جيىندى «قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى اشىپ, قوس گازەت ۇجىمىنا سپيكەردى تانىستىرىپ, كەزدەسۋدىڭ ماقساتى قىزمەتكەرلەردىڭ قۇقىقتىق ساۋاتتىلىعىن ارتتىرۋ ەكەنىن اتاپ ءوتتى.
ءوز كەزەگىندە ءسوز العان جازيرا جاقسىلىققىزى سىبايلاس جەمقورلىق تۋرالى جانە الدىن الۋ بويىنشا قازىرگى زاڭعا سايكەس تالاپتاردى جانە بولاتىن وزگەرىستەردى باياندادى.
ونىڭ ايتۋىنشا پرەزيدەنت جارلىعىمەن بەكىتىلگەن سىبايلاس جەمقورلىققا قارسى ءىس-قيمىل تۇجىرىمداماسى بويىنشا جۇمىستاردىڭ باسىم بولىگى ورىندالعان. زاڭناماعا وزگەرىستەر سول تۇجىرىمداما اياسىندا ەنگىزىلىپ جاتىر. تۇجىرىمداما بويىنشا 6 باستاما جۇزەگە اسىرىلعان. اتاپ ايتقاندا جەمقورلاردىڭ اشىق ءتىزىلىمىن ەنگىزۋ, مۇددەلەر قاقتىعىسىن رەتتەۋ, پارا بەرۋ/ۇسىنۋ تۋرالى ۋادەنى قىلمىستىق سيپاتقا يە ەتۋ, زاڭسىز سىياقى تالاپ ەتۋگە بايلانىستى قۇقىق بۇزۋشىلىقتاردى انىقتاۋ, جەمقورلىققا قارسى شارالار قابىلداماعانى ءۇشىن جاۋاپكەرشىلىك جانە زاڭدى تۇلعالاردىڭ جاۋاپكەرشىلىگىن كۇشەيتۋ باعىتىندا جاسالعان جۇمىستارعا توقتالدى. ءار جىلدارى قابىلدانعان سىبايلاس جەمقورلىققا قارسى رەفورمالار تۋرالى دا تۇسىنىك بەردى.
«تمد ەلدەرى اراسىندا الدىمەن قازاقستان 1998 جىلى سىبايلاس جەمقورلىققا قارسى زاڭنامانى جەتىلدىرۋدى قولعا الدى. 2015 جىلعا دەيىن زاڭناما بويىنشا جازالاۋ قىلمىستىق قۇقىقتىق شارالارىنىڭ باسىمدىعى بولسا, قازىرگى ۋاقىتتا الدىن الۋ باسىمىراق باعىتقا يە» دەدى ج.جاقسىلىققىزى.
جازيرا جىلقىشيەۆا سونىمەن قاتار سىبايلاس جەمقورلىققا قارسى ساياسات وقۋ-اعارتۋ, الدىن الۋ جانە جازالاۋ سەكىلدى ءۇش باعىتتان تۇراتىنىن, جەمقورلىق تۋرالى حابارلاعان ازاماتتارعا كوتەرمەلەۋ سىياقىسى بەرىلەتىنىن ايتتى. ودان ءارى گازەت تىلشىلەرىنىڭ سۇراقتارىنا تۇششىمدى جاۋاپ بەردى.
