ەلىمىزدە ينۆەستورلارعا سالىقتىق جەڭىلدىكتەر جاسالىپ, كەدەندىك باجداردان بوساتىلادى, زاتتاي گرانتتار, يكەمدى ءارى جەكەلەگەن پرەفەرەنتسيالار بەرىلەدى. ءىرى ينۆەستورلارمەن باسىم سالالارداعى جوبالاردى جۇزەگە اسىرۋعا 25 جىلعا دەيىن زاڭنامالىق تۇراقتىلىقتى قامتاماسىز ەتەتىن ينۆەستيتسيالار تۋرالى كەلىسىمدەر جاسالادى.
«جاقىندا وتكەن استانا ەكونوميكالىق فورۋمىندا پرەزيدەنت قاسىم-جومارت توقاەۆ ەلىمىزدىڭ ورتالىق ازيانىڭ تۇراقتىلىعى بەرىك, ىنتىماعى بەكەم, بولاشاعى ايقىن بولعانىن قالايتىنىن ەرەكشە اتاپ ءوتتى. ۇكىمەتىمىز ءوزارا سەنىم مەن ورنىقتى دامۋ رۋحىندا تابىستى جانە ۇزاقمەرزىمدى جوبالار قۇرۋعا دايىن. ينۆەستيتسيا تارتۋ – ءوڭىردىڭ ەكونوميكالىق پاراديگماسىنىڭ نەگىزگى فاكتورى. قازاقستان 2029 جىلعا قاراي ەكونوميكاعا كەمىندە 150 ملرد دوللار كولەمىندە شەتەلدىك كاپيتال اعىنىن قامتاماسىز ەتۋدى ماقسات ەتىپ وتىر. وسى ارقىلى اۋقىمدى ءارى بارىنشا بيىك ماقساتتار قويىلىپ, وعان قول جەتكىزۋگە ابدەن بولادى. ول ءۇشىن ۇلتتىق ەكونوميكانى قۇرىلىمدىق قايتا قۇرۋعا باعىتتالعان اۋقىمدى رەفورمالار تاباندى تۇردە جۇرگىزىلىپ جاتىر», دەدى و. بەكتەنوۆ.
دايىن ينفراقۇرىلىممەن جابدىقتالعان, سونداي-اق سالىقتىق ءارى كەدەندىك جەڭىلدىكتەر بەرەتىن ارنايى ەكونوميكالىق جانە يندۋستريالىق ايماقتار جۇمىس ىستەيدى. «استانا» حالىقارالىق قارجى ورتالىعىندا بيزنەستى جۇرگىزۋگە بىرەگەي جاعداي جاسالعان. بازاسىندا اعىلشىن قۇقىعى يۋريسديكتسياسىنىڭ بولۋى زاڭدى راسىمدەردىڭ اشىقتىعىنا كەپىلدىك بەرەدى.
سونىمەن قاتار ولجاس بەكتەنوۆ ساۋدا-ينۆەستيتسيالىق ىنتىماقتاستىقتى كەڭەيتۋ, ەنەرگەتيكا مەن لوگيستيكاداعى وڭىرلىك ارىپتەستىكتى تەرەڭدەتۋ, ماڭىزدى پايدالى قازبالار سالاسىن دامىتۋ, سونداي-اق تسيفرلاندىرۋ جانە ورنىقتى ءوسۋدى قامتاماسىز ەتۋ ماسەلەلەرىنە نازار اۋداردى.
ەنەرگەتيكا سالاسىندا ترانسشەكارالىق جوبالاردى بىرلەسىپ ىسكە اسىرۋ, «جاسىل» ەنەرگيانى ءوندىرۋ مەن بەرۋ ۇدەرىسىن قوسا العاندا, ءوڭىر ەلدەرى اراسىنداعى ىنتىماقتاستىقتىڭ باسىم باعىتتارى اتالدى. سونداي-اق كولىك-لوگيستيكالىق ينفراقۇرىلىمدى دامىتۋعا, اتاپ ايتقاندا, ترانسكاسپي حالىقارالىق كولىك باعىتى شەڭبەرىندە ءىرى ينۆەستيتسيالىق جوبالاردى جۇزەگە اسىرۋعا نازار اۋدارىلدى.
