چەحيادا شىعارىلعان L-410 ۇشاعى – ەۋروپالىق «Aircraft Industries» كومپانياسىنىڭ كوپ ماقساتقا قولدانىلاتىن تۋربوۆينتتىك اۋە كەمەسى. كابيناسى Garmin-3000 اۆيونيكا جۇيەسىمەن جابدىقتالعان. مۇنداي جۇيە ناۆيگاتسيالىق دالدىكتى ارتتىرىپ, ۇشۋدى بارىنشا قاۋىپسىز ەتەدى. زاماناۋي ۇشاق 19 ادامدى نەمەسە 2-3 تونناعا دەيىن جۇك تاسىمالداي الادى. ەڭ جوعارى ۇشۋ جىلدامدىعى – ساعاتىنا 417 شاقىرىم. اۋە كەمەسى 50°C-دان +50°C-گە دەيىنگى ەكسترەمالدى تەمپەراتۋرا جاعدايىندا ۇشا بەرەدى.
توتەنشە جاعدايلار ءمينيسترى شىڭعىس ءارىنوۆتىڭ ايتۋىنشا, ۇشاق مينيسترلىك قۇرامىنداعى اۆياتسيالىق قىزمەتتىڭ جەدەلدىگىن ارتتىرادى. ەكىنشىدەن, توتەنشە جاعدايلاردا جەدەل ارەكەت ەتۋ مۇمكىندىگىن كەڭەيتەدى. «ۇشاق بورتىندا زاماناۋي زەمبىلدەر, اۋىر ناۋقاستاردى تاسىمالداۋعا ارنالعان جابدىقتار, ۇشۋ كەزىندە سىرقاتتاردىڭ ءومىرىن ساقتاۋدى قامتاماسىز ەتەتىن قوسىمشا جابدىق ورناتۋ مۇمكىندىگى بار», دەدى مينيستر.
مۇنايلى ءوڭىردىڭ ءتورت اۋدانىنداعى ەلدى مەكەندەردە ءورت ءسوندىرۋ دەپوسى اشىلدى. قىزىلقوعا اۋدانىنىڭ تاسشاعىل اۋىلىنداعى جاڭا دەپو كوزدىعارا, جامبىل, قىزىلقوعا اۋىلدىق وكرۋگتەرىن ورتتەن قورعاۋ ءىسىن قامتاماسىز ەتەدى. جاڭا نىساننىڭ تاعى ءبىرى ماقات اۋدانىنداعى دوسسور كەنتىندە ورنالاسقان. بۇل دەپو 40 شاقىرىم راديۋستاعى 15 مىڭنان استام ادامنىڭ قاۋىپسىزدىگىن قامتىپ, ءورت, وزگە دە توتەنشە جاعدايعا دەن قويۋ ۋاقىتىن ەداۋىر قىسقارتادى.
بوكەيحان اۋىلىندا ىسكە قوسىلعان جاڭا دەپونىڭ ماڭىزى ءتىپتى زور. ويتكەنى بۇل اۋىل قۇرمانعازى اۋدانىنىڭ رەسەي فەدەراتسياسىمەن شەكاراسىنداعى قيعاش وزەنىنىڭ جاعالاۋىندا ورنالاسقان. سۋ ايدىنىنىڭ ارعى بەتىندە استراحان وبلىسىنىڭ اۋىلدارى بار.
«مەملەكەت باسشىسىنىڭ ازاماتتىق قورعاۋ جۇيەسىن نىعايتۋ, وڭىرلەردەگى قاۋىپسىزدىك دەڭگەيىن ارتتىرۋ جونىندەگى تاپسىرماسىنا سايكەس اۋىلداردا ءورت ءسوندىرۋ دەپوسى اشىلىپ جاتىر. ماقساتىمىز – كەز كەلگەن توتەنشە جاعدايعا دايىن بولۋ, جەدەل ارەكەت ەتۋ. بولىمشەلەر زاماناۋي نىساندارمەن, جاڭا تەحنيكالارمەن قامتىلاتىن بولادى. بۇل توتەنشە جاعدايدىڭ الدىن الۋعا, زاردابىن تەز جويۋعا ىقپال ەتەدى», دەدى ش.ءارىنوۆ.
اتىراۋ وبلىسىنىڭ اكىمى سەرىك شاپكەنوۆ اتاپ وتكەندەي, شالعاي اۋىلدارداعى ءورت ءسوندىرۋ دەپولارى زامان تالابىنا ساي جاراقتاندىرىلىپ جاتىر. ەلدى مەكەندەردەگى ورتكە قارسى ينفراقۇرىلىمدى نىعايتۋ جالعاسىن تابادى.
ء«ورت سوندىرۋشىلەردىڭ الاڭسىز جۇمىس ىستەۋىنە تولىققاندى جاعداي جاسالدى. مۇنىڭ ءبارى توتەنشە جاعداي كەزىندە شۇعىل ارەكەت ەتۋگە, كاسىبي تۇرعىدا شىڭدالۋعا, ازاماتتاردىڭ قاۋىپسىزدىگىن قامتاماسىز ەتۋگە سەپتىگىن تيگىزەدى. سونداي-اق سالا ماماندارىنىڭ الەۋمەتتىك جاعدايىن جاقسارتۋعا دا نازار اۋدارىپ وتىرمىز», دەدى س.شاپكەنوۆ.
ءورت ءسوندىرۋ دەپوسى جەرگىلىكتى بيۋدجەت ەسەبىنەن سالىنعان. قۇرىلىسىن مەردىگەر مەكەمە – «دەكور» جشس جۇرگىزگەن. جالپى اۋماعى 480 شارشى مەتر نىسان تەز قۇراستىرىلاتىن جوعارى ساپالى ءمودۋلدى كونسترۋكتسيالاردان تۇرعىزىلعان. عيماراتتا ديسپەتچەرلىك, دەمالىس, اس بولمەلەرى, وقۋ سىنىبى, ەكى ءورت ءسوندىرۋ تەحنيكاسىنا ارنالعان جابىق تۇراق بار.
توتەنشە جاعدايلار ءمينيسترى ش.ءارىنوۆ جەرگىلىكتى ءورت سوندىرۋشىلەرگە 27 جاڭا تەحنيكانى سالتاناتتى جاعدايدا تاپسىردى. ونىڭ 22-ءسى – ءتۇرلى سىيىمدىلىقتاعى تسيستەرناسى بار ءورت ءسوندىرۋ تەحنيكاسى. سونداي-اق توتەنشە جاعدايلاردىڭ سالدارىن جويۋعا ارنالعان جابدىقتارمەن قامتىلعان اسا-20 اپاتتىق-قۇتقارۋ, بايلانىس جانە جارىقتاندىرۋ, جانارمايمەن جابدىقتايتىن, بيىك عيماراتتارداعى ءورتتى سوندىرۋگە ارنالعان مەحانيكالىق ساتى ورناتىلعان اتسل-30, مانيپۋلياتور-ەۆاكۋاتور, اكپ-70 VEMA اۆتوكوتەرگىشى, اسو-20, Trackol Vega-409 تەحنيكالارى بار.
اتىراۋ وبلىسى
