وقۋشىلارعا ارنالعان ينتەرناتى بار جاڭا ءبىلىم ورداسى جامانسور اۋىلىندا بوي كوتەرەدى. قىزىلقوعا اۋدانىندا تەمىرجول بويىندا ورنالاسقان اتالعان ەلدى مەكەندە مەكتەپ جاسىنداعى 200-گە جۋىق بالا بار. مۇندا باستاۋىش سىنىپتىڭ وقۋشىلارى 60 ورىنعا بەيىمدەلگەن عيماراتتا ءبىلىم الۋعا ءماجبۇر. ال بەيىمدەلگەن نىساندا سپورت جانە ءماجىلىس زالى جوق.
قازىر باستاۋىش سىنىپتار مەن دايىندىق توپتارىندا 64 بالا تىركەلگەن. ال جوعارى سىنىپتاردىڭ وقۋشىلارى اتىراۋ مەن قۇلسارى قالالارىنداعى, ماقات جانە مۇقىر ستانسالارىنداعى مەكتەپ-ينتەرناتتا ءبىلىم الادى.
اتىراۋ وبلىسى اكىمىنىڭ ورىنباسارى قايرات نۇرتاەۆتىڭ ايتۋىنشا, قۇرىلىسى باستالعان مەكتەپ-ينتەرنات ءۇشىن ەكى نىسان سالىناتىنى قاراستىرىلعان. ونىڭ ءبىرى – 80 ورىندىق مەكتەپ, ال ەكىنشىسى – 30 ورىنعا ەسەپتەلگەن ينتەرنات.
«پرەزيدەنتتىڭ ايقىن ۇستانىمى – قايتارىلعان قارجىنى ەل يگىلىگىنە جۇمساۋ. مەملەكەتكە قايتارىلعان اكتيۆتەر قارجىسىنىڭ ءبىر بولىگى جامانسور اۋىلىندا جاڭا مەكتەپ-ينتەرناتتىڭ قۇرىلىسىنا جۇمسالادى. بۇل جوبا شالعاي اۋىلداعى بالالاردىڭ ساپالى ءبىلىم الۋىنا قولايلى جاعدايدىڭ كەپىلى بولادى», دەدى قايرات نۇرتاەۆ.
وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ تاپسىرىسىمەن سالىناتىن ءبىلىم ورداسى پروكۋراتۋرانىڭ باقىلاۋىنا الىنىپ وتىر. اتىراۋ وبلىسىنىڭ پروكۋرورى باۋىرجان جۇماحانوۆتىڭ پىكىرىنشە, مەكتەپ-ينتەرناتتىڭ قۇرىلىسىن الداعى قاراشا ايىنا دەيىن اياقتاۋ كوزدەلىپتى. قۇرىلىستىڭ ساپالى جۇرگىزىلۋىنە جاۋاپتى مەردىگەر – «جيەنباي» جشس. ال «Aspab Engineering Grup» جشس تەحنيكالىق قاداعالاۋدى, «A&K الي Company» جشس اۆتورلىق باقىلاۋدى جۇرگىزەدى.
جامانسور اۋىلىنىڭ تۇرعىندارى مەكتەپ-ينتەرنات قۇرىلىسىنىڭ باستالعانىن قۋانىشتى جاڭالىق رەتىندە قابىلداپ وتىر. ويتكەنى اۋىل تۇرعىنى باعداباي امانوۆتىڭ ايتۋىنشا, بۇرىن بالالاردى وزگە اۋىلدارداعى مەكتەپ-ينتەرناتتارعا تاسىمالداپ كەلگەن. اسىرەسە قىسقى مەزگىلدە قيىندىق ءجيى تۋىندايدى.
«بالالار اتا-اناسىنىڭ جانىندا ءبىلىم العانى ءجون عوي. الايدا وسى كەزگە دەيىن ءبىز مۇنداي مۇمكىندىككە قول جەتكىزە المادىق. جامانسوردا جوعارى سىنىپقا ارنالعان ءبىلىم ورداسى جوق. سول سەبەپتەن وقۋشىلاردى كورشىلەس ەلدى مەكەندەردەگى ينتەرناتتارعا جىبەرەتىن ەدىك. بالالارىمىز اتا-اناسىنان جىراقتاۋدى قالاماسا دا امالسىزدان كەتەتىن ەدى. ەندى ءوز اۋىلىمىزدا زاماناۋي مەكتەپ-ينتەرنات اشىلسا, الدىمەن بالالارىمىز قۋاناتىن بولدى», دەيدى باعداباي امانوۆ.
اتىراۋ وبلىسى
