– بۇل – جاس دارىنداردىڭ عىلىم مەن تەحنولوگيا سالاسىنداعى الەۋەتىن الەمگە تانىتاتىن ۇلكەن جەتىستىك. وسى جولى ءبىز رەسمي تۇردە شاقىرتۋ الدىق. بۇرىن جەكە قاتىسۋشىلار بولعان. الايدا توپ بولىپ بارعان ەمەسپىز. قازاقستان اتىنان كوماندا رەتىندە ءبىرىنشى رەت قاتىسۋ – ەلدىڭ اتىن شىعاراتىن تاريحي ءسات, – دەيدى اتالعان وليمپيادانىڭ ۇيىمداستىرۋشىسى زالقاربەك ءمۇراتالي ۇلى.
STEM – بۇل تەحنولوگيا, ينجەنەريا, ماتەماتيكا عىلىمى باعىتىن قامتىعان ءبىلىم جۇيەسى. مۇندا ينجەنەرلىك روبوتتەحنيكا جانە 3D مودەلدەۋ, باعدارلامالاۋ سياقتى تەحنيكالىق سالالار دا قاراستىرىلعان.
وليمپيادا فيناليستەرىنىڭ ءبىرى – استانا قالاسىنداعى №84 مەكتەپ-ليتسەيىنىڭ وقۋشىسى ايشا تەمىرحان. ول وليمپياداعا ماتەماتيكا باعىتىنان باق سىنايدى. ونىڭ ايتۋىنشا, بۇل جولداعى العاشقى قادامى كەزدەيسوق باستالعان. «ونىنشى سىنىپتا بىزگە جاڭا مۇعالىم كەلىپ, وسى وليمپيادا تۋرالى ايتتى. بىرنەشە كۇن ىشىندە روبوت قۇراستىرىپ, قالالىق كەزەڭگە قاتىستىق. سول جەردەن حالىقارالىق دەڭگەيگە وتتىك. بىراق وتكەن جىلى وڭ ناتيجە بولماعان سوڭ, بيىل ءوزىمىزدى قايتا سىناپ كوردىك», دەيدى ول.
بۇل جوبانىڭ جارتىلاي فينالىنا قازاقستانمەن بىرگە رەسەي, قىرعىزستان جانە تاجىكستاننان كەلگەن 260-تان استام وقۋشى, 78 كوماندا باق سىنادى. ال ەلىمىزدەن 24 وقۋشى قاتىستى. سولاردىڭ ىشىنەن وزا شاپقان ءبىزدىڭ سەگىز جەتكىنشەك يسپانيانىڭ بارسەلونا قالاسىندا 9–15 شىلدە ارالىعىندا وتەتىن گراند-فينالدا ەل نامىسىن قورعايدى.
فاريزا ءىزباساروۆا,
ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى
