– كەيىنگى ۋاقىتتا جۇرگىزۋشىلەر قاۋىمى وبلىس اۋماعىندا ءموبيلدى كەشەندەر ورناتىلعان پاترۋلدىك كولىكتەردىڭ كوبەيگەنىن بايقاپ وتىر. بۇل نەدەن تۋعان قاجەتتىلىك؟ ايىپپپۇلدى ەسەلەپ, بيۋدجەتتىڭ ءبۇيىرىن تومپايتۋ ءۇشىن بە, الدە جۇگەنسىز جۇرگىزۋشىلەردى قۇرىقتاۋدىڭ امالى ما؟
– پاۆلودار وبلىسى بويىنشا ءموبيلدى كەشەندەرمەن جانە تىركەگىشتەرمەن جابدىقتالعان پاترۋلدىك ماشينالاردىڭ سانى بۇگىندە 20-عا جەتتى. ونىڭ جارتىسى – «كيبەر شەريف» جانە وزگەسى «Ekin Patrol» جۇيەلەرى. بارلىق جۇيە ىقتيمال جول-كولىك وقيعالارىنىڭ الدىن الۋ ماقساتىندا رەسپۋبليكالىق, وبلىستىق جانە اۋداندىق ماڭىزداعى اۆتوجولدار بويىنا جۇمىلدىرىلعان. سونداي-اق بىرنەشەۋى وبلىس ورتالىعىنداعى قوعامدىق ءتارتىپتى جانە جول قاۋىپسىزدىگىن قامتاماسىز ەتۋگە قاتىسادى. «كيبەر-شەريف» پەن «Ekin Patrol» بورتتىق اپپاراتتىق-باعدارلامالىق كەشەندەرى 360 گرادۋستا فوتو-بەينە تىركەۋىن جانە پانورامالىق بەينە جازباسىن جۇزەگە اسىرا الادى. اتاپ ايتقاندا, مەملەكەتتىك تىركەۋ نومىرلەرىن تانۋ, ىزدەۋ بازالارى بويىنشا تەحنيكالىق قۇرالداردى اۆتوماتتى تۇردە تەكسەرىپ, ينسپەكتورلاردى حاباردار ەتۋ. ەڭ سوڭى, گەواقپاراتتىق جۇيەلەردى پايدالانا وتىرىپ, اۆتوكولىكتەردىڭ جىلدامدىعىن انىقتايدى. جاڭاشىل تەحنولوگيانىڭ بارلىعى ازاماتتاردىڭ قاۋىپسىزدىگىن نىعايتۋعا, جۇرگىزۋشىلەردىڭ ءتارتىبىن ارتتىرۋعا باعىتتالعان.
– ەگەر الگىندەي پاترۋلدىك كولىكتەر جولداعى ءتارتىپتى تورۋىلداۋ كەزىندە ارنايى جارىق سيگنالدارىن قوسپاسا, پوليتسەي قىزمەتكەرلەرى زاڭدى بۇزعان بولىپ ەسەپتەلە مە؟
– پاترۋلدىك-بەكەتتىك قىزمەت اتقارۋ نۇسقاۋلىعىنا سۇيەنسەك, پوليتسيا ينسپەكتورى تىكەلەي اۆتوجولدى پاترۋلدەۋ كەزىندە جالپىعا ورتاق جول قوزعالىسى ەرەجەلەرىن ۇستانادى. ال جول-كولىك وقيعاسى تۋرالى شاقىرۋ نەمەسە حابارلاما تۇسكەن جاعدايدا, جول قوزعالىسىندا باسىمدىق الۋ ءۇشىن كوك جانە قىزىل ءتۇستى جارىق ماياگىن, ارنايى دىبىس سيگنالىن قوسىپ قوزعالۋى قاجەت. كۇندىزگى مەزگىلدە ارنايى سيگنال جول قوزعالىسى ەرەجەلەرىن بۇزۋشىلىقتى تىكەلەي انىقتاعان جاعدايدا عانا قولدانىلادى. ال جول قوزعالىسىنا قاتىسۋشىلاردىڭ جول ەرەجەسىن بۇزعان ءساتىن ءتۇسىرۋ كەزىندە پاترۋلدىك كولىكتىڭ جارىق سيگنالى قوسىلماي تۇرسا, ول زاڭ بۇزۋشىلىق بولىپ ەسەپتەلمەيدى. سەبەبى قۇقىقبۇزۋشىلىق اۆتوماتتى باعدارلامالىق جۇيەمەن انىقتالادى.
– ال تۇنگى ۋاقىتتا شە؟
– پوليتسيا قىزمەتكەرلەرىنىڭ پاترۋلدىك بەكەتتىك قىزمەتتى اتقارۋى جونىڭدەگى نۇسقاۋلىقتى بەكىتۋ تۋرالى ىشكى ىستەر ءمينيسترىنىڭ 2023 جىلعى 15 اقپانداعى №164 بۇيرىعىندا تاۋلىكتىڭ قاراڭعى ۋاقىتىندا پاترۋلدەۋ تۇراقتى جارىق سيگنالىن قولدانا وتىرىپ جۇزەگە اسىرىلادى دەپ كورسەتىلگەن. بۇل بۇيرىقتى بۇزعان پوليتسيا قىزمەتكەرلەرىنە قۇقىق قورعاۋ قىزمەتى تۋرالى زاڭنىڭ 57, 58-باپتارىنا سايكەس شارا قولدانىلادى.
– بىلتىر وبلىستاعى ءموبيلدى كەشەندەر نەشە زاڭ بۇزۋشىلىقتى تىركەدى؟
– 2024 جىلى پاۆلودار وبلىسى اۋماعىندا ءموبيلدى كەشەندەردىن كومەگىمەن 35 مىڭنان اسا ۇيعارىم شىعارىلىپ, جالپى سوماسى 488 ملن تەڭگەدەن اساتىن ايىپپۇل سالىندى. زاڭبۇزۋشىلىقتىڭ باسىم بولىگى – جىلدامدىقتى ارتتىرۋ.
– وڭىردە «سەرگەك» جۇيەسىنە ۇقساس كامەرالار ورناتۋ قاراستىرىلعان با؟ ول قاشان جۇزەگە اسىرىلادى؟
– بيىل پاۆلودار, ەكىباستۇز جانە اقسۋ قالالارىندا, سونداي-اق رەسپۋبليكالىق ماڭىزى بار اۆتوجولداردا زاڭ بۇزۋشىلىقتاردى تىركەۋ جۇيەلەرىن ورناتۋ جوسپارلانعان. بۇل – ەڭ اۋەلى جەرگىلىكتى اتقارۋ بيلىكتەرىنىڭ قۇزىرىنداعى ماسەلە. وبلىستا بۇل بويىنشا ارنايى جوبا قابىلدانىپ, قاراجات قاراستىرىلعان. جاڭا جۇيەلەر ورناتىلسا, جۇرگىزۋشىلەردىڭ ءتارتىبى نىعايىپ, جول-كولىك وقيعالارى ازايا تۇسەدى دەگەن ۇمىتتەمىز.
– جول-كولىك اپاتتارىنىڭ كوبەيۋىنە كوبىنە قانداي جاعداي سەبەپ بولىپ وتىر؟
– جۇرگىزۋشىلەردىڭ قارسى باعىتقا شىعىپ كەتۋى, جىلدامدىقتى شامادان تىس اسىرۋ مەن جاياۋ جۇرگىنشىلەرگە جول بەرمەۋى قايعىلى جاعدايعا ءجيى سوقتىرىپ جاتىر. جىل باسىنان بەرى وبلىسىمىزدا جول-كولىك اپاتىنىڭ سانى 57 پايىزعا وسكەنى بايقالدى. ونىڭ ىشىندە قازا تاپقاندار سانى كوبەيىپ, زارداپ شەككەن ادامداردىڭ ۇلەسى 62 پايىزعا ارتقان. اۆتوجولداردا جىلدامدىق رەجىمىن بۇزعان 26 مىڭعا جۋىق جۇرگىزۋشى انىقتالدى. جىلدامدىقتى ارتتىرۋ – ءوڭىر جولدارىندا ەڭ كوپ تارالعان زاڭ بۇزۋشىلىقتىڭ ءبىرى. مىسال ءۇشىن جاقىندا استانا – پاۆلودار اۆتوجولى بويىندا «Haval dargo» اۆتوكولىگى ساعاتىنا 207 شاقىرىممەن جۇيتكىگەنى كامەراعا ءتۇسىپ قالدى. جۇرگىزۋشى 157 280 تەڭگە سوماسىندا ايىپپۇل تولەدى. تاعى ءبىر جاعدايدا «Range Rover» اۆتوكولىگى ۇستالدى. ول ساعاتىنا 237 شاقىرىم جىلدامدىقپەن جۇرگەن. كەز كەلگەن شەكتەن تىس جىلدامدىق جول قوزعالىسىنا قاتىسۋشىلار ءۇشىن ۇلكەن قاۋىپ توندىرەدى. ولاردىڭ بارلىعى جازاسىز قالمايدى. ايىپپۇلعا جول قوزعالىسى ەرەجەلەرىن بۇزعانى ءۇشىن قولدانىلاتىن اكىمشىلىك شارا ەمەس, ەرەجەلەردى ساقتاۋدىڭ ماڭىزدىلىعىن, قوزعالىسقا قاتىسۋشىلاردىڭ ءومىرى مەن دەنساۋلىعىنا قۇرمەتپەن قاراۋدى ەسكە سالاتىن تارتىپتىك قۇرال رەتىندە قاراعان دۇرىس.
– اڭگىمەڭىزگە راحمەت.
اڭگىمەلەسكەن –
مۇرات قاپان ۇلى,
«Egemen Qazaqstan»
پاۆلودار وبلىسى
