كورمەنىڭ اشىلۋ سالتاناتىندا ۇلتتىق مۋزەيدىڭ ديرەكتورى بەرىك ابدىعالي ۇلى عالىمنىڭ مۇراسى – قازاق ەلىنىڭ رۋحاني تۇعىرىن بيىكتەتەتىن ماڭگىلىك قازىنا ەكەنىن اتاپ ءوتتى.
«شوقان – ءالى دە تولىق زەرتتەلمەگەن, بولاشاق ۇرپاققا تانىلۋعا ءتيىس مول مۇرانىڭ يەسى. ونىڭ ءومىر جولى مەن ەڭبەكتەرى – قازاق عىلىمىنىڭ باستاۋى», دەدى بەرىك ابدىعالي ۇلى.
سونداي-اق جيىندا مادەنيەت جانە اقپارات ءمينيسترى ايدا بالاەۆانىڭ ارنايى قۇتتىقتاۋ حاتى وقىلدى. حاتتا شوقان ءۋاليحانوۆتىڭ قازاق عىلىمى مەن اعارتۋ سالاسىنا قوسقان ۇلەسى, ونىڭ مۇراسىن زاماناۋي زەردەلەۋ مەن ناسيحاتتاۋدىڭ وزەكتىلىگى اتاپ ءوتىلدى.
كورمە اياسىندا ۇيىمداستىرىلعان دوڭگەلەك ۇستەلدە زيالى قاۋىم وكىلدەرى مەن عالىمدار شوقان مۇراسىنا قاتىستى تۇشىمدى وي-پىكىرىن ايتتى.
«شوقان بەس جاسىنان اكەسىنىڭ جانىندا ءجۇرىپ, بىلىمگە ەرەكشە قۇشتارلىق تانىتقان. وقىماعان ءپانى جوق دەۋگە بولادى. ەتنوگرافيا, شىعىستانۋ, تۇركى حالىقتارىنىڭ تاريحى مەن مادەنيەتى, گەوگرافيا, زاڭ, ادەبيەت سياقتى سالالاردى ەركىن مەڭگەرگەن. ورىس جانە ەۋروپا عىلىمىن شىعىس وركەنيەتىمەن ۇشتاستىرا بىلگەن. قاشقارياعا جاساعان ساپارى عىلىمي تۇرعىدان دا, ساياسي ماڭىزىمەن دە ەرەكشەلەندى. بۇل ساپار – رەسەي مەن قىتاي اراسىنداعى قاتىناسقا ىقپال ەتكەن تاريحي وقيعا», دەدى فيلولوگيا عىلىمدارىنىڭ دوكتورى سەرىك نەگيموۆ.
كورمەنىڭ ەكسپوزيتسيالىق قۇرىلىمى بىرنەشە بولىمنەن تۇرادى. ۇلى تۇلعانىڭ بالالىق شاعى, ومبى كادەت كورپۋسىنداعى وقۋ كەزەڭى, العاشقى زەرتتەۋلەرى, قاشعار جورىعى مەن عىلىمي ساياحاتتارى, تاريحي, قۇقىقتىق جانە ەتنوگرافيالىق مۇرالارى, سونداي-اق شوقان بەينەسىنىڭ ونەر مەن ادەبيەتتەگى كورىنىستەرىنە ارنالعان. ەكسپوزيتسيادا عالىمنىڭ قولجازبالارى, جەكە كۇندەلىكتەرى, حاتتارى, عىلىمي ەڭبەكتەرى, سونداي-اق وزىنە تيەسىلى زاتتار – قارۋ-جاراعى, بەلدىگى, ساندىعى, وتباسىلىق جادىگەرلەر كورسەتىلگەن. سونىمەن بىرگە قاشقار ساپارىنا قاتىستى كارتالار مەن فوتودەرەكتەر, سيرەك ارحيۆ قۇجاتتارى ۇسىنىلعان.
ايتا كەتەيىك, كورمە ش.ءۋاليحانوۆ اتىنداعى التىنەمەل مەموريالدىق مۋزەيى جانە سىرىمبەت تاريحي-ەتنوگرافيالىق مۋزەيىنىڭ بىرلەسۋىمەن ۇيىمداستىرىلىپ وتىر. اتالعان كورمە 12 شىلدەگە دەيىن جالعاسادى.
جىبەك بولىسبەك,
ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى
