تاعى ءبىر ماڭىزدى ساۋال – «كليەنت نەلىكتەن سەنى تاڭداۋى كەرەك؟» ەلدەن اسقان نەندەي ەرەكشەلىگىڭ بار؟ بۇعان ناقتى جاۋاپ بەرە الماساڭىز, اسىقپاعان ابزال.
قوعامدىق تاماقتانۋ نارىعىنا كىرگەن كاسىپكەرلەر كوپ جاعدايدا ماركەتينگكە ءمان بەرمەي, ۇلكەن قاتەلىككە ۇرىنىپ جاتادى. ءبىز ادەتتە جوندەۋگە, قۇرىلعىعا, جيھازعا اقشا تابامىز, بىراق ماركەتينگكە كوڭىل بولمەيمىز. نە اقشا ارتىلمايدى, نە ونى سونشالىقتى ماڭىزدى دەپ سانامايمىز. كوبى «ەسىكتى اشىپ قويسام بولدى, ادامدار اعىلىپ كەلە باستايدى» دەپ ويلايدى. بۇل – ۇلكەن قاتەلىك.
قازىر ەلىمىزدە ءدامحانا, مەيرامحانا اشۋ ءىسى ءبىرشاما جەڭىلدەدى. كورشىلەس ەلدەرمەن سالىستىرعاندا بىزدەگى جاعداي الدەقايدا جايلى. ەرەجەلەر اشىق ءارى تۇسىنىكتى, رەتتەۋشى ورگاندار جاعدايعا تۇسىنىستىكپەن قارايدى. ەڭ باستىسى, زاڭ اياسىندا جۇمىس ىستەپ, بەكىتىلگەن تالاپ پەن ءتارتىپتى ساقتاساڭ بولعانى. ونىڭ ۇستىنە, كوپتەگەن پروتسەدۋرا قازىر ونلاين-فورماتتا قولجەتىمدى.
ءسوز باسىندا سالادا مامان تاپشى دەگەندى ايتىپ وتتىك. ول راس. قازىر اسپازدى دا, داياشىنى دا, مەنەدجەردى دە تابۋ وڭاي ەمەس. مۇنى مەيرامحانا بيزنەسىندەگى كۇردەلى پروبلەما دەسەك تە بولادى. كوبى جاقسى جالاقى, ءتيىمدى شارتتاردى ىزدەپ, ءبىر مەيرامحانادان ەكىنشىسىنە ءجيى اۋىسىپ جاتادى. شىن مانىندەگى كاسىبي, قۇندى كادرعا جۇمىس بەرۋشىلەر تىم ءزارۋ. نە ىستەۋ كەرەك؟ ول ءۇشىن كومپانيا ىشىندە كورپوراتيۆتىك مادەنيەتتى قالىپتاستىرۋ وتە ماڭىزدى. قىزمەتكەرگە تەك جالاقى بەرۋ ازدىق ەتەدى, وعان قۇرمەت تانىتۋ, ونى دامىتۋ جانە جايلى كوڭىل كۇي سىيلاۋ دا – ۋاقىت تالابى.
مەيرامحانا اشۋ ءۇشىن بىرقاتار قۇجات تالاپ ەتىلەدى. سولاردىڭ نەگىزگىلەرى مىنالار:
- جشس نەمەسە جك تىركەۋ كۋالىگى, ققس-عا ەسەپكە قويۋ;
- عيماراتتى جالعا الۋ شارتى نەمەسە مەنشىك قۇقىعىن راستايتىن قۇجاتتار;
- سەس قورىتىندىسى (نەمەسە ءتيىستى حابارلاما), الكوگول ءونىمىن ساتۋعا ارنالعان ليتسەنزيا, WIPON جۇيەسىندە تىركەلۋ;
- ەڭبەك شارتتارى, قىزمەتكەرلەرگە ارنالعان ساقتاندىرۋ, سانيتارلىق كىتاپشالار, ەڭبەك قاۋىپسىزدىگى مەن ءورت قاۋىپسىزدىگىنە جاۋاپتى تۇلعالاردى تاعايىنداۋ تۋرالى بۇيرىقتار;
- جابدىقتارعا ارنالعان سەرتيفيكاتتار (تارازى, ولشەۋىش, گيگرومەتر), ەۆاكۋاتسيا جوسپارى, ءورت دابىلى, جەلدەتۋ, دەزينسەكتسيا قىزمەتتەرى بويىنشا جوسپار;
- مەكەمە اتاۋىن كورسەتەتىن سىرتقى جارناما جوباسى, تاكتيلدىك بەلگىلەر, منەموسحەمالار, ەكى تىلدە دايىندالعان ءمازىر جانە قىزمەت كورسەتۋگە قوسىلاتىن پايىزدىق مولشەرلەمە تۋرالى اقپارات;
- ونىمدەردىڭ ساپا سەرتيفيكاتتارى, جەتكىزۋشىلەرمەن جانە كوممۋنالدىق قىزمەتتەرمەن جاسالعان شارتتار;
- وندىرىستىك باقىلاۋ شارتى جانە سانيتارلىق جۋرنالدار, سونىڭ ىشىندە بارلىق حاتتاما (سۋ, شۋ, جارىقتاندىرۋ, ت.ب.) ;
تولىق ءتىزىم سالا قۇلاش. ءبىر نارسەنى ءتۇسىنۋ كەرەك, قۇجات – ءسىزدىڭ قورعاۋشىڭىز. ول نىساننىڭ ادال, قاۋىپسىز جانە بارلىق مەملەكەتتىك تالاپتارعا ساي جۇمىس ىستەپ تۇرعانىن ايعاقتايدى.
قايتالاپ وتەيىك, مەيرامحانا اشۋ – تەك ءدامدى تاعامدار مەن ادەمى ينتەرەر ەمەس. «ساحنانىڭ» سىرتىندا قۇجات ءۇشىن, كادر ءۇشىن, ساپا ءۇشىن جۇگىرەتىن قىزىق تا قيىن ساتتەر جانە ءار ساعات, ءار مينۋتتى كاسىپ اۋانىنا ارناي الاتىن ۇلكەن قاجىر-قايرات تۇرادى. ەگەر سىزدەن مۇنداي ەرىك-جىگەر مەن ۇلكەن الەۋەت بايقالسا, ارينە, كوپكە سوزباي ىسكە كىرىسكەن ءجون. سونىمەن قاتار ۇلكەن ىسكە تاۋەكەل ەتەر الدىندا قوعامدىق تاماقتانۋ سالاسىندا مول تاجىريبەسى بار زاڭگەرمەن, باسقا دا بىلىكتى ماماندارمەن اقىلداسىپ العاننىڭ دا ارتىعى بولمايدى.
