فوتو: اقوردا
«مەملەكەتتەرىمىزدىڭ ىنتىماعىن كوزدەگەن نيەتىڭىز ءۇشىن سىزگە شىنايى ريزاشىلىعىمدى بىلدىرۋگە رۇقسات ەتىڭىز. قازاقستاندىقتار ءسىزدى اينىماس دوس ءارى حالىقارالىق دەڭگەيدەگى بەدەلدى مەملەكەتتىك قايراتكەر رەتىندە تانيدى. بەلسەندى قىزمەتىڭىزدىڭ ارقاسىندا ءوزارا سەنىم, ساياسي ديالوگ جانە ىنتىماقتاستىعىمىز نىعايا ءتۇستى. ورتاق كۇش-جىگەر ارقىلى قارىم-قاتىناسىمىزعا تىڭ سەرپىن بەرىپ, جاڭا مۇمكىندىكتەرگە جول اشامىز دەپ سەنەمىن. قازاقستان مەن كيپر اراسىنداعى ىنتىماقتاستىقتى دامىتۋعا قوسقان ەلەۋلى ۇلەسىڭىزگە شەكسىز قۇرمەتتىڭ بەلگىسى رەتىندە سىزگە ءى دارەجەلى «دوستىق» وردەنىن تابىستاۋ جونىندە شەشىم قابىلدادىم. بۇل وردەن اتاۋى ايتىپ تۇرعانداي, دوستىقتى, قازاقستان مەن ءسىزدىڭ ەلىڭىزدىڭ اراسىنداعى قارىم-قاتىناستىڭ نەگىزى سانالاتىن سەنىم مەن سەرىكتەستىك رۋحىن سيپاتتايدى. جاۋاپتى مەملەكەتتىك قىزمەتىڭىزگە تابىس تىلەيمىن! دوستاس كيپر حالقىنىڭ يگىلىگى مەن وركەندەۋى جولىندا جەتىستىكتەرگە جەتە بەرىڭىز», دەدى قاسىم-جومارت توقاەۆ.
كيپر پرەزيدەنتى جوعارى ناگرادانى تابىستاعانى ءۇشىن مەملەكەت باسشىسىنا العىس ايتتى.
«ماراپاتتى ەكى ەل اراسىنداعى دوستىقتىڭ نىشانى رەتىندە كيپر حالقىنىڭ اتىنان قابىل الامىن. بۇل – مەن ءۇشىن زور مارتەبە. بۇگىنگى ساپار پەرسپەكتيۆتى سالالارداعى ىنتىماقتاستىقتى ودان ءارى تەرەڭدەتۋ جولىنداعى ورتاق مۇددە مەن مىقتى ساياسي ەرىك-جىگەرىمىزدى پاش ەتەدى», دەدى نيكوس حريستودۋليديس.
ەسكە سالا كەتەيىك, بۇگىن كيپر رەسپۋبليكاسىنىڭ پرەزيدەنتى نيكوس حريستودۋليديس ەلىمىزگە رەسمي جۇمىس ساپارىمەن كەلدى. پرەزيدەنت مارتەبەلى مەيماندى تاۋەلسىزدىك سارايىندا رەسمي قارسى الدى. ەكى ەل پرەزيدەنتتەرى شاعىن جانە كەڭەيتىلگەن قۇرامدا كەلىسسوز جۇرگىزدى.
