىنەن دزيۋدومەن تىنىستاپ وسكەن ۇلكەن جۇرەكتىڭ يەسى ارمانىنان باس تارتپادى. ەكى جىل بويى ىشتەي كۇرەسىپ, دزيۋدوعا دەگەن قۇشتارلىعى مەن وتباسىنىڭ قولداۋىنىڭ ارقاسىندا تاتاميگە قايتا ورالدى.
تاعدىر ايالانى بىردە ماڭدايىنان سيپاسا, ەندى بىردە سىناپ تا كوردى. اياعىنان العان اۋىر جاراقات ونىڭ سپورتتاعى جولىن بوگەپ, ۇلكەن ۇزىلىسكە ءماجبۇر ەتتى.
«جاراقاتىما دەيىن دزيۋدودان وتكەن حالىقارالىق جارىستاردا سىنعا ءتۇسىپ شىڭدالدىم. اتتەڭ, ناعىز جۇلدىزدى شاعىم باستالدى-اۋ دەگەندە, تاعدىر اياعىمنان شالىپ, سۇيىكتى ىسىمنەن ايىردى. سول كەزەڭدە دوستارىمنىڭ قاتارى ازايىپ, ورتام سيرەدى. ءتىپتى كەيبىر جاتتىقتىرۋشىلارىم مەنى دزيۋدونىڭ ماڭىنا جولاتقىسى كەلمەدى. كوڭىلىمە كەلگەنى دە وسى – ساۋ كەزدە ءبارى كوتەرەدى, باسىڭا ءىس تۇسسە ەشكىمگە كەرەگىڭ بولماي قالادى ەكەن. قارجىلاي كومەك كورمەگەن سوڭ, ۋاقىتىندا ەم-دومىمدى الۋعا قولىم قىسقا بولدى. قيىن ساتتە قاسىمنان تابىلعان تەك اتا-انام عانا, ول كىسىلەرگە ايتار العىسىم شەكسىز», دەيدى ايالا, كەشەگى كۇندەردى كوزى جاسقا تولا وتىرىپ ەسكە الىپ.
ايالا ءبىر جارىم جىلدان اسا ۋاقىت جارىستاردان شەت قالىپ قويعانىنا قاراماستان, سپورتتان ءوز ورنىن قايتا تابۋعا بەكىنەدى. پاريج وليمپياداسىنا بىرنەشە اي قالعاندا پارادزيۋدو تۋرالى ەستىپ, جان-جاقتى زەرتتەپ, قۇربىسى اقمارال ناۋاتبەكتەن كەڭەس سۇراپ, تاتاميگە ورالادى. وسىلايشا, ايالا العاشقى قادامىنان-اق ءتورت جىلدا ءبىر وتەتىن الەمدىك دوداعا جولداما جەڭىپ الدى.
«ەكى جىلدىق ۇزىلىستەن كەيىن پاريج ويىندارىنا بارىپ, بوزكىلەمدە كۇرەسۋ مەن ءۇشىن كۇتپەگەن جەتىستىك بولدى. فرانتسۋز حالقى سپورتتى «كلاسسيكالىق» نەمەسە «پارا» دەپ بولمەيدى ەكەن. بارلىق ادامنىڭ مۇمكىندىگىن تەڭ سانايدى. ونى پاراليمپيادا ويىندارىندا انىق بايقادىم. تاتاميدەگى ەكى سپورتشىعا مىڭداعان ادام قولداۋ ءبىلدىردى. بۇعان دەيىن وسىنشاما جانكۇيەرگە بويىم دا, كوزىم دە, قۇلاعىم دا ۇيرەنبەگەندىكتەن, قاتتى تولقىدىم. الەمدىك دەڭگەيدە ونەر كورسەتۋ بىلاي تۇرسىن, جۇزدەگەن مەملەكەتتەن جينالعان حالىقتىڭ الدىندا كۇش سىناسۋدىڭ وزىنە پسيحولوگيالىق تۇرعىدا دايىندىق كەرەك ەكەن. قازاق جانكۇيەرلەرىنە ناليتىنىم – پاراسپورتقا كوپ جانكۇيەرلىك تانىتا بەرمەيدى. مامىردا استانادا وتكەن الەم چەمپيوناتىندا بۇل ولقىلىق قاتتى بايقالدى», دەيدى قايسار قىز ىشكى وكىنىشىن جاسىرا الماي.
بىلتىر پاريجدەن ەلگە ورالعان سوڭ, ايالا دەنساۋلىعىنا كوڭىل ءبولىپ, اياعىنا وپەراتسيا جاساتتى. جارتى جىلداي تىنىعىپ, جاتتىعۋعا قايتا كىرىستى. جۋىردا استانا تورىندە وتكەن پارادزيۋدودان الەم چەمپيوناتىنا قاتىسىپ, كۇمىس جۇلدە يەلەندى. فينالدا پاراليمپيادانىڭ ەكى دۇركىن چەمپيونى, برازيليالىق الانا مالدونادوعا ەسە جىبەردى.
كوماندالىق تارتىستا ۇلتتىق قۇرامامەن بىرگە الەم چەمپيونى اتاندى. جاھاندىق دودا كەزىندە جاراقاتىنان قۇلان تازا ايىقپاعان ەدى. قۇربىسىنىڭ جاعدايىن جاقسى بىلەتىن پاريج پاراليمپياداسىنىڭ چەمپيونى اقمارال ناۋاتبەك وعان ىرىمداپ ءوز ش ۇلىعىن كيگىزىپ جىبەرىپتى. سپورت الەمىندە ەل نامىسىن قورعاپ جۇرگەن قوس ارۋدىڭ بۇل جاراستىعى – ناعىز دوستىقتىڭ ۇلگىسى.
ايالانىڭ ءار بەلدەسۋى – ءتوزىم مەن تاباندىلىقتىڭ كورىنىسى, كوپتەگەن جاس سپورتشىعا ۇلگى. قايسار قىز الداعى ۋاقىتتا لوس-اندجەلەستە وتەتىن وليمپيا ويىندارىندا كوك تۋىمىزدى كوككە جەلبىرەتىپ, ءانۇرانىمىزدى شىرقاتقىسى كەلەدى.
ارۋجان ابايقىزى,
ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى
