بۇل كولىكتىڭ ورتاشاسىنىڭ سالماعى 17,1 توننا, ال ۇستىنە الاتىن جۇگى – 31 توننا. سوندا ماگيسترالدى اسفالت جولدارعا تۇسىرەتىن سالماعى – 48 توننا. جىلدامدىعىن ساعاتىنا 90 كم-گە دەيىن جەتكىزە الادى. دەمەك, 1 مەتر جولعا تۇسىرەتىن جۇكتەمەسى – شاقىرىمىنا 4 320 توننا. سونشا اۋىر جۇك, قاتتى جىلدامدىق جولدى ەزبەي قويمايدى. بىزدە بەلدىككە تۇسىرەتىن سالماق 10 توننادان اسپاۋى كەرەك. ال كوكتەمگى جانە جاز ايلارىندا بۇل شەكتەۋ 8 تونناعا دەيىن تومەندەتىلەدى. سالىستىرۋ ءۇشىن ايتاتىن بولساق «كاماز»-دىڭ الاتىن جۇگى 7 تونناداي, ارتىنداعى تىركەمەسىمەن قوسقاندا 15-16 توننا شاماسىندا. بىراق ونىڭ باعاسى – 32-33 ملن تەڭگە, ال «Shacman»-دى 25-26 ملن تەڭگەگە الۋعا بولادى. سوندىقتان كاسىپكەرلەر ءارى ارزانداۋ, ءارى جۇكتى كوپ كوتەرەتىن كولىككە ۇمتىلادى. ونىڭ جولدى بۇزاتىنىن ەشكىم ەسكەرە قويمايدى.
سولتۇستىك قازاقستان وبلىسىندا بىلتىر عانا سەرگەەۆكا – پەتروپاۆل باعىتىنىڭ جولى باستالىپ, پوكروۆكا اۋىلىنا دەيىن تاقتايداي تەگىس جول ءتۇسىپ, حالىق قۋانىپ جۇرگەن. جاقىندا سول جولمەن جۇرسەك كوپ تۇستارىنىڭ شەتى ەزىلىپ, شۇقاناق بولىپ قالىپتى. بۇعان نە بولعان دەسەك, «Shacman» جولداردى وسىلاي بۇزادى دەسەدى... جول قۇرىلىسىنىڭ نورماتيۆىنە قاراساق, جۇك كولىكتەرى كوپ جۇرەتىن تاسجولداردا اسفالت كەم دەگەندە 4-5 قاباتتى بولىپ, قالىڭدىعى 30 سم-گە جەتۋى كەرەك. ءار قاباتتىڭ اراسىنا بيتۋمدىق ەمۋلسيا قۇيىلادى. وسىنداي نورماتيۆ ورىندالسا, تاسجول بىرنەشە جىل جوندەۋسىز ساقتالادى. بىراق بۇل نورماتيۆ ۇدايى ورىندالا بەرمەيدى. وعان قوسىلاتىن «Shacman»-نىڭ زاردابى تاعى بار. ءسويتىپ, ميللياردتارعا سالىنعان جولدار اياۋسىز ۇگىتىلىپ, شۇرىق-تەسىگى كوبەيىپ جاتىر.
«باسقا ەلدەردىڭ بارىندە بۇل تەحنيكا تەك كارەردە جۇرەدى. بىزدە عانا ماگيسترالدى جولداردا جۇرۋگە رۇقسات ەتىلگەن. شەكتەۋدى بيىل قويامىز دەگەنبىز. بىراق كاسىپكەرلەردىڭ دە جاعدايىن ويلاعان دۇرىس. قازىر ەلىمىزگە ءدال وسى تەحنيكا اعىلىپ كەلىپ جاتىر», دەپ ءۋاج ايتتى بۇرىنعى كولىك ءمينيسترى مارات قاراباەۆ 2023 جىلى استانا تۇرعىندارىمەن كەزدەسۋدە. سونىمەن قاتار ەكس-مينيستر قىتايدا جاسالعان «Howo» جانە «Shacman» ماركالى اۋىر جۇك كولىكتەرىنىڭ سانى 60 مىڭنان اساتىنىن, ولاردى جۇك تيەگەن كۇيىندە مۇلدە جۇرگىزبەۋ تۋرالى ەرەجەنىڭ زاڭ جوباسىنا ەنگىزىلگەلى جاتقانىن دا ايتقان. سودان بەرى ءبىر جىل وتسە دە زاڭ جوباسى قابىلدانبادى, ال بىرەر كۇن بۇرىن اتالعان ۋادەنى بەرگەن ءمينيستردىڭ ءوزى ورىنتاعىن بوساتتى.
ءسوزدىڭ شىنىنا كەلسەك, «Howo» مەن «Shacman»-دارعا «جانى اشىپ, قورعاپ» وتىرعان لوببيستىك توپتار بار ەكەنى بايقالادى. راس, ءبىر كەزدە ارتىق جۇك تيەپ العان مۇنداي كولىكتەردى توقتاتىپ, ايىپپۇل دا سالعان كورىنەدى.
«بىردە ءبىز وسىنداي كولىكتەردى توقتاتىپ, ايىپپۇل سالماق بولعانىمىزدا ولاردىڭ جۇرگىزۋشىسى قوجايىندارىنا حابارلاستى. اينالاسى ءبىر ساعاتتىڭ ىشىندە ءبىزدىڭ باسشىلارىمىزدان «بوساتىڭدار» دەگەن بۇيرىق ءتۇستى», دەيدى بىزبەن اڭگىمەلەسىپ, بىراق اتى-ءجونىن كورسەتۋدى قالاماعان جول ساقشىسى.
دەمەك, قوجايىندار «باسشىلارمەن» كەلىسكەن. ال «كەلىسۋدىڭ» قالاي بولاتىنى بىلاي دا تۇسىنىكتى. ءسويتىپ, بۇل ىستە دە جەمقورلىق جول تاۋىپ تۇر.
سولتۇستىك قازاقستان وبلىسى
