ءتورت قۇتقارۋشىنىڭ ءومىرىن جالماعان «مايقايىڭالتىن» اق-نىڭ بارلىق كاپيتالدارى, سونىڭ ىشىندە التىن كەنىشى مەن كومبيناتى, بيىلعى ءساۋىر ايىندا تولىقتاي «التىنالماس اك» اق-نىڭ قاراۋىنا وتكەن. بەلگىلى بولعانداي, «مايقايىڭالتىن» جاڭا يەسىنە 5,8 ملرد تەڭگەگە ساتىلعان. Kase.kz - قازاقستان قور بيرجاسىندا «التىنالماس اك» اق 2024 جىلعا شوعىرلاندىرىلعان قارجىلىق ەسەپتىلىگى جانە اۋديتورلىق ەسەبى جاريالاندى.
ەسەپتە كورسەتىلگەندەي, مايقايىڭدىق كاسىپورىندى كومپانيا 5 ملرد 827 ملن تەڭگەگە ساتىپ العان.
- 2025 جىلدىڭ 2 ساۋىرىندە توپ كەن ورىندارى پورتفەلىن كەڭەيتۋ ستراتەگياسىن جۇزەگە اسىرۋ اياسىندا «مايقايىڭالتىن» اق التىن ءوندىرۋ كومپانياسىن ساتىپ الدى. ساتىپ الۋ كەزىندە بەلگىلەنگەن ءادىل قۇنى – 5 ملرد 827 ملن 677 مىڭ تەڭگە,-دەپ كورسەتىلگەن قارجىلىق ەسەپتە.
بۇل سوماعا التىن كەنىشى ءۇشىن تولەم جانە كاسىپورىننىڭ بۇعان دەيىنگى كەلىسىمشارتتىق قارىم-قاتىناستارىن رەتتەۋ كىرگەن.
ال «مايقايىڭالتىننىڭ» اكتيۆتەرى جالپى سوماسى 24,5 ملرد تەڭگە دەپ باعالانعان. سونداي-اق كومپانيانىڭ مىندەتتەمەلەرى 6,6 ملرد تەڭگە دەپ كورسەتىلگەن. وسىلايشا «التىنالماس» كەنىشتى نەگىزگى قۇنىنان 3 ەسە ارزانعا ساتىپ العانى ءمالىم بولىپ وتىر. ءساتتى ساتىپ الۋدان جاڭا يەسى 11,8 ملرد تەڭگەدەن استام پايدا كورگەن.
جالپى 2024 جىلى «التىنالماس» كومپانياسىنىڭ جىلدىق تابىسى 175,6 ملرد تەڭگە بولعانى كورسەتىلگەن. بۇل 2023 جىلمەن سالىستىرعاندا 120,5 %-عا كوپ. «التىنالماستىڭ» شەشۋشى اكتسيونەرلەرى - نيدەرلانديالىق Gouden Reserves B.V. توبى (67,5 % ۇلەسكە يە) مەن قازاقستاندىق وليگارح ۆلاديمير دجۋمانباەۆ (22,5 %).
پاۆلودار وبلىسى
