كراسنويار اۋىلىندا وسىعان وراي ارنايى ءراسىم ۇيىمداستىرىلىپ, وعان جاۋىنگەردىڭ 90-عا تاياعان قىزى نۇرزيا تاڭقىبايقىزى قاتىستى. تاڭقىباي يمانبەردين 1900 جىلى بۇرىنعى كوكشەتاۋ وبلىسى, كوكشەتاۋ اۋدانىنا قاراستى بيىكتەسىن اۋىلىندا دۇنيەگە كەلگەن. سوعىس باستالعاندا بوزبالا ەكى باۋىرىمەن بىرگە وتاندى جاۋدان قورعاۋعا اتتانعان. ەكى باۋىرى دا سول سوعىستا قازا تاۋىپ, ءىز-ءتۇزسىز جوعالىپ كەتكەن.
– بۇل جاي عانا توپىراق ەمەس, ەرلىك پەن تاعدىردىڭ ءۇنسىز كۋاسى, – دەيدى جاۋىنگەردىڭ نەمەرەسى عاليا راحىمبەرلينا, – ءبىر ۋىس توپىراق جۇرەگىمىزدە بارشامىزعا اتامىزدىڭ ەرلىگىن, وتانعا دەگەن سۇيىسپەنشىلىگىن, جانكۇيەر پاتريوتتىق سەزىمىن جۇرەگىمىزگە ۇيالاتادى. بۇگىن ءبىر ۋىس توپىراقپەن اتامىزدىڭ اتى ەلىنە, تۋعان جەرىنە قايتىپ ورالدى.
تاڭقىباي يمانبەردين 228-ءشى اتقىشتار پولكىنىڭ قۇرامىندا جاۋمەن شايقاسقان. سوعىسقا اتتانعاندا جۇبايى كۇلبارام قولىندا ەكى قىزىمەن قالىپتى. جىلدار وتە كەلە سول ۇرپاقتارى جەرگىلىكتى بيلىك پەن اسكەري مەكەمەلەرگە جۇگىنىپ, جاۋىنگەر تۋرالى اقپارات ىزدەي باستايدى. ءدال وسى ساتتە كومەككە «كوكشە-ىزدەۋ» اسكەري-پاتريوتتىق ىزدەستىرۋ كلۋبى كەلگەن. جىلدىڭ باسىندا وتباسى كارەليا رەسپۋبليكاسىنىڭ سۋويارۆي قالاسىندا ورنالاسقان ۇلكەن قابىردەن ءبىر ۋىس توپىراق الىپ كەلدى.
بۇل ءراسىم – ۇرپاقتىڭ اتا-باباسىنىڭ الدىنداعى پارىزى, تاريحقا قۇرمەت, ەل مەن ەردىڭ اراسىنداعى كيەلى بايلانىستىڭ كورىنىسى. وتان ءۇشىن وت كەشكەن ارداقتىلاردىڭ رۋحى ەل جۇرەگىندە ماڭگى ساقتالادى.
كوكشەتاۋ.
