فوتو: اشىق دەرەككوز
اناسىنىڭ ايتۋىنشا, بالاسى سيرەك كەزدەسەتىن مي اۋرۋى مەن ەپيلەپسيادان زارداپ شەگەدى. سوڭعى ءبىر جارىم جىل بويى رەميسسيادا بولعانىمەن, 2025 جىلدىڭ مامىر ايىندا تاعى دا ۇستاما قايتالانعان. وسىدان كەيىن اناسى بالاسىنا بەرىلگەن «دەپاكين» سيروپىنىڭ جارامدىلىق مەرزىمى ءوتىپ كەتكەنىن انىقتاعان.
وبلىستىق دەنساۋلىق ساقتاۋ باسقارماسىنىڭ مالىمەتىنشە, پرەپارات 2024 جىلدىڭ 31 جەلتوقسانىندا بەرىلگەن. ولاردىڭ ايتۋىنشا, اناسىنا 1414 قىزمەتى ارقىلى حابار بەرىلگەن, سونداي-اق بىرنەشە رەت تەلەفون ارقىلى بايلانىسۋعا ارەكەت جاسالعان.
«اناسى بۇل پرەپاراتتى سول كەزدە الماعان, سەبەبى بۇعان دەيىن بەرىلگەن ءدارى جەتكىلىكتى بولعان. ول تەك 2025 جىلعى 23 مامىردا كەلىپ, ءدارىنى العان. سول كەزدە مەدبيكە جارامدىلىق مەرزىمىنە ءمان بەرمەي قالعان», دەلىنگەن رەسمي تۇسىنىكتەمەدە.
بالانى تاربيەلەپ وتىرعان انا بۇل مالىمدەمەمەن مۇلدە كەلىسپەيتىنىن ايتقان.
«كوشە بويىندا كورشىلەس ۇيدە تۇرىپ جاتقان ادامدى تاپپادىق دەگەنگە كىم سەنەدى؟ بالامنىڭ دەنساۋلىعى ءۇشىن كۇن-ءتۇن ۇيدە وتىرامىن, ءدارىنى الماۋىم مۇمكىن ەمەس. بۇل جۇيەگە دەگەن سەنىمنىڭ بۇزىلۋى. ەگەر ءدارى بەرىلسە, ول قولدانۋعا جارامدى بولۋى ءتيىس», دەدى ول.
وبلىستىق دەنساۋلىق ساقتاۋ باسقارماسى قىزمەتتىك تەكسەرۋ باستالعانىن حابارلادى. ۋچاسكەلىك مەدبيكە جۇمىستان ۋاقىتشا شەتتەتىلگەن. ديستسيپلينارلىق كەڭەس وتىرىسى ونىڭ قىزمەتكە سايكەستىگىن انىقتايتىن بولادى.
ۆەدومستۆو وكىلدەرى قازىرگى ۋاقىتتا بالا تولىق كولەمدە قاجەتتى دارىمەن قامتاماسىز ەتىلگەنىن اتاپ ءوتتى.
ايتا كەتەيىك, قازاقستاندا قازىرگى ۋاقىتتا ءدارى-دارمەك باعاسىن رەتتەۋدىڭ جاڭا ەرەجەلەرى ەنگىزىلىپ جاتىر.
