سۋرەتتى تۇسىرگەن – اۆتور
تاڭ بالالار ءۇشىن كوڭىلدى باستالدى. جىلدام قيمىلدايتىن ارنايى جاساق (جقاج) قىزمەتكەرلەرى اسەرلى كورسەتىلىم ۇيىمداستىرىپ, قىزمەتتىك يتتەرمەن جۇمىس ىستەۋ داعدىلارىن, ارنايى دايىندىق ەلەمەنتتەرى مەن قىلمىسكەرلەردى ۇستاۋ تاسىلدەرىن كورسەتتى. بالالارعا پوليتسيا اۆتوكولىكتەرى مەن ءتارتىپ ساقشىلارىنىڭ ارنايى جابدىقتارىمەن جاقىن تانىسۋ ەرەكشە قىزىق بولدى.
كورسەتىلىمنەن كەيىن بالالارعا ءتاتتى سىيلىقتار تابىستالدى. كەيىن ولار پوليتسيا قىزمەتكەرلەرىنىڭ سۇيەمەلدەۋىمەن لاگەرگە قىزىقتى ساپارعا اتتاندى. لاگەرگە كەلگەندە ولاردى تالىمگەرلەر مەن قىزمەتكەرلەر جىلى جۇزبەن قارسى الىپ, لاگەر اۋماعىمەن تانىستىرىپ, ەستافەتالار, سپورتتىق ويىندار مەن شىعارماشىلىق بايقاۋلار ۇيىمداستىردى.
ءىس-شارانىڭ ەڭ اسەرلى ساتتەرىنىڭ ءبىرى پوليتسيا دەپارتامەنتىنىڭ باستىعى گەنەرال-مايور ەرلان وماربەكوۆتىڭ كەلۋى بولدى. ناعىز گەنەرالمەن جۇزدەسۋ بالالارعا ۇلكەن اسەر قالدىردى. ولار قۇرمەتپەن قارسى الىپ, سۇراقتار قويىپ, بىرگە سۋرەتكە ءتۇستى.
– بۇگىنگى كۇن ءبىزدىڭ ەڭ قىمبات, ەڭ سۇيىكتى كىشكەنتاي ازاماتتارىمىزعا ارنالادى. ءاربىر بالا ءوزىن قاۋىپسىز سەزىنىپ, جانىندا ءاردايىم قولداۋ مەن قامقورلىق كورسەتەتىن ەرەسەكتەر بار ەكەنىن بىلسە ەكەن دەيمىز. بۇل – بارىمىزگە ورتاق مىندەت, – دەدى ەرلان وماربەكوۆ بالالارمەن اڭگىمەسىندە.
مەرەكە جارقىن كۇلكىمەن, شاتتىققا تولى ساتتەرمەن جانە العىسقا تولى جۇرەكجاردى تىلەكتەرمەن اياقتالدى. بۇل كۇن بالالار ءۇشىن تەك قىزىقتى وقيعا عانا ەمەس, ەرەسەكتەر تاراپىنان كورسەتىلگەن قامقورلىق پەن مەيىرىمنىڭ, قولداۋدىڭ ماڭىزدىلىعىن ەسكە سالعان ءمانى زور ءىس-شارا بولدى. مۇنداي ءىس-شارالار جاي عانا دەمالىس ەمەس, ءاربىر بالانىڭ ءوز ءومىرىنىڭ قاۋىپسىز ەكەنىنە سەنىمدى بولىپ, ءوزىن قاجەت ءارى سۇيىكتى سەزىنۋ ءۇشىن جاسالعان جارقىن ءارى يگىلىكتى قادام.
شىعىس قازاقستان وبلىسى
