ەلىمىزدە ورتا بىلىكتى ماماندارعا سۇرانىس جوعارى

2025 جىلدىڭ مامىر ايىندا ەلىمىزدىڭ ەلەكتروندىق ەڭبەك بيرجاسى — Enbek.kz پورتالى جۇمىس ىزدەۋشىلەر مەن جۇمىس بەرۋشىلەر اراسىنداعى ارالىق كوپىر رەتىندەگى قىزمەتىن بەلسەندى تۇردە جالعاستىردى. 

اتالعان ايدا Enbek.kz جۇيەسىندە 86 مىڭ بوس جۇمىس ورنى مەن 110 مىڭ تۇيىندەمە ورنالاستىرىلعان. بۇل – ءساۋىر ايىمەن سالىستىرعاندا بوس ورىندار سانى 11,8%-عا, ال تۇيىندەمە 4,3%-عا ازايعانىن بىلدىرەدى. 

ادەتتەگىدەي, ەڭبەك نارىعىندا ەڭ كوپ كادر سۇرانىسى ءبىلىم بەرۋ سالاسىنا تيەسىلى بولدى – مۇندا 15 مىڭنان استام بوس ورىن تىركەلگەن. بۇدان كەيىن قىزمەت كورسەتۋ سالاسىنىڭ باسقا تۇرلەرى (10,7 مىڭ), سونداي-اق قۇرىلىس سالاسى (8,5 مىڭ) سۇرانىس جاعىنان كوش باستاپ تۇر. جۇمىس ورىندارى نەگىزىنەن ءىرى قالالار مەن اگروونەركاسىپتىك ايماقتاردا شوعىرلانعان.

مامىر ايىندا ورتاشا بىلىكتى ماماندار قاتارىنا دەگەن سۇرانىس ۇسىنىستان 16%-عا اسىپ تۇسكەن. بۇل – كاسىپتىك ءبىلىم العان مامانداردىڭ قازىرگى نارىقتا باعاسىنىڭ ارتىپ كەلە جاتقانىن كورسەتەدى. ال جوعارى بىلىكتى لاۋازىمدارعا كەرىسىنشە, ۇمىتكەرلەر سانى كوپ, بىراق ناقتى ۇسىنىس از – بۇل ءوز كەزەگىندە باسەكەنىڭ كۇشەيىپ وتىرعانىن اڭعارتادى.

جۇمىس بەرۋشىلەردىڭ بەلسەندىلىگىنەن استانا قالاسى ءبىرىنشى ورىنعا شىقتى. جالپى بوس ورىنداردىڭ 11,5%-ى وسى وڭىرگە تيەسىلى. ودان كەيىن تۇركىستان (7,5%) مەن پاۆلودار (7,1%) وبلىستارى ورنالاسقان. الايدا بىرقاتار وڭىرلەردە جۇمىس ورىندارىنىڭ سانى كۇرت قىسقارعان. ماسەلەن, باتىس قازاقستان وبلىسىندا – 36%, الماتى قالاسىندا – 35%, ماڭعىستاۋدا – 34%, ال ۇلىتاۋ وبلىسىندا – 25%-عا تومەندەگەن.

جۇمىس ىزدەۋشىلەر اراسىندا 34 جاسقا دەيىنگى جاستار ەڭ بەلسەندى سانات رەتىندە تىركەلىپ وتىر – جالپى تۇيىندەمەلەردىڭ 44%-ىن قۇرايدى. بۇل شامامەن 48,6 مىڭ ۇمىتكەر دەگەن ءسوز. ودان كەيىنگى ورىندا ورتا جاستاعىلار (37%). جىنىستىق ارا سالماققا كەلسەك, ايەلدەردىڭ ۇلەسى – 52,8%, ەرلەر – 47,2%.

جۇمىس ىزدەۋشىلەر بەلسەندىلىگىنىڭ ەڭ ەلەۋلى تومەندەۋى الماتى قالاسىندا تىركەلدى — 28%-عا كەمىگەن. ال باسقا وڭىرلەردە بۇل كورسەتكىش 15%-دان اسپاعان.

مامىر ايىندا دا ءتارتىپ ساقشىلارىنا (1,8 مىڭ بوس ورىن), مەدبيكەلەرگە (1,7 مىڭ) جانە جۇرگىزۋشىلەرگە (1,5 مىڭ) دەگەن تۇراقتى سۇرانىس ساقتالدى.

جالاقى بويىنشا ەڭ جوعارى ۇسىنىستار:

• تاۋ-كەن ونەركاسىبىندەگى باسشىنىڭ ورىنباسارى – ورتاشا 788 مىڭ تەڭگە,

• باس قۇرىلىسشى – 662 مىڭ تەڭگە,

• بۇرعىلاۋشى-ينجەنەر – 605 مىڭ تەڭگە.

ال جۇمىس ىزدەۋشىلەر اراسىندا جالاقىعا قاتىستى ەڭ جوعارى كۇتىمدەر:

• ۇشقىشتار – ورتا ەسەپپەن 2,3 ملن تەڭگە,

• IT جوبالار جەتەكشىلەرى – 1,2 ملن تەڭگە,

• ءوندىرىس ۋچاسكەسى باسشىلارى – 1,1 ملن تەڭگە.

مامىر ايىنىڭ ەڭبەك نارىعىنداعى كورىنىسى – سۇرانىس پەن ۇسىنىستىڭ اراقاتىناسىندا تابيعي تەڭگەرىم بار ەكەنىن, الايدا كەي سالالاردا كادر تاپشىلىعىنىڭ سەزىلەتىنىن كورسەتەدى. جاستاردىڭ بەلسەندىلىگى مەن ورتا بىلىكتى ماماندارعا دەگەن سۇرانىس – قازىرگى ەڭبەك نارىعىنىڭ باستى ەرەكشەلىگى. ال جالاقىعا قاتىستى ءۇمىت پەن ناقتى ۇسىنىس اراسىنداعى الشاقتىق كاسىبي تاجىريبە, بىلىكتىلىك جانە ەڭبەك وتىلىنە تىكەلەي بايلانىستى ەكەنى انىق. ەڭبەك نارىعىنداعى مۇنداي ديناميكانى قاداعالاۋ – ەلدەگى ادامي كاپيتال ساپاسى مەن ەكونوميكانىڭ ناقتى سەكتورلارىنداعى وزگەرىستەردى تۇسىنۋگە مۇمكىندىك بەرەدى.