كەشتىڭ شىمىلدىعى «ەل سالتاناتى» بي قويىلىمىمەن اشىلدى. بالەت ارتىستەرى مىڭ بۇرالا بيلەپ, قازاق جانە الەم حالىقتارىنىڭ ءبيىن اسقان شەبەرلىكپەن ورىندادى.
اتالعان ءىس-شاراعا تۇركىستان وبلىسى اكىمىنىڭ ورىنباسارى ەرتاي التاەۆ ارنايى قاتىسىپ, بي ۇجىمىن 70 جىلدىق مەرەيتويىمەن قۇتتىقتادى. تۇركىستان وبلىسى بويىنشا ەكونوميكالىق تەرگەپ-تەكسەرۋ دەپارتامەنتى باسشىسىنىڭ ورىنباسارى مۇرات وسپانوۆ ءوز كەزەگىندە بىرقاتار مامانعا العىسحات تابىستادى. مادەنيەت قايراتكەرى, ءبيشى ۇلجان مۇستافاەۆا دا الىستان ات تەرلەتىپ كەلگەن بي ۇجىمىنا ىزگى لەبىزىن ارنادى. ال انسامبل ديرەكتورى ەلۋباي كەنجاليەۆ جينالعان ونەرسۇيەر قاۋىمعا العىسىن ءبىلدىردى.
كەش بارىسىندا ءانشى ومىرقۇل اينيازوۆ «تۇركىستان», «قازاقستان – اتامەكەنىم» اندەرىن شىرقادى.
ايتا كەتەيىك, بيىل «سالتانات» مەملەكەتتىك بي انسامبلىنە – 70 جىل تولىپ وتىر. وسى ايتۋلى مەرەيتويعا وراي العاش رەت «بي كەرۋەنى» اتتى جوبا ەلىمىزدەگى تاريحي, مادەني تۇرعىدان اسا ماڭىزدى ورىن الاتىن كيەلى تۇركىستان قالاسىنان باستاۋ الدى. كورەرمەن ەرەكشە اسەرگە بولەنىپ, ونەر ۇجىمىنا قۇرمەت-قوشەمەت كورسەتتى.
ءانسامبلدىڭ بالەت ارتىستەرى گاسترولدىك ساپار كەزىندە تۇركىستان قالاسىنىڭ تۇرعىندارىمەن ديماش قۇدايبەرگەن ورىندايتىن «تاۋ ىشىندە» انىنە فلەشموب ءتۇسىردى. اتالعان انسامبل وسكەلەڭ ۇرپاققا عاجايىپ ونەر ارقىلى جاستاردىڭ ۇلتتىق پاتريوتتىق سانا-سەزىمىن قالىپتاستىرۋ جولىندا ايانباي ونەر كورسەتىپ
كەلەدى.
«بي كەرۋەنى» جوباسى اياسىندا تۇركىستان مەن شىمكەنت قالالارىندا شەبەرلىك ساعاتتارى ۇيىمداستىرىلىپ, وڭىردەگى بي ۇجىمدارىنا تاجىريبەلى ماماندار بي ونەرىنىڭ قىر-سىرىمەن ءبولىستى. شەبەرلىك ساعاتىنا تۇركىستان قالاسىنان 200, شىمكەنت قالاسىنان 100-دەن اسا حورەوگراف قاتىستى. ءار قاتىسۋشىعا تەگىن سەرتيفيكات تابىستالدى. بۇل جوبا كۇزدە باتىس, شىعىس, سولتۇستىك قازاقستان وڭىرىندە جالعاسادى.
الۋا مۇراتحانقىزى,
ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى
