قازاقستان ەكونوميكاسى سوڭعى 30 جىلدا ءبىرشاما باعدارلاما قابىلداپ, ءتۇرلى دامۋ ۇلگىلەرىن ۇستانۋعا تىرىستى. ەكونوميست ايبار ولجاەۆتىڭ ايتۋىنشا, بۇل جىلدار ىشىندە مۇناي تابىسىن ىشكى ءوندىرىستى وركەندەتۋگە باعىتتاۋ نەگىزگى ماقسات بولعانىمەن, جەمقورلىق پەن جۇيەسىزدىك سول ارمانداردىڭ جۇزەگە اسۋىنا كەدەرگى كەلتىردى.
ونىڭ پايىمىنشا, سوڭعى جىلدارى عانا وڭدەۋ ونەركاسىبىمىزدى قولعا الىپ, شىن مانىندە قولىمىزدان كەلەتىن باعىتتاردى باستى ورىنعا قويىپ جاتىرمىز.
قازاقستاننىڭ نەگىزگى ارتىقشىلىعى — وڭدەۋ, تاسىمالداۋ جانە اۋىل شارۋاشىلىعى ونىمدەرىن قايتا وڭدەۋ سالالارىندا ەكەنىن مويىنداۋ, ەكونوميكالىق ساياساتتى سول ارناعا بۇرۋ – ۋاقىت تالابى. ولجاەۆتىڭ ايتۋىنشا, ەل بۇگىندە وسى باعىتتا ناقتى ىلگەرىلەۋدى باستاعان.
«بىزدە ۇيالى تەلەفون, چيپ جاسايمىز دەگەن ارمان بولعان. بىراق ونداي دۇنيە ءبىزدىڭ قولىمىزدان كەلمەيتىنىن تۇسىندىك. ءبىزدىڭ قولىمىزدان كەلەتىنى - ماشينا قۇراستىرۋ, اۋىل شارۋاشىلىعىنداعى شيكىزاتتى الىپ, بيداي وڭدەۋ, اۋىل شارۋاشىلىعىنا قاتىستى بەلگىلى ءبىر يننوۆاتسيالار ەنگىزۋ. مۇنايدى, مەتاللداردى شيكىزات رەتىندە ەمەس, ولاردان بەلگىلى ءبىر قورىتپا جاساپ, دايىن ونىمدەر دايىنداۋ. سيرەك كەزدەسەتىن مەتالداردى قايتا وڭدەۋ. تاماق جاساۋ كلاستەرىندە مايونەز, ماكارون ونىمدەرىن شىعارۋ سياقتى قولىمىزدان كەلەتىن سالالاردى تاڭداپ, دامىتا باستادىق. سوندىقتان سوڭعى جىلى ءبىزدىڭ ەكونوميكالىق وسىمىمىزدە وڭدەۋ ونەركاسىبى الدىڭعى قاتارعا شىقتى. قازىر قىتايداعى قۇرلىق جۇكتەرىنىڭ 80 پايىزىن قازاقستان ءوزىنىڭ تەمىر جولى ارقىلى تاسىپ جاتىر. وسى ءبىزدىڭ قولىمىزعا تيگەن مۇمكىندىك بولدى», دەيدى ايبار ولجاەۆ.
ونىڭ ايتۋىنشا, ءبىز كەزىندە سينگاپۋر ەلىنىڭ ەكونوميكاسىن وزىمىزگە ۇلگى ەتتىك. حولدينگتەردىڭ بارلىعى سينگاپۋردىڭ مودەلىمەن قۇرىلدى. بۇل وتە جاقسى مودەل, بىراق, ء«بىز قانشالىقتى سينگاپۋردىڭ مودەلىنە ۇقساس دۇنيە ىستەي الدىق؟» بۇل جاعى ازىرگە سۇراق تۋىنداتادى. تاعى ۇلگى رەتىندە مالايزيانى قاراساق تا بولادى.
ساراپشى ينفلياتسيا ماسەلەسىن دە اينالىپ وتپەدى. مەملەكەت ەكونوميكاعا كوبىرەك اقشا قۇيا باستاسا ينفلياتسيا مىندەتتى تۇردە ارتادى. سونداي-اق بىزدە ءرۋبلدىڭ ينفلياتسياسىنا تاۋەلدىلىك بار. رەسەيلىك ينفلياتسياعا قاراپ وتىرامىز.
«تۇراقتىلىقتى ساقتاپ قالۋ ءۇشىن بىزگە رەسەيدەن يمپورتتى قىسقارتىپ, ءوزىمىزدىڭ ازىق-ت ۇلىك, اسىرەسە قانت, ءسۇت ونىمدەرى ماسەلەسىن جابۋ كەرەك. ايتپەسە, ءبىز ينفلياتسيامەن وتىرا بەرەمىز. ۇلتتىق بانك پەن ۇكىمەت بەلگىلى ءبىر ۇيلەسىمدىك تابۋعا تىرىسادى. بازالىق مولشەرلەمەنىڭ جوعارى بولعانى ۇكىمەتكە وتە ءتيىمسىز. ويتكەنى ىشكى قارىز الۋ ستاۆكالارى جوعارى, شىعىندار كوپ. بىراق ۇلتتىق بانك بازالىق ستاۆكانى جوعارى ۇستاماسا ينفلياتسيا ءورشىپ كەتەدى, سوندىقتان ولار ەكى جاققا دا قولايلى بازالىق مولشەرلەمەنى تاڭداۋعا تىرىسادى», دەيدى ساراپشى.
