استانادا «ورتالىق ازيا – قىتاي» ەكىنشى ءسامميتى اياسىندا ءوتىپ جاتقان گۋمانيتارلىق فورۋمنىڭ جۇمىسى باستالدى. ءىس-شارانى باس ديرەكتور شەن حايسيۋن مىرزا باستاعان قىتاي مەدياكورپوراتسياسى مەن قازاقستان رەسپۋبليكاسى پرەزيدەنتىنىڭ تەلەراديوكەشەنى ۇيىمداستىردى. فورۋم جۇمىسىنا قازاقستان, قىتاي, قىرعىزستان, تاجىكستان, تۇرىكمەنستان جانە وزبەكستان ەلدەرىنىڭ مەملەكەتتىك ورگاندارى مەن جەتەكشى مەدياقۇرىلىمدارىنىڭ باسشىلارى قاتىستى.
مەملەكەتتىك كەڭەسشى ەرلان قارين قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قۇتتىقتاۋ حاتىن وقىپ بەردى.
«قازاقستان مەن قىتاي اراسىنداعى ىنتىماقتاستىق تاتۋ كورشىلىك جانە ماڭگى دوستىق رۋحىندا دامىپ كەلەدى. تەرەڭنەن تامىر تارتاتىن شىنايى سەرىكتەستىگىمىز بۇگىندە ستراتەگيالىق سيپات الىپ, مۇلدە جاڭا دەڭگەيگە كوتەرىلدى. مادەنيەت – حالىقتار مەن وركەنيەتتەردى جالعايتىن التىن كوپىر. ەكى ەلدىڭ بىرلىگىن بەكەمدەۋ جولىندا مادەني-گۋمانيتارلىق بايلانىستار ايرىقشا ءرول اتقارادى. سوندىقتان ءبىز وسى باعىتتاعى ءوزارا ىنتىماقتاستىعىمىزدى كۇشەيتۋگە ەرەكشە ءمان بەرەمىز», دەلىنگەن حاتتا.
سونداي-اق مەملەكەتتىك كەڭەسشى ەلىمىزدە پرەزيدەنت قاسىم-جومارت توقاەۆتىڭ باسشىلىعىمەن الەۋمەتتىك-ەكونوميكالىق, ساياسي جانە مادەني-گۋمانيتارلىق سالالاردا جۇزەگە اسىرىلىپ جاتقان ماڭىزدى رەفورمالارعا توقتالدى.
ەرلان قارين اتالعان فورۋم ورتالىق ازيا ەلدەرى مەن قىتاي اراسىنداعى مادەني-گۋمانيتارلىق ىنتىماقتاستىقتى نىعايتۋعا تىڭ سەرپىن بەرەتىنىنە سەنىم ءبىلدىردى.
