تۇڭعىش رەت تاعايىندال-عان كىتاپ كۇنىمەن بىرگە, ەلدەگى ادەبي مۇرانى ساقتاۋ جانە دامىتۋ, ءتۇرلى بۋىن وكىلدەرىنىڭ كىتاپقا دەگەن تالعامىن زەردەلەپ, ادەبي قۇندىلىقتار جۇيەسىن سارالاۋ ماقساتىندا «eGov Mobile» قوسىمشاسى ارقىلى قازاق ادەبيەتىنىڭ ەڭ ۇزدىك 100 اۆتورىن انىقتاۋدى دىتتەگەن جالپىۇلتتىق ساۋالناما دا جاريالانعان بولاتىن.
وسىعان وراي الماتىداعى Meloman-Marwin كىتاپ دۇكەنىندە تانىمال باسپاگەرلەر – «Steppeworld» باسپاسىنىڭ جەتەكشىسى رايسا قادىر مەن «Ziyat» باسپاسىنىڭ باسشىسى اسىلان تىلەگەن وقىرماندارمەن جۇزدەسىپ, بۇگىنگە دەيىن جۇرگىزىلگەن ەلەكتروندىق ساۋالنامانىڭ ناتيجەسىن جاريا ەتتى. رايسا قادىردىڭ ايتۋىنشا, ماۋسىم ايىنىڭ ورتا شەنىنە دەيىن ساۋالناماعا 20 000 ادام قاتىسقان. «بۇل – وتە جاقسى كورسەتكىش. كىتاپ وقۋ مادەنيەتىن قايتا قالىپتاستىرۋ, جاقسارتۋ ماقساتىندا بۇل يگى باستامانى حالىق ءوزى قولداپ كەتتى. كىتاپ نارىعىنداعى وزگەرىستەردى ءجىتى باقىلاپ كەلەمىن, بايقاعانىم, سوڭعى بەس جىلدا ىلگەرىلەۋ بار. شەتەل اۆتورلارىن قازاق تىلىنە اۋدارۋ عانا ەمەس, ءوز ۇلتتىق ادەبيەتىمىزدىڭ كلاسسيكتەرىن, جاس جازۋشىلاردىڭ شىعارمالارىن جارىققا شىعارۋ بەلسەندى تۇردە قولعا الىندى. رۋحانياتتىڭ وركەندەۋىنە اسەرى كۇشتى بۇل باستالىپ جاتقان يگى باستاما بولاشاقتا ءوز ناتيجەسىن العا تارتادى», دەدى رايسا قادىر.
باسپاگەر «جاستار كىتاپ وقىمايدى» دەگەن جاتتاندى پىكىرمەن كەلىسپەيتىنىن ايتتى. كەرىسىنشە, سوڭعى ۋاقىتتا بالالارىنا ارنايى كىتاپ ىزدەپ كەلەتىن اتا-انالار قاتارى ارتقان. ءار بۋىن وقىرماننىڭ قىزىعاتىن ءوز اۆتورى بار. ونى وسى ساۋالناما بارىسىندا بەلسەندىلىگى ارتىپ كەلە جاتقان وقىرمان سيپاتىنىڭ ءوزى اڭعارتادى. «eGov Mobile» قوسىمشاسىندا 4 كىتاپقا دەيىن داۋىس بەرۋ كورسەتىلىپ, ساۋالناماعا قاتىسۋشى تەك 4 كىتاپتى تاڭداۋمەن شەكتەلىپ قالىپ جاتقانىمەن, باسپاگەرلەر ەندىگى جەردە ءار وقىرمان ءوزى قالاعان 10 كىتابىنا دەيىن داۋىس بەرە الاتىنىن جەتكىزدى. ول ءۇشىن «تاعى دا كىتاپ قوسۋ» دەگەن باتىرمانى باسىپ, ءارى قاراي سۇيىكتى كىتاپتارىن ەنگىزۋگە بولادى. جوبانىڭ ەرەكشەلىگى سول, ءدال وسى كەزەڭدە قاي اۆتوردىڭ شىعارماسى سۇرانىسقا يە ەكەنىن انىقتاپ, بۇرىن تانىمال بولماعان, بىراق قالام قۋاتى مىقتى اۆتورلاردى تانۋعا مۇمكىندىك بەرەدى ءارى ادەبيەت الەمىنە ەندى ەسىك اشقان جاس قالامگەرلەرگە جىگەر سىيلاپ, جۇرەگىنە سەنىم ۇيالاتادى.
«جالپىۇلتتىق ساۋالناما – ءار ساۋاتتى وقىرمان ءۇشىن سىن. جاستار كىتاپتى جاقسى كورەدى. بىراق نە وقۋ كەرەگىن بىلمەيدى. بۇل جوبا قانداي كىتاپتاردى وقۋ كەرەك دەگەن سۇراق تۋعاندا, كادەسىنە جارايتىن پايدالى ءتىزىم بولادى دەپ ويلايمىن. راسىندا, ىلگەرىدە ادەبي اينالىمعا تۇسە الماي قالعان, بىراق كەڭەستىك كەزەڭدە وقىرمانى كوپ بولعان تانىمال شىعارمالار ادەبيەتىمىزدە وتە كوپ. سولارعا جاڭا تىنىس بەرەتىن جوبا بولاتىنىنا سەنەمىن. بىراق تىزىمگە ەنۋ ءۇشىن ونى دا ەل تانۋى كەرەك. ساۋالناما تۋرالى ەستىمەي, بىلمەي جاتقان وقىرمانعا وسى تىلەگىمىز جەتسە ەكەن دەيمىز», دەيدى اسىلان تىلەگەن.
باسپاگەرلەر 23 شىلدەگە دەيىن جالعاساتىن قازاق ادەبيەتىنىڭ ۇزدىك 100 تۋىندىسىن انىقتاۋعا اتسالىسىپ, ادەبي تالعام قالىپتاستىرۋدا قالىس قالماي, بەلسەندىرەك بولا تۇسۋگە شاقىرىپ وتىر. 10 تامىز – اباي كۇنى ساۋالناما مارەسىنە جەتىپ, جوبا اياسىندا انىقتالعان 100 كىتاپتىڭ ءتىزىمى جارىق كورەدى. جۇزدەسۋ سوڭىندا بەس مىڭىنشى جانە ون ءبىر مىڭىنشى بولىپ قاتىسىپ, داۋىس بەرگەن ەكى وقىرمان ورتاعا شاقىرىلىپ, ولارعا وسى جوبانىڭ سەرىكتەسى «Meloman-Marwin» كىتاپ دۇكەنى اتىنان سەرتيفيكات تابىس ەتىلدى.
الماتى
