ەلىمىزدە باستاۋ العان جوبا فرانتسيا, يسپانيا, كاۆكاز ەلدەرىندە جالعاسىن تاۋىپ, الەم مادەنيەتىندەگى بەينەلەۋ ونەردىڭ بۇگىنگى ءورىسىن قامتىعان كوشپەلى كورمەگە ۇلاسپاق. كورمەنىڭ جەتەكشىسى – قازاقستان سۋرەتشىلەر وداعىنىڭ مۇشەسى, مادەنيەت قايراتكەرى بولات حامزين. ول بۇعان دەيىن دە تۇركى حالىقتارىنىڭ تاريحىن بەينەلەيتىن پانورامالىق سۋرەت جوباسىن جۇزەگە اسىرۋعا اتسالىسقان. قىلقالامعا ىلىنگەن كوركەم تۋىندىلاردىڭ وزەگىندە ادامدى ىزگىلىككە, دوستىق پەن مەيىرىمگە ۇندەيتىن شىعارمالار كوپ دەيدى ونەر يەسى.
«ونەر ءتىلى – ادامزاتقا ورتاق. كوركەم تۋىندىلار ۇلتقا, مەملەكەتكە بولىنبەيدى. ول ادامزاتتىڭ جان دۇنيەسىن تازارتۋعا, الەمگە مەيىرىم مەن بەيبىتشىلىك ۇيالاتۋعا قىزمەت ەتۋگە ءتيىس. ناعىز ونەر ز ۇلىمدىققا قارسى تۇرىپ, ادامگەرشىلىكتى, بەيبىتشىلىكتى ناسيحاتتايدى. مۇندا قويىلعان كارتينالاردىڭ باستى ميسسياسى – كورەرمەندى سەزىمگە بولەۋ, ويلاندىرۋ, كەرەك بولسا قۇتقارۋ. بۇگىنگى كورمەگە ەلىمىزدىڭ بىرقاتار ۇزدىك سۋرەتشىلەرىنىڭ تۋىندىلارى قويىلدى. تەحنولوگيا مۇمكىندىكتەرىن پايدالانىپ, ونلاين كورمە ارقىلى شەتەلدىك ارىپتەستەرىمىزدىڭ تۋىندىلارىمەن تانىسىپ, ءوزارا وي-پىكىر الماسۋدىڭ ءساتى ءتۇستى. ءبىزدى بىرىكتىرەتىن كۇش – شىعارماشىلىق پەن دوستىق», دەيدى بولات حامزين.
كورمە ەكسپوزيتسياسىندا زاماناۋي بەينەلەۋ ونەرىنىڭ ۇزدىك تۋىندىلارى ۇسىنىلعان. سونىمەن قاتار ۇلى جىبەك جولىنىڭ تاريحى مەن مۇراسىن ناسيحاتتايتىن مادەني-اعارتۋشىلىق باعىتتاعى كارتينالاردى دا كوزىمىز شالدى. قازاق دالاسىنىڭ باي تابيعاتى, سالت-ءداستۇرى مەن تۇرمىس-تىرشىلىگى, سالقار دالانى كەزگەن اڭىز-داستاندار, دوستىق پەن ماحاببات, ادالدىق پەن ەرلىك تاقىرىپتارى بوياۋ تىلىندە سويلەيدى.
«جازعان-سىزعانىڭدا ۇشقىر قيال, ۇتىمدى شەشىمنەن بولەك كوڭىل تولقىتار سەزىم قىلاڭ بەرمەسە ومىرشەڭ تۋىندىنى ومىرگە اكەلدىم دەۋ بەكەر. ال ونداعى سەزىم يىرىمدەرىن اركىم ءارتۇرلى قابىلدايدى, ءوز كورگەن-تۇيگەنىمەن ۇشتاستىرادى, سول ارقىلى شىعارماعا جان بىتەدى. راسىمەن دە, بەينەلى شىعارمانى باعالاۋ ولشەمىن قاراپايىم كورەرمەننىڭ كوڭىل تۇيسىگىنە قالدىرعان دۇرىس», دەيدى كورمەدە جۇمىستارىن ۇسىنعان سۋرەتشى كاميل مامۋكادزە.
جوبانىڭ جۇزەگە اسۋىنا حالىقارالىق مادەني ديپلوماتيا قاۋىمداستىعى, فرانتسياداعى يۋنەسكو كلۋبى مەن ونەر جاناشىرلارى مۇرىندىق بولعان. كاۆكازداعى باعدارلامانىڭ جەتەكشىسى – مادەنيەتتانۋشى, پەداگوگ روزەتتا مارىشەۆا, الداعى ۋاقىتتا رۋحاني-دوستىق راۋىشتەگى ونەر جارمەڭكەسى الەم ەلدەرىن شارلايتىنىن, سول ارقىلى ءومىر ءسۇرۋ سالتى ءبىر-بىرىمەن مۇلدە قابىسپايتىن ەلدەر مادەني ديالوگ ورناتىپ, شىعارماشىلىق بايلانىستىڭ جولى كەڭەيەتىنىن ايتادى.
الماتى
