مەملەكەت باسشىسىنىڭ تاپسىرماسىن ىسكە اسىرۋ, ينكليۋزيۆتى جانە ارنايى ءبىلىم بەرۋدى جۇيەلى تۇردە نىعايتۋ اياسىندا وقۋ-اعارتۋ مينيسترلىگى «پسيحولوگيالىق-پەداگوگيكالىق سۇيەمەلدەۋ قىزمەتى ەرەجەلەرىن بەكىتۋ تۋرالى» جاڭا بۇيرىقتى قابىلدادى. قۇجات ارنايى جانە ينكليۋزيۆتى ءبىلىم بەرۋ ۇيىمدارىندا پسيحولوگيالىق-پەداگوگيكالىق سۇيەمەلدەۋ قىزمەتىنىڭ بىرىڭعاي جۇيەسىن قۇرۋعا باعىتتالعان.
ينكليۋزيۆتى جانە ارنايى ءبىلىم بەرۋ دەپارتامەنتىنىڭ ديرەكتورى لاۋرا بۋتاباەۆا جاڭا وزگەرىس جونىندە: «پسيحولوگيالىق-پەداگوگيكالىق سۇيەمەلدەۋ قىزمەتى (پپس) – ءبىلىم بەرۋ پروتسەسىنىڭ قاتىسۋشىلارىنا پسيحولوگيالىق-پەداگوگيكالىق قولداۋ كورسەتەتىن القالى ورگان. بۇل وقۋشىلاردىڭ, سونىڭ ىشىندە ەرەكشە ءبىلىم بەرۋدى قاجەت ەتەتىن بالالاردىڭ پسيحولوگيالىق ءال-اۋقاتىن قامتاماسىز ەتەدى, ولاردىڭ وقۋ موتيۆاتسياسىن, ۇلگەرىمىن, شىعارماشىلىق الەۋەتىن جانە كاسىبي ءوزىن-ءوزى انىقتاۋىن دامىتۋعا ىقپال ەتەدى», دەپ پىكىر ءبىلدىردى.
