سۋرەتتەر باياناۋىل اۋدانى اكىمىنىڭ ءباسپاسوز قىزمەتىنەن الىندى
جالپى اۋماعى 4,5 مىڭ شارشى مەتردەن اساتىن سپورت عيماراتىنىڭ ەرەكشەلىگى كوپ. مۇندا بوكس, كۇرەس, ۇستەل تەننيسى, ۆولەيبول, باسكەتبول, جاتتىعۋ زالدارى, شاعىن فۋتبول, ستريتبول الاڭدارى بار. بۇعان قوسا ساداق اتۋعا, ينتەللەكتۋالدىق ويىنعا ارنالعان, تاعى باسقا دا زالدار ورنالاسقان. ەڭ باستىسى, اۋداننىڭ سپورتتىق ينفراقۇرىلىمىندا تاۋەلسىزدىك جىلدارىنان بەرى العاشقى ءجۇزۋ باسسەينى اشىلىپ وتىر. 25ح11 كولەمدى, 4 جولاقتى باسسەين كەنت تۇرعىندارىنىڭ بارلىعىنا قولجەتىمدى بولادى. ونىڭ قۇرىلىسىنا زامانعا ساي ماتەريالدار پايدالانىلىپ, ەۋروپالىق ۇلگىدەگى جابدىقتار ورناتىلعان. سۋ قۇيىلمالى جۇيەمەن ۇنەمى اينالىپ تۇرادى. مۇنداي باسسەيندەر ۇزاق جىلعا شىدايدى ءارى سۋعا تۇسۋشىلەرگە بارىنشا قاۋىپسىز.
كەشەننىڭ اشىلۋىنا پاۆلودار وبلىسىنىڭ اكىمى اسايىن بايحانوۆ قاتىسىپ, جەرگىلىكتى جۇرتشىلىقتى كوپتەن كۇتكەن يگىلىكپەن قۇتتىقتادى.
– ۇلىلاردىڭ مەكەنى, قايماعى بۇزىلماعان باياناۋىل جەرىندە وسىنداي تاماشا, زامانعا ساي سپورت كەشەنى اشىلىپ وتىرعانىنا قۋانىشتىمىز. اۋداننىڭ تابيعاتى سۇلۋ بولعانىمەن, ينفراقۇرىلىمىن جاڭعىرتۋدا شەشىمىن كۇتكەن ماسەلەلەر بارشىلىق. سول تۇرعىدا بۇگىنگى جاڭا نىسان سول باتالى ىستەردىڭ باستاماسى عانا. حالقىمىزدا «تۋعان جەرگە قامقورلىق – ۇلتقا قامقورلىق», دەگەن قاناتتى ءسوز بار. ءوڭىر بيلىگى تۇرعىندارعا بەرگەن ۋادەسىن ءاردايىم ورىندايدى. وسىدان ەكى جىل بۇرىن اۋدانداعى جاس ۇرپاق وكىلدەرىنە سپورت كەشەنىن سالىپ بەرەمىز دەپ ۋادە ەتكەنبىز. بۇگىن سونىڭ ناتيجەسىن كورىپ وتىرمىز. جاڭا سپورت كەشەنى الەمگە تانىمال سپورت مايتالماندارىن تاربيەلەپ شىعارادى دەگەن سەنىمدەمىز, – دەپ اتاپ ءوتتى ءوڭىر باسشىسى.
امبەباپ سپورت كەشەنى ەرتىس-بايان وڭىرىندە تۇڭعىش رەت اشىلىپ وتىر. قۇرىلىسىنا 2,8 ملرد تەڭگە قاراجات جۇمسالعان.
– مۇنداي الەۋمەتتىك ماڭىزدى جوبانى اۋدان حالقى ۇزاق جىل كۇتكەن ەدى. ويتكەنى بۇقارالىق سپورتتى دامىتىپ, حالىقتى سالاماتتى ءومىر سالتىنا باۋليتىن مۇمكىندىكتەر از بولدى. وسى ولقىلىقتىڭ ورنىن تولتىراتىن سپورت كەشەنىنە باياناۋىلعا كىرە بەرىستەن جەر تاڭدالعانى دا قۋانتادى. سەبەبى بۇل اۋماقتا سپورت نىساندارى جوق. اۋدان باسىندا ءبىر عانا سپورت كەشەنى بار, ونىڭ ءوزى كۇرەس تۇرلەرى مەن بوكسقا ارنالعان. جالپى, سپورت مەكتەبىندە 600-دەن استام بالا شۇعىلدانسا, ەندى ولاردىڭ قاتارى تاعى 200 بالاعا كوبەيەدى. سۋدا ءجۇزۋ, ۆولەيبول, باسكەتبول, شاعىن فۋتبول, ساداق اتۋ سەكتسيالارى جۇمىس ىستەي باستايدى. بۇعان دەيىن ۆولەيبولشىلارىمىز شاعىن زالدا جاتتىعىپ جۇرگەن. ولاردىڭ اراسىندا بەس ءجاسوسپىرىم ەلىمىزدىڭ چەمپيونى. ءجۇزۋ سپورتىن دامىتۋعا دا مۇمكىندىك تۋدى. اۋداندا بۇگىندە 9 مىڭنان استام ادام (تۇرعىنداردىڭ 39%-ى) سپورتپەن تۇراقتى شۇعىلدانادى, – دەيدى باياناۋىل اۋدانى دەنە شىنىقتىرۋ, سپورت جانە تۋريزم ءبولىمىنىڭ باسشىسى زەينوللا ءتالىپوۆ.
قازىردە اۋداندا 15 سپورت تۇرىنەن ۇيىرمە بار. ەندى ولاردىڭ قاتارى ەسەلەنە تۇسەدى. جەرگىلىكتى سپورت مەكتەبى سپورتقا بەيىم بالالاردى 6 جاسىنان قابىلداي بەرەدى.
پاۆلودار وبلىسى
