باستى وقيعا – قازاقستاندىق «ASMAR» ۇلتتىق ايەلدەر كاسىپكەرلەرى قاۋىمداستىعى ۇيىمداستىرعان «ەكونوميكالىق الەۋەتتى اشۋ: ايەلدەر كاسىپكەرلىگى ارقىلى ەكونوميكانىڭ ءوسۋى» اتتى پانەلدىك سەسسيا بولدى.
حالىقارالىق ۇيىمدار, ديپلوماتيالىق كورپۋس جانە بيزنەس وكىلدەر قاتىسقان بۇل شارادا جاھاندىق ترەندتەر مەن وزەكتى تاجىريبەلەر قارالدى.
تالقىلاۋلار بارىسىندا ايەلدەردى ەكونوميكاعا تارتۋ تەك ادىلدىك ماسەلەسى عانا ەمەس, سونىمەن بىرگە ءوسۋدىڭ قۋاتتى قوزعاۋشى كۇشى ەكەنى اتاپ ءوتىلدى. جاقىندا بۇۇ-نىڭ ايەلدەر جاعدايى جونىندەگى كوميسسياسى, ايگىلى بەيجىڭ دەكلاراتسياسى قابىلدانعاننان بەرگى 30 جىل ىشىندە الەمنىڭ بىردە-ءبىر ەلى تولىق تەڭ قۇقىلىققا قول جەتكىزە الماعانىن مالىمدەدى. بۇل ءتيىمدى قولداۋ تەتىكتەرىن ىزدەۋ مەن ەنگىزۋدىڭ وزەكتىلىگىن ايقىندايدى.
تەڭ مۇمكىندىكتەردى قامتاماسىز ەتۋدىڭ ەكونوميكالىق اسەرى دە زور: زەرتتەۋلەر كورسەتكەندەي, ايەلدەردىڭ ەكونوميكاعا تولىققاندى قاتىسۋى الەمدىك ءجىو-ءنى 28 ترلن اقش دوللارىنا دەيىن ارتتىرۋعا قاۋقارلى. قىزمەتكەرلەر ءۇشىن تەڭ جاعدايلار جاسايتىن كومپانيالار, ادەتتە, نەعۇرلىم تابىستى, يننوۆاتسيالىق جانە ينۆەستورلار ءۇشىن تارتىمدى بولادى.
وسى جاھاندىق تۇرعىدا فورۋمدا تۇركى مەملەكەتتەرى ۇيىمىنا (تمۇ) مۇشە ەلدەردىڭ ىسكەرلىك ورتاسىندا ەرلەر مەن ايەلدەر ءۇشىن تەڭ مۇمكىندىكتەر تاجىريبەسىن دامىتۋعا باعىتتالعان باستاما تانىستىرىلدى. «ASMAR» قاۋىمداستىعىنىڭ ءتورايىمى ءلاززات رامازانوۆا ايەلدەردىڭ مانساپ ساتىسىندا سەنىمدىرەك ىلگەرىلەي الۋىنا, ال كاسىپورىنداردىڭ ESG جانە ىسكەرلىك ەتيكا تۇرعىسىنان حالىقارالىق تالاپتارعا ساي بولۋىنا جاعداي جاساۋدىڭ ماڭىزدىلىعىن اتاپ ءوتتى.
«جوسپارلانىپ وتىرعان تەڭ مۇمكىندىكتەردى راستايتىن ۇلتتىق سەرتيفيكاتتاۋ ستاندارتتارىن ەنگىزۋ – بۇل سانگە نەمەسە سىرتقى ترەندتەرگە قۇرمەت كورسەتۋ ەمەس. بۇل – ايەلدەرگە مانساپتىق ءوسۋدىڭ نەعۇرلىم سەنىمدى پەرسپەكتيۆالارىن, ال بيزنەسكە – ينۆەستيتسيالار مەن حالىقارالىق سەرىكتەستىكتەرگە باسىم قولجەتىمدىلىك تۇرىندە باسەكەلەستىك ارتىقشىلىق بەرەتىن جۇيەلى تەتىك», – دەپ تولىقتىردى ءلاززات رامازانوۆا.
پانەلدىك سەسسيانىڭ شارىقتاۋ شەگى KAİSDER قاۋىمداستىعىمەن مەموراندۋمعا قول قويۋ ءراسىمى بولدى. بۇل قاۋىمداستىق تۇركى الەمى ەلدەرىندە ەرلەر مەن ايەلدەرگە تەڭ مۇمكىندىكتەردى قامتاماسىز ەتەتىن كاسىپورىنداردى سەرتيفيكاتتاۋ تاجىريبەسىنە وقىتادى.
ال سەرتيفيكاتتاۋدىڭ ءوزى ESG-قولداۋ قۇرالىنا اينالادى: ستاندارتتىڭ بولۋى قازىردىڭ وزىندە حالىقارالىق ينۆەستورلار ءۇشىن ماڭىزدى كريتەري بولىپ ەسەپتەلەدى. باعدارلامانىڭ العاشقى ناتيجەلەرى تمۇ ەلدەرىندەگى پيلوتتىق جوبالار ارقىلى كورسەتىلىپ, بيزنەستىڭ نارىقتىڭ جاڭا تالاپتارىنا بەيىمدەلۋىنە جانە باسەكەگە قابىلەتتىلىگىن كۇشەيتۋىنە جاردەمدەسەدى.