تسيفرلىق ينفراقۇرىلىمدى ترانسفورماتسيالاۋ اسا ماڭىزدى سالالارعا, ونىڭ ىشىندە دەرەكتەر ورتالىقتارىن, ترانسۇلتتىق تالشىقتى-وپتيكالىق جەلىلەر تارتۋ, سۋپەركومپيۋتەرلىك قۋاتتاردى جانە جاساندى ينتەللەكت ەكوجۇيەسىن دامىتۋدى قوسا العاندا, ۇزاقمەرزىمدى ينۆەستيتسيالار تارتۋ قاجەتتىگى اتاپ ءوتىلدى.
وزبەكستان رەسپۋبليكاسىنىڭ پرەزيدەنتى شاۆكات ميرزيوەۆتىڭ قاتىسۋىمەن وتكەن پلەنارلىق وتىرىستا تۇراقتى دامۋ, ينۆەستيتسيالار جانە وڭىرلىك ارىپتەستىك ستراتەگيالارى تالقىلاندى. فورۋمدا بولگاريا پرەزيدەنتى رۋمەن رادەۆ, سلوۆاكيا پرەمەر-ءمينيسترى روبەرت فيتسو, ازەربايجان پرەمەر-ءمينيسترى الي اسادوۆ, قىرعىزستان مينيسترلەر كابينەتىنىڭ توراعاسى ادىلبەك قاسىماليەۆ, تاجىكستان پرەمەر-ءمينيسترى كوحير راسۋلزودا, تۇرىكمەنستان مينيسترلەر كابينەتى توراعاسىنىڭ ورىنباسارى نوكەرگۋلى اتاع ۇلىەۆ, رەسەي فەدەراتسياسى ۇكىمەتى توراعاسىنىڭ ورىنباسارى الەكساندر نوۆاك, ەۋروپا قايتا قۇرۋ جانە دامۋ بانكىنىڭ پرەزيدەنتى وديل رەنو-باسسو, بريكس ەلدەرى بانكىنىڭ پرەزيدەنتى ديلما رۋسسەفف ءسوز سويلەدى. سونىمەن قاتار ءىس-شاراعا پرەمەر-مينيسترلەر, حالىقارالىق ۇيىمداردىڭ, جاھاندىق كورپوراتسيالار مەن قارجى ينستيتۋتتارىنىڭ وكىلدەرى قاتىستى.
فورۋمعا قاتىسۋشىلار بۇكىل ءوڭىردىڭ ينۆەستيتسيالىق تارتىمدىلىعىن ارتتىرۋ ءۇشىن ورتالىق ازيا ەلدەرىنىڭ كۇش-جىگەرىن ۇيلەستىرۋدىڭ ماڭىزدىلىعىن اتاپ ءوتتى. فورۋم اياسىندا وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆتى قابىلدادى. ول قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قۇتتىقتاۋى مەن ىزگى تىلەگىن جەتكىزدى. كەزدەسۋ بارىسىندا ساۋدا-ەكونوميكالىق, كولىك-لوگيستيكالىق, ونەركاسىپتىك, سۋ-ەنەرگەتيكالىق, مادەني-گۋمانيتارلىق ىنتىماقتاستىق ماسەلەلەرى قارالدى.
وزبەكستان – قازاقستاننىڭ ماڭىزدى ساۋدا سەرىكتەسى. بيىلعى ءتورت اي قورىتىندىسىندا تاۋار اينالىمى وتكەن جىلدىڭ سايكەس كەزەڭىمەن سالىستىرعاندا 9,4%-عا ارتىپ, 1,3 ملرد دوللار قۇرادى. ەكسپورت 15,9%-عا ءوسىپ, 1 ملرد دوللارعا جەتتى. نەگىزگى قوزعاۋشى كۇش ونەركاسىپ, اۆتوموبيل ءارى اۋىل شارۋاشىلىعى سالالارىنداعى كووپەراتسيا بولدى.
