ينەسسا ۆالەرەۆنا 1997 جىلى سەمەي مەملەكەتتىك مەديتسينالىق اكادەمياسىن تامامداعان سوڭ, تۋعان قالاسى پاۆلودارعا ورالۋدى ءجون دەپ شەشتى. مۇندا بىردەن انالاردى بوساندىرۋ قىزمەتىنە ارالاسىپ, پەرزەنتحانا ءىسىن تاجىريبە تۇرعىسىنان مەڭگەرە باستادى. بۇگىندە بۇل قىزمەتتە قاتارىنان 28 جىل ەڭبەك ەتىپ جاتىر. قازىرگى قىزمەتى – وڭىرلىك پەريناتالدىق ورتالىق باس دارىگەرىنىڭ ەمدەۋ ءىسى جونىندەگى ورىنباسارى.
«پەريناتالدىق ورتالىق – قاتەرلى توپتاعى جۇكتى ايەلدەرگە بوسانۋ ۇستىندەگى, بوسانعاننان كەيىنگى كەزەڭدە جوعارى ماماندانعان اكۋشەرلىك-گينەكولوگيالىق جانە نەوناتولوگيالىق كومەك كورسەتەتىن, سونىمەن قاتار شالا تۋعان نارەستەگە كۇتىم جاسايتىن ەلىمىزدەگى ەڭ ءىرى مەكەمەنىڭ ءبىرى. كەز كەلگەن وپەراتسيانىڭ ءتۇرىن جاساۋعا مامانداندىم. اۋرۋى اسقىنعان, ىشتەگى ءسابيىنىڭ پاتولوگيالىق بەلگىلەرى بار انالار ۇزبەي ءتۇسىپ جاتادى. ولاردىڭ بارلىعىنا كومەك كورسەتۋ, جانىنا سۇيەۋ بولۋ, ءوزىنىڭ جانە ءسابيىنىڭ ومىرىنە اراشا ءتۇسۋ – كۇندەلىكتى جۇمىسىمىزدىڭ باستى ميسسياسى», دەيدى دارىگەر.
ارىپتەستەرى كەيىپكەرىمىزدىڭ ۇنەمى العى شەپتە جۇرەتىن كاسىبي مامان ەكەنىن ايتادى. ەڭ كۇردەلى, كولەمدى وپەراتسيا وعان تاپسىرىلادى. اسىرەسە انا بويىنداعى ءتۇرلى اكۋشەرلىك اۋىتقۋلار مەن اۋرۋلار كەزىندە وپەراتسيا جاساۋ – ەڭ قيىن ۇدەرىس. مۇنداي كەزەڭدە انانىڭ جاتىرىمەن بايلانىستى ىشكى اعزالارىن ساقتاپ قالۋعا كوبىرەك كوڭىل بولىنەدى. ىشتەگى ءسابيدىڭ ۇرىقجولداسى كوپ جاعدايدا وزگە مۇشەلەرگە, جاتىرعا جابىسىپ قالاتىنى بار. كەسار تىلىگى ارقىلى جاسالاتىن وپەراتسيا جاساۋ ساتىندە دارىگەرلەر اعزانىڭ وزگە مۇشەلەرىنە مەيلىنشە زاقىم كەلمەۋىن قاداعالايدى. مۇنداي كۇردەلى ءارى اۋىر وپەراتسيالاردى پەريناتالدىق ورتالىق ماماندارى كەيىنگى 15 جىلدا ۇزبەي جاساپ ءجۇر.
ء«ار دارىگەردىڭ ءوز جولى بار. اكۋشەرلىك ىستە ادەتتە وزگەرىس كوپ بولا قويمايدى. سەبەبى انالاردىڭ تابيعي بوسانۋى ەجەلدەن جالعاسقان ۇدەرىس قوي. بىراق كەيىنگى ۋاقىتتا انالار مەن ىشتە جاتقان شاقالاقتاردىڭ بويىندا كوپتەگەن اۋىتقۋ ءجيى كەزدەسۋىنە وراي اكۋشەرلىك-گينەكولوگيالىق سالادا كوپتەگەن اۋقىمدى وزگەرىس بولىپ جاتىر. 2008 جىلدان باستاپ دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسى بويىنشا سالماعى 500 گرامم بولاتىن بالالاردى بوساندىرىپ الۋ نورماسى قابىلدانعان. ياعني انا مەن بالانىڭ دەنساۋلىعىنا قاۋىپ ءتونىپ تۇرسا, جۇكتىلىكتىڭ 22 اپتاسىنان باستاپ بوساندىرىپ الامىز. ەستە قالعان ءبىر جاعداي, 2019 جىلى سالماعى 470 گرامم بولاتىن ءسابيدى امان-ەسەن دۇنيەگە اكەلدىك. ول بالا قازىرگى ۋاقىتتا امان-ەسەن, ءوز قاتارلاستارىن الدەقاشان قۋىپ جەتتى. ەڭ باستىسى – ءسابيدى ءتىرى الىپ قالۋ», دەپ اڭگىمەسىن ساباقتاي ءتۇستى دارىگەر.
ءسوز سوڭىندا ينەسسا ۆالەرەۆنا ءار مەديتسينا قىزمەتكەرىنىڭ ماقساتى ادامدارعا قىزمەت ەتۋ ەكەنىن ەسكە سالدى. ال پەريناتالدىق ىستە جىلدام ويلانىپ, شۇعىل ارەكەت ەتۋ, جىلدام شەشىمدەر قابىلداۋ ماڭىزدى. دارىگەردىڭ مىندەتى – انا مەن ءسابيدىڭ ءومىرىن بارىنشا امان قالۋعا تىرىسۋ. انا جۇكتىلىك كەزەڭىندە بارلىق فاكتورلاردى ەسەپكە الىپ, دارىگەر مامانداردىڭ باقىلاۋىندا بولۋى كەرەك. مامانداردىڭ اقىل-كەڭەسىنە ۇنەمى قۇلاق ءتۇرىپ, ىقتيمال قاۋىپتى جايتتاردىڭ الدىن الىپ وتىرسا, ومىرگە دەنى ساۋ ءسابي اكەلۋدىڭ مۇمكىندىگى ارتا تۇسەدى.
پاۆلودار وبلىسى
